Sýret: ru.freepik.com
Innovasııalyq jobany Ishki ister mınıstrligi, Ulttyq qaýipsizdik komıteti jáne Sıfrlyq damý, ınnovasııalar jáne aeroǵarysh ónerkásibi mınıstrligi ázirlegen. IIM taratqan aqparatqa sáıkes, ulttyq beınemonıtorıng júıesi jasandy ıntellekt tehnologııalary arqyly izdeýde júrgen adamdardy tanýǵa, qoǵamdyq oryndarda qaldyrylǵan zattar týraly sıgnal berýge, quqyq buzýshylyqtardy avtomatty rejimde tirkeýge múmkindik beredi. Sondaı-aq kompıýterlik baǵdarlama kóliktiń markasyn, modelin, túsin anyqtaıdy.
Búginde jańa júıe tıimdiligin kórsetken. Máselen, Dúnıejúzilik kóshpeliler oıyndaryn ótkizý kezinde quqyq qorǵaý qyzmetkerleri elordanyń qoǵamdyq oryndarynda joǵalǵan balalardy, sondaı-aq esepte turǵandar men habar-osharsyz ketken adamdardy osy «aqyldy» kameralardyń kómegimen jedel tapqan. Sondaı-aq beıne-taldaý júıesi arqyly Astanada izdeýde júrgen 46 quqyq buzýshy jedel túrde anyqtalyp ustalǵan. Osyndaı izdestirý jumystary qazir Almatyda júrgizilip jatyr. 30 adam anyqtalyp quryqtalǵan.
Engizilgen tehnologııalar – «aqyldy» qalalardy qurýǵa jasalǵan oń qadam. Olar qoǵamdyq qaýipsizdik deńgeıin arttyryp, qylmysty azaıtýǵa kómektesedi. Mundaı júıeler Qytaıda, Reseıde jáne Eýropa elderinde kóptep qoldanylady.
Osylaısha, Qazaqstan úzdik tájirıbelerdi ıgerip, álemdik úrdistiń bir bóligine aınalyp keledi. Aldaǵy ýaqytta kameralar sanyn arttyryp, beınemonıtorıngti keńeıtý josparlanyp otyr. Bul kezeń-kezeńimen júrgiziledi.
«Búgingi tańda menshik túrine qaramastan elimizde 1 mln 359 myń beınekamera bar, onyń 310 myńy jedel basqarý ortalyqtary jáne polısııanyń kezekshi bólimderine shyǵarylǵan. Jalpy, ınnovasııalyq jobalardyń qylmysqa qarsy is-qımylda jáne adamdar kóp jınalatyn jerlerde qoǵamdyq qaýipsizdikti qamtamasyz etýde kómegi zor. Iske qosylǵan júıelerdiń basty maqsaty – árbir azamattyń zań men tártip ornaǵan qoǵamda ózin qaýipsiz sezinýine jaǵdaı jasaý», deıdi IIM ókilderi.
