Sýretti túsirgen – Qanat BAIDRAHYMOV
Áleýmettik nysandardyń ashylǵany áýeli halyqty qýanyshqa bóleıdi. Shekaralas Amanbókter aýylynda 500-den astam turǵyny bar jańa blokty-modýldi medısınalyq pýnkt pen aýyldyq ákimdik úıi paıdalanýǵa berildi. Dál osyndaı medısınalyq pýnkt 600-den astam adam turatyn Abaı aýylynda da el ıgiligine usynyldy. Shyny kerek, Amanbókter men Abaı aýyldaryndaǵy 60-jyldary salynǵan burynǵy eki medısınalyq pýnkt te qazirgi sanıtarlyq normalarǵa sáıkes kelmeıtin edi.
«Sarqandyqtar úshin bıyl berekeli jyl boldy. Mine, aýyl-aýylda jańa nysandar boı kóterip, aýdannyń áleýmettik-ekonomıkalyq damý deńgeıi artyp keledi. Bıylǵy jaz jańbyrly, aýa raıy qolaıly boldy. Bir ǵana qyzylsha emes, barlyq egin sharýashylyǵynyń ónimi bitik shyqty. Sonyń arqasynda dıqandardyń kóńili toq. Aýdan sharýalarynyń ál-aýqatyn kóterip otyrǵan sala – qant qyzylshasy. Biz ótken jyly 1 500 gektar tátti túbir sepkenbiz. Byltyrǵy jyl aýa raıy qolaısyz bolyp, burshaqtan aman qalǵan 1 300 gektardan 62 myń tonna qyzylsha aldyq. Al bıyl 3 myń gektarǵa qyzylsha septik. Búgingi kúnge deıin 2 922 gektardy jınap úlgerdik, 389 gektary jınalý ústinde. Sharýa qojalyqtary Aqsý qant zaýytyna ótkizgen ónimderiniń aqysyn, sýbsıdııasyn da alyp, marqaıyp qaldy», deıdi aýdan ákimi Ǵalymjan Mamanbaev.
Máselen, ótken jyly az sebildi degenniń ózinde aýdan 4 mlrd 800 myńǵa aýyl sharýashylyǵy tehnıkasyn satyp alǵan. Munymen qosa, jańa tehnologııany da paıdalanyp jatyr. Tamshylatyp sýarý boıynsha bir sharýa qojalyǵy 40 gektarǵa tátti túbir otyrǵyzǵan. Osy tehnologııanyń nátıjesinde ónimi de joǵary shyǵyp, gektaryna 90 tonnadan aınalǵan. Bul – rekordtyq kórsetkish. Jalpy aýdannyń 33 myń gektary sýarmaly jer. Sonyń 10 myń gektaryn tamshylatyp sýarýǵa kóshirmek oıda.
«Iá, aýdanymyz damyp keledi. Aýyl sharýashylyǵy salasynda ónim mol boldy. Oǵan qosa halyqtyń kókeıinde júrgen biraz másele sheshimin taýyp jatyr. Búginge deıin medısınalyq kómek 1965 jyly salynǵan ǵımaratta kórsetilip keldi. Bul biraz qolaısyzdyq týǵyzdy. Endi qajetti jabdyqtary bar, jańa, zamanaýı medısınalyq mekemede medısınalyq qyzmet kórsetýdiń sapasy da artady. Ǵımarat jyly, jaryq, jaıly, munda jumys isteý de bir ǵanıbet», deıdi densaýlyq saqtaý salasynyń ardageri Kúlpash Jantelova.
1974 jyly salynǵan Amanbókter aýyldyq ákimdiginiń úıi apatty jaǵdaıda edi. Jańa ǵımarat barlyq talaptarǵa saı keledi, mamandarǵa yńǵaıly jumys kabınetteri qarastyrylǵan.
Jańa blokty-modýldi medısınalyq pýnkt saltanatty túrde ashylǵan Abaı aýylynyń turǵyndary da rıza.
«Turǵyndar ǵana emes, biz de qýanyshtymyz. О́ıtkeni materıaldyq baza eskirgen bolsa, oǵan qosa ǵımarat sanıtarlyq normalarǵa sáıkes kelmese, sapaly medısınalyq kómek kórsetý de qıyn. Endi mine, jańa medısınalyq pýnkt salyndy. Munda alǵashqy, jedel medısınalyq kómek kórsetý, skrınıng, vaksınasııa júrgizý, balaly áıelderdi tekserý, naýqastardy ortalyq aýrýhanaǵa jiberý, patronaj uıymdastyrý jumystaryna qajetti barlyq jaǵdaı bar», deıdi Abaı aýylyndaǵy medpýnkttiń aǵa medbıkesi Jamal Dolanbaeva.
О́ńir ákimi baspasóz qyzmetiniń málimetinshe, ótken jyly Sarqan aýdanynyń Eshkiólmes, K.Qazybaev, Birlik aýyldarynda 3 blokty-modýldi medısınalyq pýnkt iske qosylǵan, sondaı-aq bıyl Cherkask aýylynda dárigerlik ambýlatorııa paıdalanýǵa berildi.
Jetisý oblysy
