Jańa albom tarıhı zertteýlerdi zamanaýı tehnologııalarmen ushtastyra otyryp, qazaq memlekettiliginiń bastaýy bolǵan Joshy ulysynyń mańyzdylyǵyn jan-jaqty ashyp kórsetedi. El Prezıdenti Qasym-Jomart Toqaevtyń sózimen aıtsaq, «Altyn Orda – bizdiń memlekettiligimizdiń bastaýy. Joshy hannyń tulǵasyn taný arqyly biz ulttyq tarıhymyzdy jańa deńgeıde baǵalaı alamyz».
Iá, Joshy hannyń tulǵasy – uly dala tarıhynyń altyn dińgegi. Onyń basqarýyndaǵy Ulyq ulys el aýmaǵyndaǵy memlekettiliktiń irgetasy ekeni sózsiz. Kitap avtory – jýrnalıst, derekti fılmder avtory Maııa Bekbaeva bul eńbekte tarıhı oqıǵalardy tereń taldap, Joshy hannyń qazaq halqynyń qalyptasýyna qosqan úlesin aıryqsha sıpattaıdy.
Kitapta tarıhı derekter, folklorlyq málimetter men zamanaýı zertteýler tereńnen qabysyp, júıeli berilgen. Avtor bul eńbeginde Joshy hannyń tarıhı róli men onyń qaıshylyqqa toly ómirin jan-jaqty baıandaıdy. Tarıhı qundylyqtardy jańa urpaqqa ózgeshe formamen, tyń tásilmen jetkizýdi maqsat etken.
Jobanyń negizgi ıdeıasynyń avtory – «Arman-PV» baspasynyń bas dırektory Dıdara Alına kitaptyń ulttyq tarıhty taný men ony urpaq jadynda jańǵyrtýdaǵy mańyzyn erekshe atap ótti.
«Bul eńbek tarıhı muraǵa qurmet kórsetip qana qoımaı, ulttyq sana-sezimdi nyǵaıtatyn qýatty qural maqsatynda jasaldy. Ult tarıhyndaǵy aıryqsha tulǵalar men oqıǵalardy búgingi urpaq bilýi kerek», deıdi ol.
Iá, «Joshy han. Ulyq ulystyń bıleýshisi» albomy – dástúrli tarıhı eńbekterden ózgeshe. Joba barysynda jasandy ıntellekt tehnologııasy kitaptyń ıllıýstrasııalaryn daıyndaý úshin qoldanylǵan. Bul tásil tarıhı tulǵalardyń beınelerin zamanaýı formatta kórsetýge jáne albomdy kórkem óner týyndysyna aınaldyrýǵa múmkindik berdi.
«Arman-PV» baspasy jobany júzege asyrý barysynda tarıhı derekterdi oqyrmanǵa qyzyqty ári kórneki túrde usynýdy basty maqsat etken. Jańa eńbek jastarǵa tarıhty vızýaldy quraldar arqyly túsindirý, muǵalimderge oqytý úderisinde qosymsha resýrs usyný, tarıhshylarǵa jańa derekkózder men zamanaýı zertteý ádisterin kórsetý, halyqaralyq aýdıtorııaǵa elimizdiń baı tarıhı murasyn tanytý baǵyttaryn qamtyǵan.
Endi bir jaǵynan, atalǵan albom tarıhı murany jańǵyrtýǵa baǵyttalǵan rýhanı baǵdar syndy. Joshy han tulǵasynyń qazaq halqynyń tarıhyndaǵy orny men onyń Ulyq ulystyń qurylýyndaǵy róli tek ulttyq maqtanysh qana emes, urpaq úshin mańyzdy tanym kózi retinde usynylǵan. Búginde tarıhı murany taný – bolashaqqa umtylǵan ult úshin basty qadamdardyń biri ekeni sózsiz. Jańa týyndy tarıhı qundylyqtardy saqtap qana qoımaı, ony jańa urpaqqa nasıhattaý arqyly ulttyq rýhty nyǵaıtatyn qýatty quralǵa aınaldy.
Tusaýkeser barysynda belgili tarıhshylar, jazýshylar, zertteýshiler, qoǵam qaıratkerleri Joshy han tulǵasynyń tarıhı murasyn tanýdyń ózektiligi týraly oı bólisti.
Aıta keteıik, kitap qazaq, orys jáne aǵylshyn tilderinde basylyp shyqty. Bunyń ózi tarıhı eńbektiń tek otandyq oqyrmandarǵa ǵana emes, sheteldik aýdıtorııaǵa da baǵyttalǵanyn kórsetedi. Kitap-albom ult mádenıeti men tarıhyn álemdik deńgeıde nasıhattap qana qoımaı, tarıhı tanymnyń jańa satysyna kóterilýdiń aıqyn mysaly boldy.
Tarıh pen zamanaýı tehnologııanyń toǵysynda dúnıege kelgen erekshe joba el tarıhyn zertteýshiler úshin taptyrmas derekkóz bolýmen qatar, zamanaýı oqyrmandy tarıhqa jańa qyrynan qaraýǵa oı salady. О́tkenniń taǵylymy arqyly bolashaqqa jol silteıtin qundy eńbek álemdik arenada da baǵalanatynyna senemiz.
