Sýret: ru.freepik.com
- Belgili kásipker Erlan Qojasbaı jýyrda ǵana Albanııanyń astanasy – Tıranada olımpıadalyq emes salmaq dárejeleri boıynsha ótken álem chempıonatynda erkin kúresten 70 kg salmaqta bas júldeni oljalaǵan Nurqoja Qaıpanovqa ZEEKR kóligin syıǵa tartty.
- Uzaq jyldar aýyr atletıkadan elimiz quramasynyń bas bapkeri bolǵan Alekseı Nı ǵumyr boıy úlken sporttan shettetildi. Sol mamannyń basshylyǵymen birqatar otandyq ziltemirshi Olımpııa oıyndarynda altyn medaldy ıelengen edi. Biraq keıinnen olardyń dopıng qoldanǵany anyqtalyp, barlyǵy da óz ataqtarynan aıyryldy.
- Bıyl fýtboldan el birinshiliginde kósh sońynda qalyp qoıǵan Qaraǵandynyń «Shahteri» óz tarıhynda alǵash ret premer-lıgada oınaý quqyǵynan aıyryldy. Soǵan narazy bolǵan oblys ákimi Ermaǵanbet Bólekpaev jattyqtyrýshylar quramyn tolyqtaı ózgertti. Endi kenshiler qalasynda jasaqtalǵan komandany kezinde Londonnyń «Chelsıi» men Máskeýdiń «Spartagynda» oınaǵan chehııalyq maman Irjı Iаroshık baptaıdy. Sondaı-aq aldaǵy ýaqytta Qaraǵandyda ÝEFA-nyń standartyna saı jańa stadıon salý josparlanyp otyr.
- Daryndy ústel tennısshisi Jánııa Bekmuhambetova Majarstannyń Sombatheı qalasynda ótken halyqaralyq týrnırde eki júlde jeńip aldy. Alǵashynda ol 13 jasqa deıingi oıynshylar arasynda tek taıpeılik Lı Djen-Iýege ese jiberip, qola medaldy ıelense, ile-shala 11 jastaǵylardyń jarysynda baq synady. Bul dodada qazaq qyzy qarsylas shydatpady. Majarstandyq Sara Sondı (3:0), ıspanııalyq Lora Ýrıa (3:0), ýkraınalyq Aleksandra Bes (3:0), ıspanııalyq Djýlııa Fernandes (3:1), Karmen Gomes (3:0), rýmynııalyq Bıanka Tomadan (3:0) basym túsken Jánııa bas júldeni oljalady.
- Erteń Shveısarııanyń Bern qalasynda semserlesýden Álem kýboginiń kezeńdik saıysynyń shymyldyǵy túriledi. Bul jarysta Elmır Álimjanov, Aleksandr Fedotov, Erlik Sertaı, Alekseı Kasatkın, Rýslan Qurbanov, Vadım Sharlaımov, Bogdan Lýkın, Kırıll Pavlov, Georgıı Tınnıkov, Nıkıta Jýlınskıı óner kórsetedi. Al quramynda Vladıslava Andreeva, Lázzat Qarypova, Karolına, Krıstına Fomına, Vıktorııa Qaıdarova, Sofııa Nıkolaıchýk, Natalıa Zınıakova syndy burymdylary bar elimizdiń áıelder quramasy BAÁ-niń Fýdjeırasynda óner kórsetedi.
- Keshe Reseıdiń Sankt-Peterbýrg qalasynda shaıbaly hokkeıden «Bolashaq kýbogi» bastaldy. 10 qarashaǵa deıin sozylatyn týrnırde elimizdiń jastar quramasy Belarýs komandasy jáne aıdyn ıelerimen sheberlik baıqasady.
- Reseıdiń ASA lıgasynda kúsh synasyp júrgen jartylaı orta salmaqtaǵy Artem Reznıkov óziniń kelesi jekpe-jegin 15 jeltoqsanda Máskeýde ótkizedi. «Spartak» degen janama esimdi tańdaǵan otandasymyz sheshen sportshysy Iýsýf Raısovpen aıqasady.
