Balalarǵa «Samuryq-Qazyna» kompanııalar tobynyń biryńǵaı qaıyrymdylyq operatory – «Samruk-Kazyna Trust» qory arqyly qajetti kıim-keshek, qural-jabdyq, velosıpedter men kólikter satyp alynyp berildi. Sondaı-aq joba aıasynda, «Saryarqa» velotreginde 16 qarashada qor basshylyǵy men balalardyń birlesken jattyǵýy ótti.
«Jattyǵýdy jaqynda ǵana bastasańyzdar da, qazirdiń ózinde jaqsy nátıje kórsetip jatyrsyzdar. Komandanyń bir bóligi Astana quramasyna engenin bilemin. Al tálim alýshylardyń biri Dastan Ordabaı Fransııada ótken halyqaralyq bedeldi jarysta kúmis júldeger atanǵanyn estip qýandyq», dep atap ótti «Samuryq-Qazyna» AQ basqarma tóraǵasy Nurlan Jaqypov.
Basqarma tóraǵasy sonymen birge, qor erekshe balalardy tárbıeleý men áleýmetke yqpaldastyrýǵa qatysty jobalardy únemi qoldaıtynyn basa aıtty.
«Biz ońaltý ortalyqtaryn, mektepterde ınklıýzııa kabınetterin, tegin sport seksııalaryn ashyp, aýyldarda sport alańdaryn, óńirlerde iri sport keshenderin salyp jatyrmyz. Osylaısha biz sportty balalarǵa qoljetimdi etkimiz keledi», dedi qor basshysy.
N.Jaqypov shara qorytyndysynda, jas sportshylardy qoldaý maqsatynda balalarǵa 30 velosıpedtiń sertıfıkaty men jańa kóliktiń kiltin tabys etti.
«Balam velosport seksııasyna qatysqaly oı-zeıini jaqsaryp, jalpy densaýlyǵy da ońalyp keledi. Bulshyq eti shırap, adamdarmen aralasyp, ashylýy da kóbeıdi. Jattyqtyrýshylarǵa, osyndaı biregeı isti halyqaralyq joǵary dárejede uıymdastyrýshylarǵa shydam men jigerlerine, meıirimderi men qamqorlyqtaryna alǵys aıtamyn», dep oıyn bildirdi 14 jastaǵy Danııldyń anasy Iýlııa Borovıkova.
«Nemerem burynǵydaı emes. Buryn qorqyp, otyra almaıtyn. Qazir ájeptáýir úırendi. Velosıpedpen júredi, jaqsy júgiredi. О́zi de velosıpedti unatady», deıdi 11 jastaǵy Ámirdiń ájesi Yrysty Qabdýllına.
«Velosport – barshaǵa» jobasy óz jumysyn 2024 jyldyń tamyz aıynan bastady. Az ýaqyttyń ishinde atalǵan jobanyń qatysýshylary bıik belesterdi baǵyndyryp jatyr. Oǵan dálel, jobanyń 16 jastaǵy túlegi, jalpy velosportpen aınalysyp kele jatqanyna 6 jyl bolǵan Dastan Ordabaı 13-14 qyrkúıek aralyǵynda ótken «Virtus Cycling Open Time Trial»-ǵa qatysyp, 17,3 km qashyqtyqta jeke ýaqyt jarysynyń II-3 sanatynda (aýtızm spektriniń buzylýy) kúmis júldeni jeńip aldy. Jarysta álemniń túkpir-túkpirinen kelgen 16 parasportshy baǵyn synady. Aıta ketý kerek, elimiz bul jarysqa alǵash ret qatysty.
«Armanymyz oryndaldy desem, artyq aıtpaspyn. Dastannyń jetistigine qarap, bizdiń balalar da osyndaı asýǵa qol jetkizse deımiz. Onyń ústine balamyzǵa saı keletin sport túrin uzaq izdedik. Buǵan deıin júzý, fýtbol syndy seksııalarǵa baryp kórdik. Qalamyzda velosport klýbynyń ashylǵanyna óte qýanyshtymyz. Ersultan búgin jyldamdyqty ádettegiden arttyryp, jaqsy nátıje kórsetti. Bul onyń fızıkalyq daǵdylaryn damytyp, áleýmettik ortaǵa sińisýine yqpal etedi. Aldaǵy ýaqytta úlken týrnırlerde boı kórsetemiz degen senimdemin. Búgin ǵajaıyp kúıge enip otyrmyz. Qor basshysynyń jeke úlgi-ónege tanytyp, jattyǵýǵa qatysýy, qasymyzdan tabylýy da bizdi qanattandyrdy. Sebebi erekshe balǵyndardyń ata-analaryna ınklıýzıvti sport taqyryby óte mańyzdy. Osyndaı ister úmitimizdi oıatyp, jigerimizdi janıdy. Bapkerlerimizdiń eren eńbegi de kóz aldymyzda», dep tebirendi 11 jastaǵy Ersultannyń ákesi Almaz Sadyqov.
Sonymen qatar jobanyń 10 tárbıelenýshisi velosporttan Astana qalasy quramasynyń múshesi atanyp otyr. Basty maqsat – erekshe balalardyń sportpen aınalysýyna teń jaǵdaı jasap, aýtızmi bar jandardyń da qoǵamnyń bir bóligi ekenin tanytý. Jetkinshekterge tórt kásibı ári bilikti bapker velosıped tebýdi úıretip jatyr. «Velolegend» seksııasynda aptasyna úsh ret jattyǵý ótkiziledi.
«Bizde eń basty maqsat – sport nátıjesin kórsetý. Ol jaı ǵana seksııa emes. Ár balaǵa jeke qaraý kerek. Balalar ártúrli. Keıbir balalar 2-3 jattyǵýdan keıin úırenip ketedi. Keıbir balaǵa 3-4 aı kerek. Balanyń minez-qulqyna, dene daıyndyǵyna, kóńil kúıine muqııat zer salýǵa tyrysamyz», deıdi «Velolegend» klýbynyń jattyqtyrýshysy Qaırat Hadylbek.
Qor densaýlyq saqtaý, bilim berý, buqaralyq sport salalaryndaǵy, onyń ishinde ınklıýzııa, kreatıvti ındýstrııa baǵyttaryna erekshe nazar aýdarady. Onyń ishinde salamatty ómir saltynyń qanat jaıýyna aıryqsha basymdyq berilip otyr. Oǵan dálel, bıyl qazan aıynda qordyń qoldaýymen Qyzylorda qalasynda tennıs ortalyǵy ashyldy, jyl sońynda Túrkistan qalasynda sport kesheni iske qosylady. Jylda qor qoldaýynyń arqasynda 23 qalada erekshe qajettiligi bar 1 100 bala beıimdelý, sport seksııalaryna tegin barady. Munda balalar qoǵamǵa beıimdeledi, qajetti daǵdylardy úırenedi. Tıisti seksııalarǵa qatysatyn jandardyń kóbi paralımpıada quramalarynyń múshesi. Olar respýblıkalyq, halyqaralyq jarystarda júldeli oryndar alyp júr.
Qor sońǵy birneshe jylda óńirlerde 40-qa jýyq sport kesheni men oıyn alańyn salyp, buqaralyq sportpen 90 myńnan astam otandasymyz qamtyldy. Barshaǵa málim, aýyldarda jastarǵa arnalǵan arnaıy oryndar sany az. Endi jastardyń bos ýaqytyn tıimdi ótkizip, sportpen shuǵyldanatyn nysandar sany kóbeıip keledi.
«Samruk-Kazyna Trust» KQ arqyly qordyń kompanııalar toby 2024 jyldyń 10 aıynda byltyrdan beri jalǵasyp kele jatqan 13, bıyl qoldaý tapqan 36 áleýmettik joba arqyly 550 myńnan astam adamǵa qaıyrymdylyq kómegin kórsetti. Jyldyń aıaǵyna deıin bul sandy 700 myń adamǵa jetkizý kózdelip otyr. Atalǵan beles ótken jylǵa qaraǵanda 40 paıyzǵa joǵary bolmaq.
Aldabergen KEMPIRBAI
