Úkimet

Otyrardaǵy Andreı bekire ósirip jatyr Baqtııar TAIJAN,   Kozlov Pavel. Lohov An­dreı. Ekeýi de kásipker. «Fa­mı­lııalary onsha emes eken» dedi qasymdaǵy kisilerdiń biri ázildep. Áı, qaıdam, «famılııasy onsha emes» osy eki dos áli-aq Qazaqstanǵa belgili kásipkerler bolady. Dep oıladyq. Otyrar aýdanynda 20-25-teı ulty orys otbasy bar. Qazaqqa ábden sińgen, qazaqsha oqyǵan, qyz bergen qudandaly. Paveliń qazaqsha máteldetip sóılegende ózińdi jańyldyrady. Talapty aýyl okrýgine qarasty Sary­kól aýylynda turady. Es bilip, etegin japqannan kól jaǵalap, uzaqty kún balyq aýlap ósken sary jalaq uldyń armany asqaq. Oryndalmaıtyndaı emes. Úlken bıznestiń negizin qalap ta qoıǵan. – Men ózim Akademııalyq medısı­na­lyq ýnıversıtetti bitirgenmin, – deıdi Pavel. – Biraq, bir orynda baıyz taýyp otyra almaıtyn ádetim bar, istiń adamymyn. Bıznespen aınalysyp Qytaı, Túrkııa arasynda kóp júrdim. Qalalyq bola almaıdy ekenmin. Aýyl, Sarykól tartty da turdy. Qandaı kásippen aınalasý kerek degende ońtaıyn taptym. Sarykóldiń bergi bóliginde balyq sharýashylyǵyn qurýǵa, baý-baqsha egýge jáne mal bordaqylaýǵa múmkindik bar eken. Onyń ústine Elbasy aýyl sharýashylyǵyn qoldap, ár jasaǵan jumysqa sýbsıdııa berip jatyr. Taı-qulyndaı tebisip ósken dosym Andreıde tehnıkanyń túr-túri bar. Mende de bıznesten jınaǵan qarjy jetedi. Aıttym. Ol kóndi. Ekeýmiz birlesip jaıylym bolǵan 212 gektar jerdi satyp aldyq. Aýdan ákimi Salhan Po­la­tovqa rahmet, Ideıamen bar­ǵa­nymyzda ár jaǵyn aıtqyzbaı túsinip, barlyq kómekti jasaımyz dedi. Ári qaraı Pavel men Andreıdiń ne istegenin tyń­dańyz. 212 gektar jerdiń 50 gek­tarynyń maqsatyn aýystyryp, balyq sharýashylyǵymen aınalysý úshin úlken toǵan salyp, sýmen toltyrady. Ber jaǵyndaǵy 50 gektar jerdi baý-baqsha egýge daıyndap qoıǵan. О́zbekstanda Shreder atyndaǵy ǵylymı-zertteý ıns­tıtýtynan tórt túrli sortty 6 myń túp alma aǵashyn ákelgen. Tamshylatyp sýarylady. Pavel óz úıindegi shaǵyn basseıinderde karp tuqymdas balyq shabaqtarymen birge bekire ósirip jatyr. Pavel men Alekseıdiń alǵa qoıǵan jos­pary úlken. 50 gektar jerge toǵan qazyp sý shyǵarǵan. Ber jaǵyndaǵy 50 gektar jer máýesi tógilgen baý-baqsha bolady. 212 gektar jeriniń bir ıini myńnan asa iri qara mal bordaqylanatyn ortalyqqa aınalmaq. Salynyp jatqan ınvestısııa kólemi 900 mln. teńgeden asady. Pavel aıtady. Myltyǵyn qyl­tyń­datyp qyrǵaýyl taýyp ber deıtinder kóp. Kóńilin qımaımyn. Qalyń qorysqa kire almaıdy. Men 10 gektar jerge qyr­ǵaýyl ósirmekpin. Qyr­ǵaýyldan bólek qoıan, jabaıy shoshqa jiberiledi. Qazir «koroldik» dep atalatyn jıyrmashaqty ań qaǵatyn ıtterdi ósirip jatyrmyn. Osy on gek­tar aýmaqta ıt baýlaıtyn stansa bolady. Ańqumarǵa ańshy ıt qosyp beremiz. Ań qaǵatyn ıt qus pen ańǵa jaqyndaǵanda qalt toq­tap, daıyndal degen belgi be­re­di. Buıyrǵan nesibe óziń­diki. Osy kezde áńgimege aýdan ákimi Sa­lyhan Polatov aralasqan. – Bul ózi órkenıetti elderdiń bárine tán jaǵdaı. Bizge de jetti. Bir buǵy, maraldyń atý baǵasy myń dollarǵa deıin. Nesi bar, júz jabaıy shoshqa ósirse jylda jıyrma-otyzyn belgili bir mólsherdegi aqshaǵa atqyzýǵa berýge bolady. Qyrǵaýyl, qoıan da solaı. Ári ańshynyń myl­tyǵy qandanyp, kóńili toıat­taıdy. Ári seriktestiktiń bız­nes­ti órkendetýge qarjysy kó­beıedi. Pavel men Andreıdiń soqqan toǵa­nynyń jaǵalaýyn kórdik. Sýǵa emin­dire balyq aýlaıtyndar alańqaılar qal­dyrylǵan. – Bul jerge eldiń qaltasyna qaraı demalys oryndaryn salamyz, – deıdi olar. – Birinde sýy, ájethanasy ishinde bes-on adam sııatyn kotedj salynady. Otbasymen demalýǵa, ıakı dostary­men birlesip kelgenderge. Endi bir alańqaılarda qara úı tigemiz. Úndisterdiń vıgvamy sekildi lashyqtar da salý oıda bar. Ekzotıka. Ekotýrızm. Kim qaltasyna qaraı qaısysyn tańdaıdy. Balyq aýlasyn. О́zderi pisirem dese jaǵdaı bar, bolmasa bizdiń aspazdar daıyndap beredi. – Qarp tuqymdas balyqtar úshin alańdamasa da bola­dy, ýyldyryǵy altynǵa baǵa­la­natyn bekireniń jaıy qalaı, jersine me? – Sonaý bir jyldary Sa­rykólde balyq sharýa­shy­lyǵy dúrildep turǵanda bekire ósirilgen. Adamdar túk qoımaı súzip aldy ǵoı. Men úıdegi basseınderde karp tuqymdastardyń da, bekireniń shabaqtaryn da ósirip jatyrmyn. Ártúrli temperatýrada baıqap kórdik. Bekire ýyldyryq shashqannan keıin sýyqta kól túbinde damyldap jatady. Biz toǵannyń bir tusyn tereńdetip qazyp, oǵan ystyq sý jiberip turamyz. Qudaıǵa shúkir, bizde jerdiń astynan qaınap shyǵyp jatqan termaldy ystyq sý bar. Onda bekireden jyl boıyna ýyldyryq aýlaýǵa bolady. Onyń syrtynda ózimizdiń ekken bıdaı, júgerimiz bar. Iаǵnı syrttan jem satyp almaımyz. Maqul, Pavel men Andreı, ekeýiniń iskerligine sengen ınvestor osy úlken sharýaǵa úlken qarjy saldy. Memlekettiń járdemi qaısy?! Bul túıindi aýdan ákiminiń birinshi orynbasary Ábdiǵanı Júnis tarqatyp berdi. Birinshiden, elý gektar jerge egilgen baý úshin ketken shyǵynnyń 50 paıyzyn memleket ótep beredi. Alma ónim beretin úsh jylǵa deıin bul jigitterińiz memleket esebinen bir shyǵynynyń ornyn jabar eken. Ári qaraı taza óniminiń paıdasy ózderiniki. Mine, memlekettik bıznesti yntalandyrý. Balyq sharýashylyǵynda da osy. Toǵan qazǵan úshin tólenedi, balyq tuqymyn kóbeıtkeni úshin tólenedi. Qyl aıaǵy myń basqa salǵan sıyr qoranyń da jarty shyǵynyn memleket qaltasy jabady. Endi ne iste deısiz?! Pavel men Andreı ultymyz bóten, qazaq emespiz demeıdi. Elim dep sóıleıdi. Áli otyzǵa da tolmaǵan eki sary jigit ishinde ekotýrızmi bar úlken salany qolǵa aldy. Oblys, aýdan ákimdigi bar kómekti berip otyr. Bekireniń sorpasyn ańsap, ýyldyryǵyn asap jegińiz kelse Otyrarǵa kelińiz.   «Egemen Qazaqstan».Ońtústik Qazaqstan oblysy.  

Ekijaqty kelisim – damytady el isin

Elbasy bıylǵy Joldaýynda halyq­aralyq qarjy uıymdarymen, ásirese, Eý­ropa qaıta qurý jáne damý banki, Is­lamdyq qarjy júıesimen tyǵyz ári nátıjeli jumys jasaýdy tapsyr­dy. Alda kele jatqan daǵdarysta alań­syz otyrmaý kerektigin eskertti. Sondyqtan jan-jaqtan ınvestısııa tartyp, ekonomıkaǵa jańa serpin ákelý kerektigin málim qyldy. Munyń bári beker aıtyla salǵan sóz emes. О́ıtkeni, álem taǵy bir úlken daǵdarystyń aldynda tur. Qyzylorda oblysy Elbasynyń tapsyrmasyn oryndaýǵa edel-jedel kirisip ketti. Solaısha, Ulybrıtanııanyń qaq tóri Londonda Qyzylorda oblysynyń ákimdigi men Eýropa qaıta qurý jáne damý banki Syrdyń boıyndaǵy syrbaz qalanyń ınfraqurylymyn damytý boıynsha nesıelik kelisimderge qol qoıdy. Bul qandaı kelisimder? Aıtaıyq. Ekijaqty kelisimder boıynsha Qyzyl­orda qalasynyń elektr, jylý jáne sý jelilerin qaıta jańǵyrtý jobalaryn júzege asyrý kózdeledi. Buǵan qosa, oblys ortalyǵyndaǵy kóshelerdi jaryq­tandyrý júıesin qaıta jańǵyrtýǵa baılanysty da pátýalasty. Basqosýda Eýropa qaıta qurý jáne damý bankiniń prezıdenti Sýma Chakrabartı «Biz Qyzylorda oblysynyń bank organdarymen seriktestik qarym-qatynas ornatqanymyzǵa qýanyshtymyz. Qazaqstan Úkimetimen jasalǵan kelisim aıasynda Qyzylorda qalasynyń ómir súrý sapasyn jaqsartamyz. Biz byltyr maýsym aıynda óńirge barǵanda osy jobalardy júzege asyrý máselelerin talqylaǵanbyz. Endi jobalardy naqty júzege asyrý maqsatynda qol qoıyp otyrmyz», dep atap ótti. О́z kezeginde Qyzylorda oblysynyń ákimi Qyrymbek Kósherbaev Eýropa qaıta qurý jáne damý bankiniń prezıdentine alǵysyn bildirdi. – Elbasy sheteldik qarjy ınstıtýt­tarymen jumys jasaýdy tapsyrǵan bolatyn. Osyǵan sáıkes, biz búgin jobalary­myzdy júzege asyrýǵa qol qoıyp otyr­myz. Bul Qyzylorda oblysynyń ekono­mıkalyq-áleýmettik ahýalyn kótere­tinine senemin,– dedi Qyrymbek Eleýuly. Osy arada aıta keterlik bir jaǵdaıat bar. Qazaqstan boıynsha Eýropa qaıta qurý jáne damý bankimen eki-aq aımaq kelisimge kelip, jumys istep jatyr. Onyń birinshisi – Almaty qalasy bolsa, ekinshisi – Qyzylorda oblysy.   Erjan BAITILES, «Egemen Qazaqstan». QYZYLORDA.

Isti shırata túsý qajet

  El damýynyń eren joba­larynyń biri Shýche-Býrabaı kýrortty aımaǵyn damytýǵa qatysty júzege asyrylyp jat­­qany belgili. Qazaqstan Pre­zıdenti N.Na­zarbaevtyń tikeleı baqylaýyndaǵy keshendi sharalar jospary eki kezeńdi qamtıdy. Osyǵan baılanysty jýyrda Aqmola oblysynyń ákimi Sergeı Kýla­gın­niń tóraǵalyǵymen Shýche qalasynda keńeıtilgen má­jilis ótkizildi. Kún tárti­bin­degi «ShBKA-ny damytý já­ne Kók­shetaý qalasynyń mańyn­daǵy azyq-túlik beldeýin qalyp­tas­tyrý» máselesin tal­qy­laýǵa oblystyq basqarmalar men qyz­metterdiń basshylary, qalalar men aýdandar ákim­deri, agroónerkásip jáne týrızm ındýstrııasynyń ókilderi qatysty. Oblys ákiminiń birinshi orynbasary Qadyrhan Otarov óz baıandamasynda bul baǵyttaǵy keń aýqymdy sharalar álemdik deńgeıdegi týrıstik ortalyqty qurýǵa jumyldyrylǵanyn atap kórsetti. Belgilengen 85 is-sharanyń 21 mıllıard teń­geni quraıtyn 48-i oblys enshi­sine tıesili. О́tken jyly osy jumystardy atqarýǵa 3,9 mıllıard teńge qarjy bólinse, bıyl, ıaǵnı jospardyń ekinshi kezeńin iske asyrý úshin 2,6 mıllıard teńge qarjy jumsalady dep kútilýde. Jospar aıasynda áleýmettik jáne turǵyn úı qurylystary júrgizilip, qa­jetti ınfraqurylym nysandary salynyp jatyr. «Jumyspen qamtýdyń jol kartasy-2020» baǵdarlamasymen densaýlyq saqtaý salasynyń 6 nysany kúrdeli jáne aǵymdaǵy jón­deý­den ótkizilip, 2 dárigerlik ambýlatorııa men 3 mektep paıdalanýǵa berildi. Búgin Shýche qalalyq ishki ister bas­qar­masynyń jedel basqarý ortalyǵy ashylsa, qo­ǵamdyq tártipti saqtaýdyń taǵy da úsh nysany qatarǵa qosylady dep josparlanyp otyr. Elbasynyń bastamasymen ıgilikke jaratylǵan «Qazaqstan Laplandııasy» oıyn-saýyq ke­sheni jurtshylyq tarapynan úlken qyzyǵýshylyq týdyrýda. Zamanalyq dýmandy orda qystyń úsh aıy aralyǵynda 14 myńnan astam týrıske qyzmet ete alady. Jaqyn kúnderde, halyqaralyq deńgeıdegi «Rixos» oteli mań­yn­da kýrortty aımaqtaǵy eń birinshi «Veık park» ashylmaq. Ol jyl boıy qyzmet kórsetip, Býrabaıdaǵy týrıstik klasterdi jańa deńgeıge kóteretin bolady. Kýrortty aımaqty damy­tý­dyń 2014-2016 jyldarǵa ar­nal­ǵan ekinshi kezeńine belgi­lengen jumystardy atqa­rý­ǵa res­pýblıkalyq bıýd­jet­ten 47 mıllıard teńge bólý qa­ras­tyrylsa, oblystyq qa­zynadan taǵy da 690 mıllıon teńge bólinbek. Jalpy, 2014 jyly beki­tilgen jobalarǵa qatysty qar­jynyń 95 paıyzy ıgerilipti. Infraqurylymdy jetildirý nátıjesinde týrıster aǵymy 2000 jylmen salystyrǵanda 2014 jyldyń toǵyz aıynda 1,3 ese ósken. Jańadan 24 ekskýr­sııalyq mar­shrýt ashylyp otyr. Memleket nazaryndaǵy jobalardy iske asyrý ınjenerlik-kommýnaldyq ınfraqurylymdy, kólik-logıstıkasyn damytýmen shektelmeıdi. Munda ónerkásip sektory men azyq-túlik beldeýin qalyptastyrý sheshýshi mańyzǵa ıe. Májiliste osyǵan baılanys­ty Kókshetaý aımaǵynda 7,9 mıllıard teńgeniń 25 jobasy paıdalanýǵa berilgeni aıtyldy. Onyń 84 paıyzy astyqty qaıta óńdeý jáne astyq qoımalarynyń qurylysyn qamtıdy. Sondaı-aq, taýarly sút fermasy  salynyp, ónim tikeleı óndiris ornynda óńdelýde. Kókónis qoımalary men jylyjaılar qatary tolyǵa tústi. Baıandamashy mańyzdy istegi kóleńkeli tustarǵa da keńinen toqtaldy. Máselen, oblystyq basqarmalarǵa júktelgen, 11 mıllıard teńgege baǵalanǵan sharalardyń tek jeteýi ǵana júzege asyrylyp, jıyrma úshi baǵdarlamanyń ekinshi kezeńine aýystyrylypty. Ásirese, turǵyn úı-kommýnaldyq sharýashylyǵy, bilim berý jáne densaýlyq saqtaý salasynda kórsetkishter kóńil kónshitpeıdi. Máselen, bilim salasy boıynsha Eńbekshilder, Býrabaı jáne Zerendi aýdandarynda júzege asyrý josparlanǵan 6 mekteptiń úsheýi ǵana paıdalanýǵa berilgen. Ásirese, Shýche qalasyndaǵy 900 oqýshyǵa arnalǵan mekteptiń qurylysy saǵyzdaı sozylýda. Buǵan árıne, qarjy ýaqytynda aýdarylmasa túsinistikpen qaraýǵa bolar edi. Alaıda, bul keleńsizdik jergilikti ákimdiktegi jaýapty adamdardyń jáne merdigerlerdiń salǵyrttyǵy men jaýapsyzdyǵynan oryn alyp otyrǵan kórinedi. Mundaǵy negizgi sebep atqarýshylyq tártiptiń bosańdyǵynan, jo­balyq-smetalyq qujattardyń sapasyz daıyndalatyndyǵynan, onyń jıi ózgeriske túsetin­diginen, ınvestısııalyq jobalardy qorǵaýdyń álsizdiginen jáne tenderlik saıasattyń turaq­syz­dyǵynan órbip jatatyny synaldy. Oblys ákimi qorytyndy sózinde jumysty shırata túsýge baǵyttalǵan naqty tapsyrmalardy alǵa tartyp, jaýapty adamdardyń qyzmet qaıtarymy qatań baqylaýda bolatyndyǵyn eskertti.   Baqbergen AMALBEK, «Egemen Qazaqstan». Aqmola oblysy, Býrabaı aýdany.  

Aýyldaǵylardyń aıtary az emes

Memleket basshysynyń Jarlyǵyna sáıkes bıyl 11-shi ret ótkizilip jatqan barlyq deńgeıdegi ákimderdiń esepti kezdesýleri ashyq suhbat alańyna aınalyp, elimizdiń qoǵamdyq-saıası ómirin demokratııalandyrý úderisiniń oń tájirıbesin qalyptastyrǵanyn eshkim joqqa shyǵara qoımas. Bir aıǵa jýyq sozylyp, taıaýda ǵana aıaqtalǵan oblystaǵy 209 okrýg ákimderiniń 700-ge jýyq esepterindegi baǵaly  usynys-pikirlerdi jınaqtap, saralaıtyn bolsaq, ártúrli sıpattaǵy máselelerdiń kóptep kóterilýine qaraǵanda jergilikti jerlerde sheshimin tabatyn jaılardyń áli az emestigin, ishki múmkindikterdiń tolyq jumyldyrylmaı otyrǵanyn ańǵartady.   Qyzyljar aýdany Arhangelsk aýyldyq okrýgine qarasty eki eldi mekende 2 myńǵa tarta adam turady. Jurtshylyq aldynda ákimniń min­detin atqarýshy Irına Rybakova esep berdi. Ol mal sharýashylyǵy, densaýlyq saqtaý, bilim berý salalaryna, «Jumyspen qamtýdyń jol kartasy-2020» baǵdarlamasy sheń­berinde atqarylǵan jumystarǵa toqtaldy. О́tken jyly turǵyndar tarapynan 10 saýal qoıylsa, qazir kóbıýine qaraǵanda aýyldyqtardyń aıtary az bolmaǵan tárizdi. Má­selen, qalaaralyq qoǵamdyq kólik qatynasynyń kóterilip kele jatqanyna bir jyldan assa da, kúrmeýi qıyn kúıinde qalyp otyr. Sandyq telefon stansasynyń salynatyny qýantqanmen, sapaly aýyzsý jaıy ótkir tur. Internet jetistikterin paıdalaný múmkindigi qol jetpes arman syqyldy. Ásirese, oqýshylar qatty qapaly. Sol sııaqty kúl-qoqys tógetin ar­naıy oryn bólý, kóshelerdi jaryq­tandyrý, mal jaıylymyna qatysty da naqty usynystar aıtyldy. Jıynǵa qatysqan aýdan ákimi Bolat Jumabekov kópshilikti tolǵantqan shetin máselelerdiń she­shiletinine sendirgendeı boldy. Osy aýdannyń Lesnoe aýyldyq okrýginde 1300-deı adam tútin tú­te­tip otyr. Eginshilikpen 1 serik­testik, 7 sharýa qojalyǵy, sút qa­byl­daýmen 4 kásipker aınalysady. Hokkeı korty, sport alańy boı kótergen. Glýbokoe aýylynda mektep, kitaphana, medısınalyq qosyn jumys isteıdi. Alaıda, munda da jurtshylyqty tolǵan­dy­ratyn máseleler jetip-arty­lady. Osynda jarty ǵasyrǵa jýyq turyp kele jatqan Nurǵıza Shaı­janova sý men jaryq jaıy jol­ǵa qoıylǵanymen, joldardyń ýaq­tyly tazalanbaıtynyna, tek ortalyq kósheler ǵana qardan arshylatynyna renishin bildirdi. Glýbokoılyqtardy eń qınaıtyny – qoǵamdyq kóliktiń júrmeıtini. Osy sebepti bar-jo­ǵy 40 shaqyrym qashyqtyqta or­nalasqan oblys ortalyǵyna jaıaý­lap qatynaýǵa májbúr. M.Jumabaev aýdanyna qa­rasty Qaraqoǵa aýyldyq ok­rý­ginde 3 myńǵa jýyq turǵyny bar Qa­­raqoǵa, Chıstoe, Noǵaıbaı eldi mekenderi qaraıdy. On jyldan beri ákimdik qyzmet atqaryp kele jatqan Anna Jorovanyń ese­bin turǵyndar qanaǵattanarlyq dep tapty. Olaı bolatyn jóni bar. О́ıtkeni, atqarýshy bılik pen taýar óndirýshiler arasyn­da ózara túsinistik qarym-qaty­nas ornyqqan. Sharýashylyq je­tek­­shi­leri adamdardyń kúnde­likti muń-muq­tajdaryn óteýmen qatar 3 mektep­tiń, osynsha FAP-tyń, 2 shaǵyn ortalyqtyń, dári­hananyń, kitapha­nanyń jóndeý jumystaryna da qarjylyq qol­daý kórsetip otyrady. 16 sha­ǵyn jáne orta bıznes sýbek­ti­leri qaramaǵynda shashtaraz, eki dámhana, naýbaıhana, av­to­kó­lik­ter­ge tehnıkalyq qyzmet kórsetý or­talyǵy, mal soıý alańy sekildi nysandar bar. Mamlıýt aýdanyndaǵy Novo­mıhaılovka da iri okrýgterdiń biri. Oǵan kiretin bes eldi mekenniń tur­ǵyndary ákim Berkimbaı Ýálıev­tiń tapsyrmalardy úlken jaýap­kershilikpen oryndaıtyn iskerlik qasıetin joǵary baǵalap júr. Onyń bul jolǵy esebi de jurt­shylyq kóńilinen shyqty. Kóshe­lerge 28 sham ornatylǵan. Stanovoe tasjolyn jóndeýge 150 mıllıon teńge bólingen. «Aq bu­laq» baǵdarlamasy sheńberinde jańa sý kolonkalary qoıylǵan. 3 jas maman jumysqa alynyp, bas­­pana berilgen. «Bıznestiń jol kartasy-2020», «Jumyspen qam­tý-2020» baǵdarlamalary boıyn­sha nesıe alyp, túrli kásippen shu­ǵyldanýshylar qatary kóbeıe túsken. Okrýg ákimi aldaǵy ýaqyt­ta ǵalamtor jelisi ornatylatynyn, «Jedel járdem» qosyny qurylatynyn, mádenıet nysany jóndeletinin málimdedi. О́mir ESQALI, «Egemen Qazaqstan».

Alaqaı, bizge gaz keldi!

Krasnyı Kordon aýyly Araqaraǵaı ormanyna entelep kirip jatyr. Qańtardaǵy boran qardy úıip tastapty, qysqy shilde de endi bastalǵandaı. Arqanyń sary shunaq aıazy betti shymshyp tur. Aýylǵa gazdyń kelýin saltanatty atap ótý úshin aýdan ákimin kútken aýyldas­tar aıazdy eler emes. Án de aıtyldy, aýyldyń ardager anasy Vera Fedorovna Ýlysenko qýanyshtan óleń de jazyp jiberipti. Gazdyń sary tústi qubyrlary kóshege ózgeshe túr berip turǵan sekildi. О́zge aýyldardaı emes, ormannyń irgesindegi eldi mekenge otyn daıyndaý asa qıynǵa soqpaıtyn. Jylyna orman sharýashylyǵynan kerekti otynyn jazdyryp alady. Biraq órkenıet ıgiligi – kógildir otynnyń rahatyn qazir kim bilmeıdi deısiz. Aýyldyń gúldenýi gazdandyrýǵa baılanysty ekeni anyq. Aýylda 270 qojalyq jáne kópqabatty úılerde taǵy 70 páter birtindep gaz qubyryna jalǵanyp jatyr. Búginge deıin 74 úıge kógildir otyn kirdi. Osy Krasnyı Kordon aýylynda Mýsfıra Pımenovanyń turǵanyna 25 jyldan asyp ketti. Osy jyldar boıy eki peshke ot jaǵyp keldi. Jylyna 15 tekshe metr otyn alady. Tańerteń jyly tósekten turyp, muzdap ketken úıde dirdektep júrip ot jaǵý, burqyratyp kúl alýdyń qolaısyzdyǵy aýyl áıelin júdetedi. Bir-eki kúnniń ishinde-aq kógildir otyn Mýsfıraǵa pesh jaǵýdyń qıyndyǵyn umyttyrǵandaı eken. Mundaı rahatty tek ǵana armandap keldim. Aýylǵa gaz keledi degennen qýanyshymyz qoınymyzǵa syımaı júrdik. Mine, úıdiń ishi táýlik boıy birqalypty temperatýrada turady, bir shyrpy jaqsam shaı qaınap tur. Elbasy saıasatynyń arqasy dep bilemiz bul ıgilikti. Sosyn oblys, aýdan basshylaryna, gaz qubyryn tartqan mamandarǵa sheksiz rahmetimdi aıtamyn, deıdi Mýsfıra Pımenova. Sonymen qatar, aýyl turǵyndary gaz qubyrynyń búkil smetalyq-jobalaý qujattarynyń qarjysyn tólegen osy jerdegi «Kohan» jaýapkershiligi shekteýli seriktestiginiń dırektory Pavel Ýrbanovıchke, alty aı boıy ormandy, batpaqty daladan qubyr ótkizgen «Stroıgazekspertıza» jaýapkershiligi shekteýli seriktestiginiń dırektory Erkin Asadov pen onyń mamandaryna rızashylyqtaryn aıtýmen júr. Krasnyı Kordonǵa kógildir otyn kelýiniń tu­­saý­keserinde Altynsarın aýdanynyń áki­mi Batyrbek Ahmetov aýyl turǵyndaryn qýa­nysh­tarymen quttyqtady. – Krasnyı Kordon aýyly turǵyndarynyń turmysy burynǵydan da jaqsarýy úshin bıýdjetten 204 mıllıon teńge bólindi. Mine, osy qarjyǵa 18,6 shaqyrym gaz qubyry tartylyp, ár úıge kógildir otyn kirip tur. Endi aldaǵy jyly aýyzsý qubyry tartylady. Oǵan da respýblıkalyq bıýdjetten qarjy bólinip, «Aq bulaq» baǵdarlamasy boıynsha jumys júrip jatyr, – dedi ákim. Sońǵy az ǵana jyldyń ishinde Altynsarın aýdanynda tórt eldi meken gaz qubyryna qosyldy. О́tken jyly Malaıa Chýrakovka aýyly kógildir otynmen qamtamasyz etildi. Bıyl Krasnyı Kordon aýyly qýanyp jatyr, al kelesi jyly gaz qubyry Sherbakov aýylyna da jetedi. Batyrbek Ahmetov Krasnyı Kordon aýyldyq okrýginiń ákimi Vladımır Ýrbanovıchtiń esep berýi jıynynda bıyl osyndaǵy mektep pen klýbtyń qazandyqtary gazben jylytýǵa laıyqtalyp aýystyrylatynyn da aıtty. Sonymen qatar, aýyzsý qubyry da birtindep, aýyldardy aralap keledi. Obaǵan, Sılantevka, Malaıa Chýrakovka aýyldary aýyzsýdyń rahatyn kórip otyr. Endi Sherbakov pen Bolshaıa Chýrakovkaǵa baratyn sý qubyrynyń qurylysy júredi. Ákim jahandyq ekonomıkalyq daǵdarys qýsyrǵanymen bizdiń elimizde adamdar úshin áleýmettik jaǵdaıdyń jasalýy aldyńǵy orynda turatyndyǵyn qýanysh ústindegi turǵyndardyń esine saldy. Názıra JÁRIMBETOVA, «Egemen Qazaqstan». Qostanaı oblysy, Altynsarın aýdany, Krasnyı Kordon aýyly.