Atap aıtsaq, Aldarkóse Shyqbermes Shyǵaıbaımen nemisshe sóılesip, aılasyn asyryp tur. Tapqyr Aldardyń ózi de, salǵan áni de, nemis balalaryna tańsyq dúnıe ekeni anyq. Genzel men Greteldi, Qyzyl telpek pen Rapýnseldi jattap ósken balaqaılar Aldarkóseniń ár amalyna erekshe nazar aýdardy. Qazaq mádenıetimen endi tanysyp jatqan eresekter de is-sharanyń mańyzdylyǵyna basa mán berip, elimizge saıahattap kelýge qyzyǵýshylyǵynyń artqanyn aıtty.
«Osyndaı mádenı is-sharalardyń biz úshin mańyzy zor. Biz Selendorf aýdany bolyp bas qosyp, ózge mádenıetterdiń ozyq týyndylaryna kýá bolyp otyrmyz. Mundaı is-sharalar oı bostandyǵyna jeteleıdi. Kúndelikti kúıbeń tirshilikten bir sát demalyp, jańa ıdeıalarǵa qol jetkizýge bolady. Osy ýaqytqa deıin Qazaqstanda bolyp kórmep edim, endi aldaǵy ýaqytta saıahattap barsam ba degen oı kelip tur», deıdi Shteglıs-selendorf aýdanynyń býrgomıstri Maren Shellenberg.
«Bul jıynnyń uıymdastyrylýyna qatysýshy elder men Germanııanyń Syrtqy ister mınıstrligi ókilderi zor úlesin qosty. О́te salmaqty deńgeıde ótip jatyr. Men Islam mádenıeti men Ortalyq Azııany zertteıtin maman retinde osyndaı, balalar tárbıesinde qoldanylatyn Qojanasyr men Aldarkóse obrazdary erekshe qyzyq mysaldar dep baǵalar edim. Biz úshin bul obrazdardy Germanııa balalaryna jaqyn ete túsý zor jetistik. Sebebi ár oqıǵanyń ózindik tárbıelik máni, aıtar aqyly bar», deıdi Cultur Cooperation uıymynyń ókili Katlın Gıobel.
Atalǵan jıyn barysynda qoıylymdardan bólek kórermenge nemis sýbtıtrimen Sh.Aımanovtyń «Aldarkóse» fılmi men «Aldarkóse» anımasııalyq serııalarynan úzindi kórsetildi. Ulttyq mýzykalyq aspaptardan án men kúı tógildi. Kórshiles eldermen qatar qolóner buıymdary kórmesi uıymdastyrylyp, qazaqy dastarqan jaıyldy.
Sondaı-aq Aldarkóseden bólek Ortalyq Azııa men Jerorta teńizi – Balqan aımaǵy halyqtarynyń ertegi keıipkerleri de sahnaǵa shyqty.
