Qazaq avtorlaryn álemge tanytý jolynda kóptegen irgeli isterdi atqaryp júrgen Qazaq PEN klýby Londondaǵy búkilálemdik jazýshylar qaýymdastyǵy – Halyqaralyq PEN klýbtyń múshesi, IýNESKO-da óz mártebesi jáne BUU-da keńesshilik mártebesi bar. Shyǵarmashyl mamandyqtar ókilderiniń zııatkerlik yntymaqtastyǵyn keńeıtip, halyqaralyq ádebı qoǵamdastyqqa qatysý, mádenıetti damytyp, qoǵamdyq sanada bıik izgilik murattaryn tárbıeleý maqsatynda qurylǵan klýb búginde óz údesine saı túrli baǵytta jumys istep jatyr. Eń aldymen, bul shyǵarmashylyq alań kásibı ádebıetshiler men jýrnalısterdi biriktiredi.
Osy oraıda Qazaq PEN klýbynyń prezıdenti Bıgeldi Ǵabdýllınnen sheteldik ádebı ortamen baılanystaryn, atqarylǵan jobalar men aldaǵy jospardy surap kórdik. Ásirese reseılik ádebıetshilermen iskerlik baılanys jyl ótken saıyn damyp keledi, deıdi ol.
«Biz eki eldegi ádebı-rýhanı jańalyqtarmen, jańa shyǵyp jatqan kitaptarmen bólisip otyramyz. Turaqty jumys isteıtin avtorlarymyz da bar. Máselen, eń aldymen áıgili jazýshy Anatolıı Kımdi atap aıtamyz. Orys ádebıetiniń klassıgi Andreı Bıtov (jýyrda ǵana ómirden ótti), jazýshy, qoǵam qaıratkeri Georgıı Prıahın, «Iýnost» jýrnalynyń bas redaktory, jazýshy Sergeı Shargýnov, prozashylar Ergalı Ger men Evgenıı Abdýllaev, ádebı synshy Evgenıı Ermolın jáne basqalary bar. Bul avtorlar Qazaq PEN klýby ótkizetin Halyqaralyq jazýshylar forýmdaryna turaqty qatysady», dedi Qazaq PEN klýby prezıdenti.
Sondaı-aq ol negizinen Reseı PEN klýbymen emes, Jazýshylar men baspagerler odaqtarynyń assosıasııasymen (ASPIR) áriptestik baılanysta ekenin aıtty.
«Bul assosıasııa Máskeýde 5-8 jeltoqsan aralyǵynda Halyqaralyq ádebı forým ótkizedi. О́zim de soǵan qatysýshy retinde shaqyryldym. Jalpy, Máskeýde Qazaqstan avtorlarynyń kitaptary jıi bolmasa da jaryq kórip turady. Atap aıtsaq, Iý.Serebrıanskıı M.Zemskıı, R.Búrkitbaeva-Núkenova, basqa da aqyn-jazýshylardyń shyǵarmalary basylyp shyqty. Aldaǵy jyly «Hýdojestvennaıa lıteratýra» baspasynan «Maral» atty romanym jaryq kóredi», deıdi B.Ǵabdýllın.
Qazaq PEN klýby prezıdentiniń aıtýynsha, qazir birlestik aýdarma jumystarynda basqasha tásilge kóshken. Qazaq klassıkteriniń shyǵarmalaryn aǵylshyn, amerıkalyq sheber aýdarmashylar arqyly birden aǵylshyn tiline tárjimalap, Nıý-Iorkte, Londonda basyp shyǵaryp jatyr.
«Keıingi jyldarda atalǵan qalalarda Abaı, Muhtar Áýezov, Muqaǵalı Maqataev, Ábdijámil Nurpeıisov, Oljas Súleımenov, Ábish Kekilbaev, Saıyn Muratbekov, Sáken Júnisov, Oralhan Bókeı, Qalıhan Ysqaq, Gerold Belger, Qajyǵalı Muhanbetqalıev, Mádı Aıymbetov, R.Búrkitbaeva-Núkenova, Ulyqbek Esdáýlet, Serik Aqsuńqaruly, taǵy basqalardyń kitaptary jaryq kórdi. Aıta keteıik, bul kitaptardyń aýdarma jumystary men shetelde basylyp shyǵýy Qazaq PEN klýbtyń jeke qarjysymen iske asyrylady», deıdi ol.
Iá, Qazaq PEN klýby jyl ótken saıyn sheteldermen aradaǵy ádebı baılanysty nyǵaıtýǵa úles qosyp keledi. Josparda turǵan jańa jobalary da aýqymdy. Eger múmkindik bolsa, keler jyly Qaraǵandyda nemese Túrkistanda «Kórshi elder ádebıetteriniń dıalogi: «muz» dáýirin qalaı eńseremiz?» atty Halyqaralyq jazýshylar forýmyn ótkizýdi josparlap otyr. Alqaly jıynǵa Qazaqstan, Qytaı, Reseı, Mońǵolııa, О́zbekstan, Qyrǵyzstan, Túrikmenstan, basqa elderden ataqty ádebıet ókilderi shaqyrylmaq.
