Is-shara elimizdiń birinshi Qorǵanys mınıstri Saǵadat Nurmaǵambetovtiń bıýstine gúl shoqtaryn qoıyp, batyrdy bir mınýt únsizdikpen eske alýymen bastaldy. Halyq qaharmany, otstavkadaǵy general-leıtenant Baqytjan Ertaev jıyndy ashyp, osy jyldar ishinde 1 700-den asa túlek shyqqan bilim ordasynyń qurylý tarıhy týraly aıtty.
Qorǵanys mınıstriniń orynbasary, general-maıor Shaıh-Hasan Jazyqbaev áskerı kolledj el Qarýly kúshteriniń kishi býyn komandırlerin daıarlaýdyń negizgi ordasy dep atap ótti.
«Bólimshelerdegi áskerı tártiptiń jaǵdaıy, jaýyngerlik daǵdylar men jeke quramnyń moraldyq-jaýyngerlik rýhy serjanttardyń kásibıligine baılanysty. Kolledj qabyrǵasynda alǵan sapaly bilim men sanaly tárbıe – túlekterimizdiń senimdi bolashaǵynyń bastaýy», dedi ol.
Ataýly kúnge oraı general-maıor Shaıh-Hasan Jazyqbaev áskerı kolledj bastyǵy polkovnık Ǵazız Tóleýshevke Qorǵanys mınıstriniń atynan Alǵyshat tabys etti.
Kolledj ujymy men onyń túlekterin 25 jyldyǵymen Qarýly kúshterdiń ardagerleri otstavkadaǵy general-maıor Álıhan Jarbolov pen otstavkadaǵy general-leıtenant Abaı Tasbolatov ta quttyqtady. О́z kezeginde «Qarýly kúshterdiń ardagerleri» RQB tóraǵasynyń orynbasary, otstavkadaǵy general-maıor Marat Naǵumanov kolledj oqytýshylary maıor Baqbergen Serikbaev pen Kúnsaı Nurǵalıevaǵa «Saǵadat Nurmaǵambetovke 100 jyl» medalin tabys etti.
Áskerı oqý ornynyń alǵashqy túlekteriniń biri, Áskerı-áýe kúshteri qolbasshysy basqarmasynyń aǵa ofıseri, podpolkovnık Almat Aqysh «Jas ulan» respýblıkalyq mektebine 1999 jyly túskenin jetkizdi.
«Munda ótkizgen jyldardy árdaıym erekshe saǵynyshpen eske alamyn. Birinshi kezekte tártipke úırendik. Otan aldyndaǵy boryshqa berik bolý jáne patrıottyq degenniń ne ekenin bildik. Meniń túsinigimdegi patrıotızm – tek jarǵy, marsh jáne sapta turý ǵana emes, bul óz elińniń aldyndaǵy jaýapkershilik sezimi, óz úıińdi qorǵaýǵa daıyn bolý. Áskerı bilim maǵan úlken ómirge joldama berdi. Bul úshin men pedagogter ujymyna alǵysymdy bildiremin», dedi A.Aqysh.
Aıta ketsek, kolledjdi bitirgen túlekter birden áskerı qyzmetke jiberiledi. Arasynda oqýdy jalǵastyrýǵa sheshim qabyldaǵandar da bar. Bıyl kolledjdi 82 kýrsant bitirdi.
Is-shara Ulttyq áskerı-patrıottyq ortalyǵynyń shyǵarmashylyq ujymy daıyndaǵan merekelik konsertpen aıaqtaldy. Esterińizge sala ketsek, armııa generaly Saǵadat Nurmaǵambetov atyndaǵy áskerı kolledj 2021 jyly Astanada «Jas ulan» respýblıkalyq mektebiniń bazasynda qurylǵan. Oǵan birtýar tulǵa Saǵadat Nurmaǵambetovtiń esimi 1999 jyly berilgen.
