Basymyzdan tymaǵymyz sypyrylyp túskenshe osynaý ǵajaıyp kóriniske uzaq qaradyq. Eń sońǵy saıaq, shaban-shalaptary qalanyń aq túbit aspanyna sińip ketkenshe tapjylmaı, olardy kózben uzattyq.
Bala ne oılaǵanyn qaıdam, al men úshin taǵy bir jyl ketip bara jatqandaı, qanatyna qýanysh pen qaıǵyny baılap alyp... Qustar sýsyldaǵan qanatynan merýert-marjan shashyp barady.
Jansúgirdiń balbul janǵan júzinde bul kóriniske degen tańǵalý bar. Ne qubylys ekenin tezirek bile qoıǵysy kelgen shyraı bilinedi.
– Áke, – dedi ol, – qustar qaıda ketip barady?
– Jyly jaqqa.
– Olar qaıta kele me?
– Keledi, balam. Kóktemde kún jylynǵanda qaıta kelip, osy jaqqa uıa salady.
Ol sál oılanyp turdy da, tosyn saýal qoısyn:
– Olar nege osylaı (kishkentaı eki qolynyń basyn túıistirip, úshburysh jasap) ushady?
– Sebebi qustar jyly jaqqa jetý úshin alys-alys jol júredi. Kólden ótedi, shólden ótedi, neler bıik belden ótedi, sol jolda qanaty talmas úshin úshburyshtalyp ushqanda aýa tez «tilinedi». Ár qus jeke-jeke ushsa, alys saparda qanaty talyp, dittegen jerine jete almaı qalady. Úshburysh jasap ushý – jolda (áýede) kezdesetin jel, daýyl, jaýyn-shashyn sekildi kedergilerdi jumyla eńserýge qolaıly. Bul – Tabıǵat-ananyń úıretken tásili eken.
Jaýabym jalyqtyryp jiberdi me, álde qanaǵattandy ma, bilmeımin, bala júgirip oınap ketti. Meniń esime qazaqtyń «Qaıtqan qaz qulabyzsyz bolmas» degen máteli oraldy. Iá, qaıtqan qustyń úshburyshynda top bastaǵan qusty qulabyz deýshi edi.
* * *
Birde redaksııanyń aldynda taza aýa jutyp tur edik. – Baıqaısyz ba, bizdiń redaksııadan shyǵarmashylyq atmosfera sezilip turady, – dedi bir áriptesim. – Keıde Almatydaǵy Jazýshylar odaǵynyń tarıhı ǵımaraty tárizdi, jylylyq sezinemin.
Ras, sondaı bir jylylyq bar. Ne degenmen Sherhan, Ábish, Aqseleý sekildi alyptardyń aıaǵy tıgen, odan keıin de qalamger men ǵalymnyń izi qalǵan jer emes pe. Al maǵan bul joly tipti ystyq sezildi osy mań. Sebebi biz jaqsy kóretin, janashyrlyqpen jazatyn qustar redaksııanyń qaq tóbesinen «Rahmet, dostar! Qaıta jetkenshe aman bolyńdar» dep ushqandaı edi...
