Qazirgi kezde Keńqııaq eldi mekenindegi qurylys jumystary «Samruk-Kazyna Construction» jumys komıssııasy júrgizgen tekseristen keıin ýaqytsha toqtatylǵan. Komıssııa jumysynyń qorytyndysy boıynsha mekteptiń irgetas konstrýksııalarynda jaryqtar paıda bolǵan, tirek qabyrǵalar men araqabyrǵalarda syzattar baıqalǵan. Sonymen qatar beton monolıtti belbeýler men tirek tabandarynda qurylys standarttaryna sáıkes kelmeıtin kemshilikter anyqtalǵan.
Máýlen Aımanbetovtiń aıtýynsha, merdiger kompanııa beton beriktigin qamtamasyz etýge qajetti sharalardy qabyldamaǵan, al tehnıkalyq qadaǵalaý, qyzmetkerleri olqylyqtardy ýaqtyly habarlamaǵan. Buǵan qosa, máseleniń týyndaýyna elimizdiń batys óńirlerinde qurylys kompanııalary men bilikti mamandar tapshylyǵy da áser etken kórinedi. Keńqııaqtaǵy mekteptiń tehnıkalyq qadaǵalaýyn júzege asyrý úshin uıymdastyrylǵan konkýrstarǵa eshbir kompanııa qatyspaǵandyqtan, bul mindet «Samuryq-Qazyna Development» JShS-ǵa júktelgen.
«Qazaqstannyń batys óńirlerinde qurylys kompanııalary men bilikti mamandardyń tapshylyǵy bar ekenin atap ótkim keledi. Keńqııaq aýylyndaǵy mekteptiń tehnıkalyq qadaǵalaýyn júrgizý úshin konkýrstyq prosedýralar 2023 jyldyń 3 qyrkúıeginde jáne 17 qazanynda uıymdastyryldy. Alaıda ótinish bildirip, qatysqan kompanııalar bolmady. Sondyqtan bıylǵy 15 sáýirde tehnıkalyq qadaǵalaýshy retinde erekshe tártippen «Samuryq-Qazyna Development» JShS bekitildi», deıdi M.Aımanbetov.
Tehnıkalyq qadaǵalaýdyń aldyn ala qorytyndysyna sáıkes, olqylyqtar ystyq aýa raıynda quıylǵan betonǵa júrdim-bardym qaraǵandyqtan týyndaǵan. О́ndiristik jumys jýrnalyndaǵy jazbalarǵa sáıkes, beton konstrýksııasyn quıý barysynda aýa temperatýrasy +33°S quraǵan. Sondaı-aq beton qospasy qurylys alańyndaǵy karmıks qondyrǵylarynda daıyndalǵan, al bul ádis qospanyń beriktigine keri áser etken.
Joǵaryda atalǵan faktilerdi eskere otyryp, «Samruk-Kazyna Construction» AQ Basqarma tóraǵasynyń tapsyrmasyna sáıkes anyqtalǵan aqaýlar boıynsha egjeı-tegjeı tekseris jumystaryn júrgizetin arnaıy táýelsiz sarapshylar komıssııasy quryldy. Komıssııa nysannyń tehnıkalyq jaǵdaıyn anyqtap, kelesi qadamdar boıynsha óz usynystaryn berýge tıis. Ázirge komıssııa bas merdigerge betonnyń monolıtti belbeýiniń beriktigin anyqtaý maqsatynda qosymsha zerthanalyq synaqtardy uıymdastyryp, akkredıttelgen táýelsiz zerthananyń qurylys nysanynyń tehnıkalyq zertteýi boıynsha qorytyndysyn usynýdy júktegen. «Samruk-Kazyna Construction» AQ kompanııasynyń baspasóz qyzmetiniń habarlaýynsha, qazirgi tańda zerthanalyq synaqtar júrgizilip jatyr. Tekseris qorytyndysy boıynsha tirek elementterin kúsheıtip, aqaýlardy birjaqty etý boıynsha sharalar kesheni ázirlenedi. Sharýany atqarýǵa astanalyq tájirıbeli kompanııa tańdalyp alynǵan. Mamandar tekseris aıaqtalysymen iske kirisedi.
Máýlen Aımanbetov bul komıssııanyń negizgi mindeti tek Keńqııaqtaǵy mektepti ǵana emes, jalpy ulttyq joba aıasynda salynyp jatqan barlyq nysannyń sapasyn baqylaý ekenin erekshe atap ótti.
«Men arnaıy táýelsiz sarapshylar komıssııasyn qurýdy tapsyrdym. Olar anyqtalǵan aqaýlar boıynsha muqııat zertteýler júrgizedi. «Samuryq-Qazyna Development» kompanııasynyń kóshpeli komıssııasy jumysyn bastady. Olar ǵımarattyń qazirgi tehnıkalyq jaǵdaıyn anyqtap, ári qaraıǵy áreketter týraly usynystar beredi. Sonymen qatar bul iske qosymsha taǵy 2 táýelsiz zerthanany, sonyń ishinde Qazaq kópsalaly qaıta qurý jáne damý ınstıtýtyn tartýdy tapsyrdym. Olardyń qorytyndysy aqaýlardy joıý boıynsha naqty sheshim qabyldaýǵa negiz bolady», deıdi «Samruk-Kazyna Construction» AQ basqarma tóraǵasy.
Joǵaryda atap ótkenimizdeı Keńqııaq aýylyndaǵy qurylys jumystary ýaqytsha toqtatyldy. Qurylys nysanynyń ınjenerlik-tehnıkalyq quramy tolyǵymen aýystyrylyp, joba jetekshileri qyzmetinen shettetildi. Buǵan qosa, merdiger kompanııaǵa aqaýlardy joıý mindeti júktelip, qurylysqa jaýapty taraptar áreketteriniń zańdylyǵyna tekseris júrgizilip jatyr. Máýlen Aımanbetovtiń aıtýynsha, jumys aktilerine qol qoıylmaǵandyqtan jáne tólem júrgizilmegendikten, qarajatty jymqyrý faktileri tirkelmegen.
Aıta keteıik, ERS-shartyna sáıkes bas merdiger nysannyń qurylys konstrýksııalaryna 5 jyl, al tehnıkalyq jabdyqtalýyna 3 jyl kepildik beredi. Mundaı jaǵdaı qaıtalanbaýy maqsatynda konsorsıým quramyndaǵy merdiger uıym «Antarium Group» JShS salyp jatqan basqa da nysandar qosymsha tekseristen ótetin boldy. «Samruk-Kazyna Construction» AQ kompanııasynyń baspasóz qyzmetiniń málimetinshe, «Antarium Group» JShS dıreksııanyń konkýrs qujattamasyna qoıylatyn qatań talaptarǵa saı kelip, baıqaýdan ótken. Kompanııanyń qajetti lısenzııalary, qurylys salasyndaǵy tájirıbesi bar, bilikti mamandary, arnaıy tehnıkalary, bári bar ári jaýapkershilikke de tartylmaǵan, salyqty da ýaqtyly tóleıdi. Biraq «Jaıly mektep» jobasyn jóndi tapsyra almaı otyr.
Keńqııaqtaǵy mektep qurylysynyń sapasy boıynsha týyndaǵan másele jalpy «Jaıly mektep» ulttyq jobasy aıasyndaǵy qurylys sapasyn baqylaýdyń álsizdigin kórsetip otyr. Máýlen Aımanbetovtiń aıtýynsha, «Samruk-Kazyna Construction» barlyq qurylys qatysýshysynyń jaýapkershiligin kúsheıtýge daıyn. Kompanııa ulttyq jobany júzege asyrý barysynda anyqtalǵan kez kelgen kemshilikterdi jedel joıýǵa ýáde berdi.
