– 90-jyldary eskiniń bári qırap, jaramsyz bolyp jatty emes pe? Jezdide áleýeti zor avtobaza bolatyn. Men sonda eńbek jolymdy bastaǵan edim, slesar bolyp isteıtinmin. Sol kásiporyn aıaq astynan eshkimge kereksiz boldy da shyqty. Júz qaraly adam jumyssyz qaldyq. Bir jaqsysy, sol kezde buryn bizde basshy bolǵan Raıymbek Aıashov esimdi azamat Sátbaev qalalyq jylýmen-sýmen qamtý kásipornynyń dırektory bolyp isteıtin edi. Sol kisige baryp, jumys jaǵynan qarasýdy ótindim. Rahań – terisi keń kisi. «Kreslo surap turǵan joqsyń ǵoı, eki qolǵa bir jumys tabylar. Burynnan úırenshikti jumysyń munda da bar», dedi de slesar etip qabyldady. Mine, sodan beri osy kásiporynda jumys istep kelemin, – deıdi Ádil, bar ómirbaıanym osy degendeı.
Adamdy abyroıǵa qansha jerde istegeni emes, qalaı eńbek etkeni bóleıdi emes pe? Ádil Qýanyshuly jańa eńbek ujymynda da birden-aq tyndyrymdy eńbegimen kózge túsip, senimnen shyǵa bildi. Maqtaý, marapattar ıelendi. Arada ótken ýaqyt onyń eńbek kitapshasyna bir ǵana ózgeris engizdi. Eger ol 1997 jyly Sátbaev qalalyq jylýmen-sýmen qamtý kásipornyna slesar bolyp qabyldanǵan bolsa, qazir slesarlar brıgadasynyń brıgadıri. Onyń qaraýynda 20-dan asa slesar bar. Kommýnaldyq sharýashylyq salasynyń jumysy eshqashan taýsylyp bitpeıdi. Kún jylyda qysqy jylý berý maýsymyna daıyndalasyń, al qysta halyqqa der mezgilinde jylý jetkizip turýdy qamtamasyz etýde kúni-túni jumys isteýge taǵy týra keledi. Muny óziń qanshalyqty sezine bilseń, qaramaǵyńdaǵy jumyskerlerdi de sonshalyqty ortaq iske jumyldyra bilý kerek. Demek brıgadır talap qoıa bilýge de, isti uıymdastyrý jaǵyna da myǵym bolý kerek. Bul jaǵynan da Ádil Qýanyshuly ózine júktelgen senimge selkeý túsirip kórgen emes.
Á.Seıitjanov bıyl III dárejeli «Eńbek dańqy» ordenimen marapattaldy. Ujym basshylyǵy onyń joǵary memlekettik nagradaǵa usynylǵanyn óte qupııa ustady.
– Joǵary jaq bekitpeı qalsa, kóńilin jaralap alarmyz degen oıda boldyq. Sondyqtan qashan súıinshi habar jetkenshe tisimizden shyǵarmadyq. Ordendi zor saltanat ústinde oblys ákimi ózi tapsyrdy. Bul qarapaıym eńbek adamyna degen shynaıy qurmettiń belgisi boldy, – deıdi atalǵan kásiporynnyń basshysy, oblystyq máslıhattyń depýtaty Erjan Toqymbaev.
Prezıdent Qasym-Jomart Toqaev qarapaıym eńbek adamdaryn qurmetteý týraly ár kez aıtyp, eske salyp, mindettep keledi. Ádildiń keýdesin kóriktendirip turǵan orden de Prezıdent tapsyrmasynyń múltiksiz oryndalyp jatqanyn aıǵaqtaıdy.
Ulytaý oblysy,
Sátbaev qalasy
