Sýret: ru.freepik.com
«Jambyl oblysynyń mamandandyrylǵan tabıǵat qorǵaý prokýratýrasynyń aralasýynan keıin Jambyl, Rysqulov, Moıynqum, Qordaı aýdandarynda qaldyqtardyń paıda bolýy men jınaqtalý normalaryn bekitý máseleleri boıynsha tıisti aktiler, sondaı-aq Jýaly, Talas, Rysqulov aýdandary men Taraz qalasynda tarıfterdi bekitý sharalary qabyldandy. Júrgizilgen jumystyń qorytyndysynda stıhııalyq qoqys úıindileri úshin 9 aýdan ákiminiń orynbasary men aýyldyq okrýg ákimderi ákimshilik jaýaptylyqqa tartyldy. Budan basqa, prokýratýranyń qaldyqtardy durys esepke almaý derekteri boıynsha qadaǵalaý aktisimen Jambyl oblysynyń bas memlekettik ekologııalyq ınspektorynyń mindetin atqarýshy tártiptik jaýapkershilikke tartyldy», delingen resmı málimette.
Derekke sensek, elimizde jyl saıyn 5 mln tonnaǵa jýyq turmystyq qaldyq shyǵarylady. Onyń shıregine jýyǵy ǵana óńdeledi. Sonda qalǵan qoqys qaıda shashylyp jatyr?
Jyl basynda jergilikti BAQ-ta almanııalyq «AMK Global GmbH» kompanııasy Taraz qalasynda turmystyq qatty qaldyqtardy qaıta óńdeýden ótkizetin zaýyt salýǵa nıetti degen aqparat tarady. Tipti bul máselege óńir basshysy Erbol Qarashókeev te aralasqan. «ThiemeBieg & Associates GmbH» konsorsıýmynyń bas dırektory Tıme Torstenmen kezdesýde atalǵan jobany júzege asyrý máselesi talqylanǵan.
«Kezdesý barysynda ınvestorlar kompanııa men jobalary týraly jan-jaqty aqparat berdi. Táýligine 500 tonna qoqys óńdeýge qýatty zaýyt 100 jańa jumys ornyn qurýǵa múmkindik beredi. Kompanııa jobany iske asyrý úshin 140 mln eýro ınvestısııa salýdy josparlap otyr. Mıýnhen ýnıversıteti ázirlegen ozyq tehnologııalardy paıdalanatyn «AMK Global GmbH» kompanııasy qaldyqtardyń 80 paıyzyna deıin qaıta óńdeýden ótkizedi. Sondaı-aq kásiporynda qoqysty suryptaý boıynsha avtomatty jeli iske qosylady. Munda ottegi, azot, kompost, kómirtekti talshyq jáne taza avıasııalyq otyn sekildi janama ónimder óndirisin jolǵa qoıý josparlanady. Jalpy, kásiporyn qýattylyǵyn kezeń-kezeńimen arttyrý polıgondaǵy qaldyqtardy tasymaldaý men olardy qaıta óńdeýge múmkindik beredi dep kútiledi. Aıta keteıik, nemis kompanııasynyń ókilderi jumys sapary aıasynda oblys ortalyǵyndaǵy polıgonǵa arnaıy baryp, tanysyp qaıtty. Erbol Qarashókeev ınvestorlarǵa memleket tarapynan kórsetiletin jeńildikterdi túsindirip, jobanyń mańyzdylyǵyn atap ótti», dep málimdedi sol kezde jergilikti BAQ.
Bul jańalyqty estip, óńirdegi ahýal retke keler dep úmittengen edik. Biraq jyl basynan keıin bul áńgime umyt qalǵan sekildi.
«Qoqys óńdeıtin zaýyt – óte mańyzdy nysan. Biz qorshaǵan ortany qorǵaýǵa baǵyttalǵan jobalardy qoldaımyz. Endigi másele – atalǵan zaýyt qurylysyn tezdetip bastap, naqty iske kóshý. Bul rette qala basshylyǵy men salalyq basqarmalar kompanııamen tyǵyz baılanysta bolyp, jobany tolyq súıemeldeýi qajet», degen edi óńir basshysy jyl basynda.
Qalaı desek te, Jambyl oblysyna qoqysty qaıta óńdeıtin zaýyt kerek ekeni anyq. Jyl basynda áp-ádemi bastalǵan zaýyttyń taqyryby áńgime kúıinde qalyp ketken joq pa degen oı keledi. О́ıtkeni qyrkúıek aıynda jyl ishinde atqarylǵan jumystardy jipke tizgen óńir basshysy ınvestısııalyq jobalar, salynyp jatqan zaýyttardyń birqatarynyń atyn atap, túsin tústegenimen, qoqys óńdeıtin zaýyt týraly jaq ashpady.
Jyl basynda aıtylǵan joba umyt qalǵan joq pa? Jaýapty basqarmalardyń basshylary men ózge de jaýapty tulǵalar qoqys óńdeý zaýytynyń qurylysy qashan bastalatynyn óńir basshysyna aıtpaǵan ba? Álde óńir basshysynyń tapsyrmasyna nemquraıly qarap júr me? Kim bilsin. Zaýyt týraly ákimniń baıandamasynda aıtylmaǵanyna qaraǵanda, qurylystyń aýyly alys sııaqty...
Jambyl oblysy
