Sýretti túsirgen – Jumabaı MUSABEKOV
Buryn oryn alǵan bylyqtyń Jetisý oblysyna qatysy joq desek te, atalǵan nysandar Taldyqorǵannyń kire-berisinde ornalasqandyqtan, jaýapkershilik jergilikti bılikke júkteledi. Sondyqtan oblys ákiminiń bastamasymen shaǵyn qalashyqtyń qurylysyn tolyq aıaqtap, kezekte turǵan kópbalaly ata-analarǵa berý josparlanǵan. Jaqynda Sybaılas jemqorlyqqa qarsy is-qımyl agenttigi Jetisý oblysy boıynsha departamentiniń basshysy Saıan Ahmetjanov pen qala basshysy Ernat Bázil qurylys jumystaryn baryp kórip, pysyqtap qaıtty. Turǵyndarǵa tapsyrylatyn úılerden taǵy bir shıkilik shyqpaý úshin jaýapty mamandar barynsha tekseris júrgizip jatyr.
«Bul úılerdiń máselesi búginde kún tártibinde tur. О́tken jyldan beri sapasyz qurylys júrgizgen merdiger kompanııa, jaýapty memlekettik qyzmetkerlerdiń ústinen qylmystyq is qozǵalyp, biraz adam jaýapqa tartyldy. Qoldy bolǵan qarjy memleket esebine qaıtaryldy. Osydan keıin qurylysy aıaqtalmaı turǵan 204 úıdi qaıta qalpyna keltirý jumysy qala ákimdiginiń quzyryna berildi. Jyl basynan beri qaıtadan memlekettik saraptama jasalyp, 600 mln teńge qarjy bólinip, 97 úıdiń qurylysyn eki kompanııa qarqyndy júrgizip jatyr. Qalǵan úılerdi kelesi jyldyń qyrkúıek aıyna deıin aıaqtaımyz», dedi E.Bázil.
Jalpy, qalashyq týraly turǵyndardyń aryz, ótinishi oblys ákiminiń de, qala ákiminiń de turǵyndarmen kezdesýinde, esepti jıyndarda jıi aıtylyp júrdi. Oblys ákimi Beıbit Isabaevtyń tapsyrmasyna oraı qala ákimdigi osy kúlbilteli máseleni sheshýge bilek sybana kiristi. Qazir bul jerde qurylysy bitpegen 204 úıdi qaıta jóndeý jumysy qaýyrt júrip jatyr. Buıyrtsa, aldaǵy 15 qarashaǵa deıin 25 úı, jyl sońyna deıin 72 úı tolyq jóndelip, turǵyn úı kezeginde turǵan kópbalaly, turmysy nashar otbasylarǵa úlestirilmek. Qalǵandary kelesi jyly el ıgiligine beriledi.
Kottedjdi qalashyqtyń áý bastaǵy josparyna sáıkes bul jerde 2 mektep salynýy kerek bolatyn. Alaıda byltyr 1200 orynǵa arnalǵan №30 orta mektep salynyp, qazir onda 900-ge jýyq bala bilim alyp jatyr. Jyl sońyna deıin beriletin 97 úıge qonystanatyn otbasylardyń oqý jasyndaǵy balalaryn qosa eseptegende, osy mekteptiń josparlanǵan júktemesi oryndalady. Sondyqtan mektep qurylysy salynady degen ekinshi jer telimine keler jyly 3 qabatty turǵyn úıler salý josparlanyp, jobalyq-smetalyq qujaty daıyndalyp, qarjysy da sheshilgen.
«Bastapqyda bul jerde 3 qabattan da bıik úıler salýdy oılastyrǵanbyz. Alaıda qalashyqtyń kelbetin eskerip, osyndaı sheshimge keldik. Bul jospardy da tolyǵymen oryndaımyz», deıdi qala ákimi.
Qurylys salasyndaǵy sybaılas jemqorlyqtyń saldary halyq arasynda áleýmettik shıelenisti týdyratyny anyq. Jergilikti atqarýshy organdar tarapynan qurylystyń sapasyz salynýy, bıýdjet qarajatynyń tıimsiz jumsalýy – jıi oryn alatyn jaǵdaı. Sondaı-aq ýádeni úıip-tógip, ony oryndamaı ketý burynǵy jyldary jıi ushyrasatyn. Saldarynan halyq qurǵaq ýádelerden ábden jalyǵyp, kóńilderine senimsizdik uıalaıtyn. Endigi jerde osyndaı jaǵdaıdy boldyrmaýdy Sybaılas jemqorlyqqa qarsy is-qımyl agenttiginiń mamandary basty nazarǵa alyp, baqylaýda ustamaqshy.
«Kottedjdi qalashyqtyń jaǵdaıy – turǵyndardyń kókeıinde júrgen másele. Osy keleńsizdikti túbegeıli sheshý oblystaǵy táýekel kartasyna engizildi. Sondyqtan bul qurylystyń jasalýy, aıaqtalýy, sapasy bizdiń únemi baqylaýymyzda bolady. Bıyl 97 úı bitip, baspana kezeginde turǵan kópbalaly analarǵa, turmysy tómen otbasylarǵa, jetim balalarǵa beriledi. Bul atqarýshy organnyń jumysy bolǵanymen, muny da nazarymyzda ustaımyz. Salynyp jatqan úılerde jumys sapaly júrip jatyr. Degenmen úı tapsyrylǵannan keıin taǵy da kemshilikter anyqtalyp jatsa, merdiger kompanııa kez kelgen ýaqytta ony rettep beretin bolady. Burynǵy jyldary qatelikter kóp ketti. Endigi maqsatymyz – sol qatelikterdi qaıtalamaý jolynda birlesip jumys isteý», deıdi S.Ahmetjanov.
Búginde 97 úıdiń qurylysyn «Stroy ort» JShS, «Amırjan company» JShS júrgizip jatyr. Aıta keterligi, kezinde bul úılerdiń 70–80 paıyz qurylys jumysy aıaqtalǵan. Biraq birneshe jyldan beri qaraýsyz qalǵandyqtan, sý, gaz, jaryq jelileri búlinip, úıdiń esik-terezesi synǵan, ishine ornatylǵan qurylǵylar tonalǵan.
«Qazir tozyp ketken sý, gaz, jaryq jelileri qalpyna keltirilip, búlingen esik-terezeler, úıdiń taǵanyna tóselgen materıaldar tolyq jańalandy. Pesh ornatylyp, batareıalar tazalandy. 15 qarashaǵa deıin 25 úı daıyn bolady», deıdi merdiger kompanııa ókili.
Almaty oblysy ekige bólinbeı turyp bolǵan jaǵymsyz jaıt qaıtalanbas úshin jergilikti bılik qurylys ornyn kózden tasa qylmaq emes. Halyqqa bergen ýáde Qudaıǵa bergen ýádemen birdeı. Biz qala basshysynan «Aldaǵy ýaqytta eshqandaı kedergi shyqpaı ma?» dep qaıyra suraǵanymyzda, jyl sońyna deıin 97 úı tolyq bitip, baspanaǵa zárý otbasylar úıli bolatynyn nyq senimmen jetkizdi.
Jetisý oblysy
