Qazaqstan Prezıdenti Qasym-Jomart Toqaev Sheteldik ınvestorlar keńesiniń 36-plenarlyq otyrysyna qatysý úshin Qazaqstanǵa kelgen Eýropalyq qaıta qurý jáne damý bankiniń basshysy Odıl Reno-Basso hanymmen kezdesti. Kezdesý barysynda Reno-Basso qor kompanııalary tobynyń satyp alý júıesi álemdik standarttar men tájirıbelerge saı ekenin atap ótti. Sonymen qatar halyqaralyq qarjy ınstıtýttary qordyń prosedýralaryna senim bildiretinin, bul olardyń ashyqtyǵyn kórsetetinin aıtty.
Astanada ótken Sheteldik ınvestorlar keńesiniń otyrysynda iri halyqaralyq kompanııalar men qarjy ınstıtýttarynyń basshylary bas qosty.
«Halyqaralyq qarjy ınstıtýttarynyń moıyndaýy jobalardy júzege asyrýdyń tıimdiligin arttyrýǵa jańa múmkindikter ashady», dedi «Samuryq-Qazyna» basshysy Nurlan Jaqypov EQQDB jáne Azııa damý banki (ADB) basshylarymen kezdesýde.
Eýropalyq qaıta qurý jáne damý banki qordyń energetıka, taý-ken, munaı-gaz jáne kólik salasyndaǵy jobalaryna qatysady. Sondaı-aq EQQDB Batys Qazaqstannyń elektr jelisin eldiń Biryńǵaı energetıkalyq júıesine qosý jobasynda basty ról atqarady. Azııa damý banki Samuryq-Energo, KEGOC jáne QTJ jobalary boıynsha qormen birlese jumys isteıdi.
Qordyń basqarma tóraǵasy satyp alý júıesi EQQDB jáne ADB-men jobalardy júzege asyrý barysynda halyqaralyq ozyq standarttar men tájirıbelerge saı dep tanylǵanyn atap ótti. Qor jyl saıyn satyp alý júıesin jetildirip otyrady, ári otandyq óndirýshilerdi qoldaýdyń jańa júıesi ázirlengen. Qoldaý sharalarynyń ishinde – satyp alynatyn taýarlar men qyzmetterdiń jergilikti úlesine qatysty kompanııa basshylary úshin KPI belgileý, offteık kelisimsharttar bar. Jergilikti quramnyń saqtalýy boıynsha taýarlar men qyzmetterdiń jetkizýshilerine baqylaý engizildi. Jańa óndiristerdi qurý baǵdarlamasyna da ózgerister engizilgen, ol jetkizýshilermen 20 jyldyq offteık kelisimsharttar jáne ınvestısııalar tartý maqsatynda kelisimsharttar jasaýǵa múmkindik beredi.
Sondaı-aq Nurlan Jaqypov keńes aıasynda iri kompanııalardyń top-menedjerlerimen ekijaqty kezdesýler ótkizdi. Atap aıtqanda, Eýropalyq qaıta qurý jáne damý banki, Azııa damý banki, «TotalEnergies», «Solidcore Resources», t.b. Atalǵan uıym ókilderimen seriktestik jaıy jáne aǵymdaǵy birlesken jobalar talqylandy.
Mysaly, «TotalEnergies» kompanııasymen qýaty 1 GVt bolatyn jel elektr stansasyn salý jobasy, «Wabtec»-pen lokomotıvterdi jetkizý jáne óndiristi Qazaqstanda ashý máselesi, «Solidcore Resources» kompanııasymen taý-ken salasyndaǵy jobalar taldandy.
* * *
«Samuryq-Qazyna» AQ – jıyntyq aktıvi 81 mıllıard AQSh dollarynan asatyn álemdegi 22-shi iri kompanııa. Sońǵy bes jylda qordyń arqasynda el ekonomıkasyna 24 mıllıard dollar kóleminde shetel ınvestısııasy quıyldy. Qordyń ınvestısııalyq portfelinde energetıka, logıstıka jáne kólik, munaı jáne gaz, kommýnıkasııalar, t.b. salalar boıynsha quny 100 mıllıard dollardan asatyn 130-dan astam joba bar.
* * *
Sheteldik ınvestorlar keńesi – Qazaqstan Prezıdentiniń janyndaǵy konsýltatıvtik-keńestik organ. Keńes «Samuryq-Qazyna» qorynyń uzaqmerzimdi seriktesteri «Total», «Eni», «CNPC», «Wabtec», «Solidcore», «Citi», EQQDB, ADB sııaqty 32 múshe jáne 7 baqylaýshydan turady. Negizgi mindeti – Qazaqstannyń ınvestısııalyq saıasatynyń basty baǵyttaryn aıqyndaýǵa, ınvestısııalyq klımatty jaqsartýǵa jáne eldik ınvestısııalar týraly normatıvtik-quqyqtyq bazasyn jetildirýge arnalǵan usynystar men usynymdardy ázirleý.
Táńirbergen ARǴYN
