Mazmundy keshke Astanadan ǵalymnyń uly, belgili til mamany Arystanbek Nurmahanov kelip qatysyp, anasy týraly jyly esteligimen bólisti. Onyń aıtýynsha, Ázıza Nurmahanqyzynyń ǵumyrbaıany óte baı. 14 jasynda mektep dırektory bolǵan ǵalym Máskeýde KSRO ǴA Til bilimi ınstıtýtynyń aspırantýrasynda oqyp júrgende Láıla Muhtarqyzy Áýezovamen jáne Shámshııabaný Qanyshqyzy Satpaevamen jataqhanada bir bólmede turǵan. Sol kezde zańǵar jazýshy Muhtar Áýezovpen tanysyp, áńgimesin tyńdaǵan. Sondaı-aq Ázıza Nurmahanovanyń Qaraqalpaq AKSR- nyń oqý mınıstri bolǵanyn da aıta keteıik. Kórnekti ǵalymdy elimizge sol kezdegi respýblıka basshysy D.Qonaevtyń ózi shaqyrǵan.
Sonymen birge keshte asa daryndy aqyn Tólegen Aıbergenovtiń qyzy Saltanat Aıbergenova Ázıza apaı men ákesiniń tanystyǵy týraly áńgimeledi. Ázıza Nurmahanova jas aqynǵa kóp qoldaý kórsetipti. Al Qyzylordadan kelgen ardager-ustaz Sarsekkúl Aıapbergenova stýdent kezinde ǵalym úıinde turyp, ol kisiniń zııalylarymen jaqyn aralasyp, syılasqanyn, sondaı-aq úıde qonaq kútýi men ulttyq salt-dástúrdi berik saqtaıtyn qasıeti týraly qyzyqty estelik aıtty. Al belgili qalamger, halyqaralyq «Alash» ádebı syılyǵynyń laýreaty Janar Ábdisheva men aqyn Aısulý Rústemova ǵıbratqa toly ǵumyr keshken ǵalym shyǵarmashylyǵy týraly parasatty oı tolǵady.
Sondaı-aq is-shara barysynda ǵylym men qaıratkerlikti teń ustaǵan aıtýly tulǵaǵa Tólegen Aıbergenov, Shómishbaı Sarıev jáne Baýyrjan Jaqyp sekildi aqyndardyń arnaý jyrlary oqyldy. Kesh sońynda kitaphana basshysy Tolqyn Quramysova kelgen qonaqtarǵa rızashylyǵyn bildirip, estelik syılyǵyn tabystady.
