Aqtaý qalasy ákimdiginiń habarlaýynsha, qazirgi tańda turǵyndardy jylý, ystyq sýmen úzdiksiz qamtamasyz etý maqsatynda 11,3 shaqyrym qubyr aýystyrylǵan, bul jumystarǵa 17 mlrd teńge bólingen. Aqtaýda jumystardyń júrgizilýine baılanysty shaǵyn aýdandarda ishinara kedergi bolǵanmen, jalpy jylý berý maýsymy 15 qazanda bastaldy.
– Buǵan deıin oblys ákimdiginiń telegram-arnasynda turǵyndardyń jylý joqtyǵyna qatysty pikirleri kóbeıip ketken edi, al qazir turǵyndar kommýnaldyq qyzmetkerlerge alǵys aıtyp jatyr. Mysaly, tórt balanyń anasy, oblys ortalyǵyndaǵy 28-shaǵyn aýdan turǵyny Tilektes Ybyraeva: «Úı jyly. Basqa aýdandarda turatyn dostarymnan da suradym. Barlyǵynda jylý bar. Iá, keıbir úılerde adamdar áli kútip otyr, biraq kommýnaldyq qyzmetkerler turǵyndardy jylýmen tolyqtaı qamtamasyz etý jolynda kúni-túni jumys istep jatyr, menińshe, búgin-erteń jylý beriledi. Sondyqtan qaladaǵy turǵyndardyń bári jylýsyz otyrǵany jónindegi aqparattyń shyndyqqa janaspaıtynyn aıtqym keledi», dedi, Aqtaý qalasynyń turǵyny Alevtına Golovına: «Men 5-shaǵyn aýdanda turamyn. Bizdiń úıge 19 qazanda jylý keldi. Buǵan deıin aqaýlar boldy. Ol kezde apattyq brıgadalardyń olardy joıý maqsatta jumys atqaryp jatqanyn bárimiz kórdik. Anam kórshi úıde turady, olarǵa jylý bizden de erte berildi», deıdi. Al zeınetker Gúlmıra Isaeva bir apta shamasynda kútken soń qaladaǵy 19-shaǵyn aýdanǵa jylý berilgendigin, turǵyndarǵa aqaýlar joıylǵan boıda úılerine jylý birden keletini jóninde únemi qulaqtandyrylyp, qazirde páteri jyly ǵana emes, qatty ystyqtan terezelerdi ashyp otyrǵandyǵyn aıtty», deıdi Mańǵystaý oblystyq ishki saıasat basqarmasy aqparattyq saıasat bóliminiń basshysy R.Jubanazarov.
Bólim basshysynyń aıtýynsha, Mańǵystaý oblysy ákimdiginiń Telegram-arnasy turǵyndarǵa jelidegi aqaýlar men olardyń joıylý jumystary týraly aqparat alýǵa arnalǵan alańǵa aınalǵan. Turǵyndar ózderiniń mańaıyndaǵy aqaýlar týraly aqparatty jedel jiberý arqyly kommýnaldyq qyzmetkerlerge kómektesedi. Keıbir turǵyndar úıde jylý berilgenin, biraq keıbir páterde, tipti bólmelerde jylý joq ekenin jetkizip jatyr. Turǵyn úı-kommýnaldyq sharýashylyq salasynyń mamandary qazir ishki júıelerdi retteýdi qyzmet kórsetý uıymdarynyń qyzmetkerleri – OSI nemese KSK júrgizetinin atap ótti.
Aqtaý qalasy ákimdigi 26 qazanǵa qaraı áleýmettik nysandardyń 97%-y (115-tiń 112-si) jylýmen qamtamasyz etilgenin, al qaladaǵy 1500 turǵyn úıdiń 34-inde jylý joq ekenin habarlady.
– Jaz boıy negizgi jylý júıeleri aýystyryldy. Bul ótken jyldardaǵydaı jylý men ystyq sý berýde úzilis bolmaýy maqsatynda jasaldy. Jelilerdiń ábden tozýy saldarynan jóndeý emes, tolyq aýystyrý jóninde sheshim qabyldandy. Aýqymdy aýystyrý qazan aıynda aıaqtaldy. Osy ýaqytqa deıin qubyrlar qurǵaq bolǵandyqtan, synaqtardy ótkizý múmkin emes. Sý berilisimen ishki jelilerdiń tozýy 79% bolýyna baılanysty jarylystar bastaldy. Áleýmettik jelilerde qalany sýyq alyp jatyr degen shaǵymdardy jıi estımin. Úılerdiń basym kópshiligi jylýmen qamtamasyz etilgen. Apat bolǵan úılerde qazirgi ýaqytta jedel toptar aqaýlardy joıý jumystaryn júrgizip jatyr, – dedi Aqtaý qalasynyń ákimi Ábilqaıyr Baıpaqov.
Jylytý maýsymy bastalǵaly shaǵyn aýdandardaǵy jelilerde 121 jarylys tirkelip, onyń 100-i jóndeldi. Búgingi tańda aqaýlardy joıýda 110 adam men 49 tehnıka jumys istep jatyr. Aqtaý qalasynyń kommýnaldyq qyzmetkerlerine kómek retinde Jańaózen qalasynan 8 brıgada keldi. Turǵyndardyń úılerine jylý jetkizý jónindegi tótenshe jaǵdaı brıgadalary kúndiz-túni jumys isteıdi. Al qalalyq kásipkerler kommýnaldyq jumysshylardy qoldaý maqsatynda ystyq shaı men bálish usynady.
«О́zenmunaıservıs» mekemesiniń dánekerleýshisi Qazıhan Baıbozovtyń aıtýynsha, Aqtaýǵa Jańaózen qalasynan «О́zenmunaıservıs» kompanııasynyń segiz jumys toby kelgen. Olar jergilikti mamandarǵa ár shaǵyn aýdandaǵy jarylǵan jerlerdi joıýǵa kómektesip jatyr.
Aqtaýda qys qarsańynda qarbalas jumys. Qyr astyndaǵy qaharly maýsymnan qysylmaı, jaıly-kúıli shyǵý – barshaǵa qajetti jaǵdaı.
Mańǵystaý oblysy
