Is-sharaǵa ýnıversıtettiń ǵylym jáne korporatıvtik damý jónindegi prorektory Erjan Kóldeev, «Coca-Cola İçecek Kazakhstan» kompanııasynyń kommýnıkasııalar jáne turaqty damý jónindegi basshysy Alına Abıleva, sondaı-aq «Jasyl ekonomıka jáne G-Global-dy damytý koalısııasynyń» bas menedjeri Asyl Oqapova qatysyp, qorshaǵan ortany qaldyqtardan tazartý, plastık buıymdardy qaıta óńdeý arqyly ekologııany qorǵaý sharalaryna qatysty máselelerdi qozǵady.
«Ýnıversıtettiń 90 jyldyǵy men Qanysh Sátbaevtyń týǵanyna 125 jyl tolýyna oraı ýnıversıtet stýdentteri qoǵamǵa mańyzdy is-sharalarǵa qatysyp, qorshaǵan ortany qorǵaý men «jasyl» ekonomıkany damytýǵa úles qosyp jatqanyn atap ótkimiz keledi. Al plastık qaldyqtardy qaıta óńdeý bastamasyn ýnıversıtet stýdentteri birinshi bolyp qolǵa alyp otyr», dedi Erjan Kóldeev.
Bastama aıasynda plastıkti qaıta óńdeý jáne odan jańa ónim jasaý jóninen sheberlik saǵaty ótti. «3.2.1.Start!» jeńimpazy jáne plastıkti qaıta óńdeıtin «Rocket Plastic» jobasynyń jetekshisi Danııar Bakımov ýnıversıtet stýdentterimen birlese otyryp, qaldyqtardan jańa ónim jasaý ádisterin kórsetti. Osy jyly «Rocket Plastic» jobasy aıasynda 20 tonnadan astam plastık qaıta óńdelgen.
Bıyl «3.2.1.Start!» jobasynyń 8-maýsymy barysynda ótken «Plastıkti jınaý jáne qaıta óńdeý jónindegi úzdik model» respýblıkalyq baıqaýynda Q.Sátbaev ýnıversıteti 1-oryndy ıelengen bolatyn. Byltyr bul jobaǵa 10-nan asa joǵary oqý ornynyń stýdentteri qatysyp, 17 tonnadan astam plastık qaldyqtardy jınady. Q.Sátbaev ýnıversıtetiniń komandasy 7,7 tonna qaldyq jınap, plastıkti qaıta óńdeýdiń eń úzdik modeline qol jetkizgen-di.
Memorandýmǵa qol qoıý nátıjesinde yntymaqtastyqty odan ári keńeıtý, oqytý semınarlaryn, forýmdar, baspasóz konferensııalaryn ótkizý josparlanyp, jastardyń «3.2.1 Start!» bastamalaryn qoldaýǵa baılanysty tyń ıdeıalardy birlesip júzege asyrýdyń mańyzy týraly aıtyldy. Bul kelisim ýnıversıtet stýdentteri iske asyryp otyrǵan qaldyqtardy qaıta óńdeý bastamalaryn ári qaraı jalǵastyrý men tıimdiligin arttyrýǵa yqpal etetin bolady.
ALMATY
