1571 kompanııa tirkelgen
«Astana Hub» keıingi alty jyl ishinde elimizdiń sıfrlyq ekonomıkasyn órkendetýde mańyzdy ról atqardy. 2018 jyly memleket qoldaýymen qurylǵan tehnopark óńirdegi startap-ekojúıeniń negizin qalap, IT-ındýstrııanyń belsendi damýyna aıtarlyqtaı serpin berdi. Jumysyn bastaǵan kezden beri eldegi jáne sheteldegi tehnologııalyq kompanııalar úshin tartymdy platformaǵa aınaldy. Tehnopark jumysynyń alǵashqy jylynda nebári 185 kompanııa tirkelgen bolsa, búgingi kúni olardyń sany 1 571-ge jetti. Bul kompanııalardyń 430-dan astamy sheteldermen seriktestik ornatyp, eldiń tehnologııalyq áleýetin álemdik naryqqa shyǵarý baǵytynda aıtarlyqtaı úles qosyp otyr.
Tehnopark óz qatysýshylaryna salyqtyq jeńildikter, arnaıy vızalyq jáne eńbek rejimderi, keńse men baspana usyný sııaqty keshendi qoldaý sharalaryn qamtamasyz ete otyryp, 28 myńnan astam jumys ornyn ashty. Qazirgi kezde tehnopark ınfraqurylym bazasynda «Playrix», «TikTok», «inDrive», «EPAM», «Glovo», «Damumed», «Presight.ai» jáne basqa da iri halyqaralyq kompanııalardyń keńseleri ornalasqan.
IT-ınvestısııa
«Astana Hub» iske qosylǵan ýaqyttan beri onyń rezıdentteri 1,9 mlrd dollar tabys tapty. 2019 jyly bul kórsetkish 35 mln dollardy qurasa, byltyr 875 mln dollarǵa jetti, al bıyl tabys mólsheri 1,147 mln dollardy quraıdy degen boljam bar. Sonymen qatar IT-qyzmetterdiń eksporty jyl saıyn qarqyn alyp keledi. Keıingi tórt jylda eksporttyq tabys 630 mln dollardy quraǵan bolsa, bıyldy eseptegende bul kórsetkish 1 mlrd dollardan asyp, otandyq IT-sektordyń halyqaralyq deńgeıdegi tabystylyǵyn dáleldedi. Astana Hub startaptardyń halyqaralyq naryqtarǵa shyǵýyna barynsha qoldaý kórsetip, alty jyl ishinde 665,5 mln dollar kóleminde ınvestısııa tartýǵa múmkindik jasady. Bul startaptardyń ishinde erekshe qarqynmen damyp kele jatqandar qatarynda «CerebraAI», «Parqour», «ApartX», «Kwaka», «Zypl.ai», «Alaqan», «Arlan Biotech» sııaqty jobalar bar. Olardyń keıbiri tek jergilikti naryqta ǵana emes, sheteldik ınvestorlardyń qyzyǵýshylyǵyn týdyryp, álemdik deńgeıde moıyndalǵan. Mysaly, «CITIX» startapy aıasynda álemge tanymal venchýrlyq ınvestor Tım Dreıper 1 mln dollar kóleminde qarjy quıdy. Mundaı jetistikter otandyq startaptardy jańa bıikterge shyǵarýǵa múmkindik berip, «Astana Hub»-tyń halyqaralyq tehnologııalyq ekojúıedegi rólin nyǵaıtatyp otyr.
IT-bilim
Tehnopark tek ınvestısııa tartýmen, ınfraqurylymdyq qoldaýmen shektelmeı, kadrlyq áleýetti damytýǵa da erekshe nazar aýdarady. IT-bilim berý baǵytyndaǵy «Tech Orda» baǵdarlamasy 9 myńnan astam otandasymyzǵa tegin bilim alýǵa múmkindik berdi. Joba avtorlary 2025 jylǵa deıin bul kórsetkishti 20 myń adamǵa jetkizýdi josparlap otyr. Ár stýdentke memleket tarapynan 600 myń teńgege deıin vaýcher bólinýi IT-mamandardy daıarlaýdaǵy mańyzdy qadam. Sonymen qatar «Alem School», «Startup School», «Beta Career» sııaqty jobalar jas mamandardyń kásibı deńgeıin arttyrýǵa yqpal etip jatyr. 2024 jyly elimizdiń 180 mektebinde baǵdarlamalaýdyń negizgi bilimderin úıretýge arnalǵan onlaın-platforma iske qosylyp, 19 myńnan astam joǵary synyp oqýshysyn «No Code, Low Code», «Startup Academy» baǵdarlamalary boıynsha oqytý bastaldy.
Jasandy ıntellekt
«Astana Hub» jasandy ıntellekt tehnologııalaryn damytýǵa da erekshe kóńil bólip otyr. «AI Movement» baǵdarlamasy aıasynda eldegi alǵashqy jasandy ıntellekt mektebi – «Tomorrow School» ashyldy. Sondaı-aq «Decentrathon» hakatony, «AI People Bootcamp», «JI negizderi: ChatGPT» onlaın kýrstary men aımaqtarda uıymdastyrylǵan «Roadshow» sııaqty bastamalar elimizdegi jasandy ıntellekt salasynyń damýyna jańa serpin berdi. Mundaı jobalar 2025 jyly ashylatyn Ulttyq jasandy ıntellekt ortalyǵynyń negizin qalap, elimizdiń tehnologııalyq áleýetin kúsheıtýge baǵyttalǵan.
Búgingi tańda elimizdiń 17 óńirinde IT-habtar jumys istep, jergilikti qaýymdastyqtardy damytýǵa jáne jańa talanttardy anyqtaýǵa da múmkindik berip otyr. Bul habtarda 1600-den astam is-shara ótkizilip, jobaǵa 48 myńnan astam adam tartylyp, 440 jańa startap quryldy. Munyń barlyǵy óńirlik IT-qaýymdastyqtardyń nyǵaıýyna jáne sıfrlyq áleýettiń artýyna yqpal etti. «Astana Hub» 2027 jylǵa qaraı IT-qyzmetterdiń jyldyq eksportyn 1 mlrd dollarǵa jetkizip, otandyq ıýnıkorndy qalyptastyrýdy maqsat etip otyr.
