Mereke aıasynda ashylǵan nysandar óńir turǵyndarynyń ómir sapasyn arttyrýǵa baǵyttalǵan. Atap aıtar bolsaq, ulttyq merekege oraı Eńbekshiqazaq aýdany Ashysaı aýylynda 150 adamǵa arnalǵan jańa sport kesheni iske qosyldy.
Sondaı-aq Raıymbek aýdany Jambyl aýylynda 180 oryndyq jańartylǵan mádenıet úıi jumysyn bastady, bul turǵyndarǵa mádenı is-sharalar uıymdastyryp, talanttaryn damytýǵa múmkindik bermek.
О́ńirdiń Aqdala men Kómirshi eldi mekenderinde feldsherlik-akýsherlik jáne medısınalyq pýnktter ashylyp, medısınalyq qyzmetterdiń qoljetimdiligin jaqsartýǵa qadam jasaldy.
Halyq tyǵyz shoǵyrlanǵan Qarasaı aýdanynda 60 otbasy «Qarlyǵash» turǵyn úı kesheninen jańa páterlerdiń kiltin alyp, ulan-asyr qýanyshqa keneldi. Páter ıeleri merekede qonystoı jasap, shat-shadyman boldy.
Al megapolıspen irgeles Ile, Talǵar aýdandarynda jáne Alataý qalasynda blokti-modýldik qazandyqtar iske qosylyp, kópqabatty turǵyn úı ıeleriniń kópten kútken qýanyshyn eseledi.
Mereıli mereke qarsańynda Qonaev qalasynda saltanatty jıyn ótip, oǵan eldiń damýyna eleýli úles qosqan ardagerler men qurmetti azamattar qatysty.
«Bul jyl biz úshin aıryqsha mańyzdy boldy. 2024 jyldyń alǵashqy toǵyz aıynda oblysqa 615 mıllıard teńge ınvestısııa tartylyp, bul ótken jylmen salystyrǵanda 32,8%-ǵa ósti. О́nerkásip óndirisiniń kólemi 1,4 trıllıon teńgege jetse, aýyl sharýashylyǵy ónimderi 480,6 mıllıard teńgege jetip, 1,9%-ǵa ósti. Sonymen qatar 777,1 myń sharshy metr jańa turǵyn úı paıdalanýǵa berildi, qurylys jumystarynyń jalpy kólemi 243,8 mıllıard teńgege teń boldy. Jyl basynan beri 45 myńnan astam jańa jumys orny ashyldy, bul turǵyndardyń ál-aýqatyn arttyrýdyń mańyzdy kórsetkishi. Biz durys baǵytta kele jatyrmyz, jáne birlese otyryp, budan da úlken jetistikterge qol jetkizemiz», dedi Almaty oblysynyń ákimi Marat Sultanǵazıev.
Saltanatty sharada oblystyń damýyna úles qosqan 30-dan astam azamat memlekettik nagradalarmen marapattaldy. Olardyń qatarynda túrli sala ókilderi bar.
