Lexus «mingen» jetkinshek

Qaraǵandyda mektep jasyn­daǵy oqýshy qyz sheteldik qymbat mashınalardyń biri – Lexus kóligin minip júr degen habardy aqparat keńistiginen baıqap qalyp, alǵashqyda: «Osy jurt ne bolsa, sony jazyp basty qatyratyny nesi? Onda turǵan ne bar?» dep azdap keıistik tanytqanbyz. Biraq sálden keıin bul habardyń ınternetke bosqa jarııalanbaǵanyn seze qoıdyq. О́ıtkeni, «Oqýshy qyz mashına minip júr» degen sózdiń mánisi basqada eken. Dáliregi, ol zańdy quqyǵy bolmasa da kólik júrgizgen. Onyń qashannan beri «shopyr» bolyp júrgenin ózi ne janyndaǵy jaqyndary aıtpasa, bir Alla ǵana biledi. Bul «sensasııanyń» jarııalaný tarıhyna keler bolsaq, jas qyzdyń osy áreketin áldekim beınekameraǵa jazyp alyp, nátıjesinde «qyzyqty fılmdi» keń qursaq ǵalamtorǵa ornalastyrǵan. Beıne materıalda kórsetilgendeı, oqýshy qyz kóliktiń artqy oryndyǵyna sómkesin qoıyp, ózi júrgizýshi ornyna otyrady. Budan keıin kólikke balasyn kótergen áıel kelip, «shopyrdyń» qasyna jaıǵasady. Odan arǵysy belgili. Qyz bala kólikti otaldyryp, mashınalar aǵylyp jatqan kóshege bettegen. Osyǵan baılanysty Qaraǵandy oblystyq ishki ister departamentiniń baspasóz qyzmeti arnaıy túsinik berdi.  Polıseılerdiń aıtýynsha, kóliktiń ıesi anyqtalyp, ol zańnama aıasynda ákimshilik jaýapkershilikke tartylypty. Iá, eshteńe búlingen joq. Biraq áli býyny qatpaǵan jas jetkinshekti qandaı jaǵdaı rólge otyrýǵa májbúr etti eken? Ol – bala. Kóp nárseniń baıybyna bara bermeıdi. Biraq úlkender jaǵy ne qarap otyr? Kámelet jasyna tolmaǵan jalǵyzdaryna «asaý» kóliktiń tizginin ustatyp, aqyrynda ómir boıy sanasynan bir sátke óshpeıtin, júregine  qanjardaı qadalǵan qaıǵyǵa tap bolǵandar az ba? Oılanatyn másele. Joldybaı BAZAR, «Egemen Qazaqstan».