Rýhanı basqosýǵa QMDB tóraǵasy, Bas múftı Naýryzbaı qajy Taǵanuly, Senat depýtaty Darhan Qydyráli, «Qazaq gazetteri» seriktestiginiń bas dırektory, akademık Dıhan Qamzabekuly bastaǵan zııaly qaýym ókilderi men tanymal tele-radıo, baspasóz jýrnalısteri, Dinı basqarmanyń bólim basshylary men «Munara» gazetiniń ujymy qatysty.
Quran aıattaryn oqýmen bastalǵan dóńgelek ústelde Bas múftı Naýryzbaı qajy Taǵanuly ýaqyt bólip arnaıy kelgen zııaly qaýym ókilderine alǵys aıtyp, Dinı basqarmanyń tól basylymyn jaryqqa shyǵaryp otyrǵan «Munara» gazetiniń ujymyn quttyqtady. Sondaı-aq ol buqaralyq aqparat quraldarynda din taqyrybyn qozǵaýda baıyptylyq kerek ekenin alǵa tartty.
«О́zderińizge jaqsy tanys, din máselesi – kúrdeli de názik taqyryp. Sondyqtan bul taqyrypty qalamyna arqaý etken jýrnalıst baısaldy da baıypty, saýatty da tájirıbeli bolýǵa tıis. Áıtpese qate dinı aqparat nemese qate pikir qoǵamdy dúrbeleńge salýy múmkin. Oǵan biz kýá bolyp júrmiz. Quran Kárimniń «Káhf» súresiniń 17-aıatynda «Aýzynan bir sóz shyqsa boldy, aldynda baqylaýshysy daıyn» delingen. Sondyqtan adam balasy, sonyń ishinde halyqqa aqparat taratatyn jýrnalıster qaýymy sóılegen sózine, jetkizgen aqparatyna baıyppen qaraýy kerek dep oılaımyn. Sebebi biraýyz sózben eldiń yqylasyna bólenýge bolady. Nemese kerisinshe, biraýyz sózimen súrinip ketýi de ǵajap emes. Muny aıtýdaǵy sebebimiz – sóz ustaǵan, qalamnyń qasıetin uǵynǵan jandar din taqyrybyn qozǵarda asa saq bolýǵa tıis. О́ıtkeni adamnyń senimi – oǵan qaırat beretin kúsh ári pendeniń eń álsiz tusy. Al bireýdiń senimin qorlaýdan artyq qııanat joq. Sol sekildi bir adamnyń jeke basyna tıisý, dinı senimin mansuqtaý, abyroıyn tógý sekildi máseleler eshkimge abyroı ápermeıdi. Árıne, aqparat alańynda túrli kereǵar pikirlerdiń, pikirtalastardyń bolǵany durys. Alaıda pikirtalastyń ózi baıyppen, óz ádebine saı bolǵany abzal», dedi QMDB tóraǵasy.
Dóńgelek ústel barysynda zııaly qaýym ókilderi men baspasóz salasynyń maıtalmandary otandyq jýrnalıstıkadaǵy din taqyrybynyń mańyzyna toqtalyp, halyqqa durys aqparat berýdegi buqaralyq aqparat quraldarynyń jaýapkershiligi men mindetine nazar aýdardy.
Jýrnalıster «Munara» gazetiniń bas redaktory Serikbol Hasannyń shyǵarmashylyq izdenisi men tájirıbesin de erekshe baǵalady.
Sondaı-aq jıynda ardager jýrnalıst Janbolat Aýpbaevtyń «Biz de óleń jazǵanbyz» jınaǵynyń tusaýkeseri ótip, kópshilikke tanystyryldy. Munda «Munara» gazetiniń «Biz de óleń jazǵanbyz...» aıdarymen jaryq kórgen jazýshy-jýrnalısterdiń aqyndyq qoltańbasyn tanytatyn óleńderi toptastyrylǵan.
