Aqmola óńiriniń klımattyq jaǵdaıy qysqy týrızmdi damytýǵa qolaıly aımaqqa jatady. Býrabaı, Zerendi kýrorttyq aımaqtaryndaǵy týrıstik nysandar qys aılarynda ekotýrızm, sport, saýyqtyrý baǵytynda kelýshilerge qyzmet kórsetedi. О́ńirde jumys istep turǵan, jatyn jaıy damyǵan, qysqy týrızm qyzmetteriniń san túrin kórsetetin «Oqjetpes», «Almaz», «Shýchınskıı», «Terrassalar parki», «Samal», «Dıskaverı Býrabaı», «Grand Prıks», «Zeren», S. Seıfýllın atyndaǵy shıpajaılar em alýǵa da, demalýǵa da qolaıly.
«Qys mezgilinde týrıst tartý maqsatynda shıpajaılarda jyl saıyn kórsetiletin qyzmetterdiń aýqymy keńeıip, sapasy artyp keledi. Onyń ishinde muz aıdyndary quıylyp, shańǵy marshrýttary salyndy, sondaı-aq shańǵy, konkı, snoýbord, qarda júretin kólikterdi jalǵa berý oryndary ashylyp jatyr», deıdi Shýche-Býrabaı kýrortynyń qyzmetkerleri.
Al áýesqoı, kásipqoı shańǵyshylarǵa «Elikti park», «Nurtaý», «Aq jelken» taý shańǵy kýrorty taptyrmas oryn eken. Ekstremaldy áýesqoılarǵa «Rixos Borovoe» qonaqúıiniń aýmaǵynda «Ekstrım park» jumys isteıdi.
Qazir ishki týrısterdi qyzyqtyratyn oryn – «Burabay Land» oıyn-saýyq parki. Ol qysqy oıyn-saýyqtyń búkil túrin usynyp otyr. Aıtalyq, haskı shana, atpen serýendeý, shanamen syrǵanaý, konkı tebý, kvadrasıkl, qarda júretin kólikterdi paıdalanýǵa bolady. Oıyn-saýyq saıabaǵynda eresekter men balalarǵa arnalǵan attraksıondar, shaman aýyly, fotosýretke túsý aımaǵy bar. Sondaı-aq kishkentaı qonaqtarǵa arnalǵan «Aıaz ata rezıdensııasy» jumys isteıdi. Otbasylyq oıyn-saýyq saıabaǵynda jurtshylyq ertegi álemine engendeı kúı keshedi. Kóptegen týrıst bul saıabaqqa jyl saıyn kelip turýdy dástúrge aınaldyrǵan.
Ondaǵy mamandardyń aıtýynsha, jyl saıyn balalar oıyn-saýyq kesheni bazasynda 50 myńǵa deıin týrıske qyzmet kórsetiledi. Buǵan qosa Shýchınsk qalasyndaǵy Olımpıadalyq daıarlaý ortalyǵynyń aýmaǵynda halyqaralyq deńgeıdegi jarystar jıi ótkizilip turady. Qysta munda kásibı shańǵyshylar men sportshylarǵa arnalyp 20-dan astam sporttyq is-shara uıymdastyrylady.
«Aqmola oblysy elimizdegi týrızmdi damytý draıverleriniń bestigine kirdi. О́ńirde týrızmdi damytý aýmaǵy jyl saıyn keńeıip keledi. Býrabaı, Zerendi kýrorttarynyń orny erekshe. О́ńirlik týrızmniń damý qarqynyn kóterip turǵan Astana turǵyndary men qonaqtary», deıdi Aqmola oblysy týrızm basqarmasynyń ókili Ernazar Quttyǵojın.
Onyń aıtýynsha, Astana qalasynyń mańynda da qysqy týrızm qyzmetterin usynatyn birqatar demalys aımaqtary bar. Sonyń ishinde Arshaly aýdanyndaǵy «Beıbarys» demalys bazasyna, Aqkól aýdanyndaǵy «Arka tour» shańǵy bazasyna, «Shar Zhum» demalys ortalyqtaryna saıahattaıtyndardyń sany jyldan-jylǵa artyp keledi.
Qala mańyndaǵy demalysty odan ári damytý maqsatynda Selınograd aýdanynda «Taý parki» demalys aımaǵynyń qurylysy (syrǵanaqtar, muz aıdyny, shańǵy, qarda júretin kólikter, atpen júrý) qolǵa alynypty. Astana sekildi aınalasynda taýy joq jazyq óńirge mundaı syrǵanaýǵa arnalǵan oryndar az olja emes.
«Sandyqtaý aýdanyndaǵy shańǵy-roller bazasynda jyl saıyn sport ardagerleriniń dástúrli shańǵy marafony ótkiziledi. О́ńirde «Four Seasons» kúntizbelik is-sharalar josparyna sáıkes, turaqty negizde qys mezgili men maýsymaralyq kezeńde kýrorttyq aımaqtarda sporttyq, mádenı is-sharalar uıymdastyrylady», deıdi E.Quttyǵojın.
Byltyr oblys ákimi Býrabaıǵa bir jylda 1 mln sheteldik týrıst kelgenin aıtqan edi.
«Jyl saıyn Shýchınsk-Býrabaı shıpajaı aımaǵyna álemniń ár túkpirinen 1 mln sheteldik týrıst keledi. Jalpy, Aqmola oblysynyń týrıstik klasterinde 600-den astam kásiporyn bar. Olarda 22 myńnan astam turǵyn jumys isteıdi. 2023 jyly týrısterdi ornalastyrý baǵytynda 16,5 mlrd teńgeniń qyzmeti kórsetildi. Bul 2022 jylǵydan 29% kóp. 2024 jyldyń josparynda 25 mlrd teńgeniń 30 jobasy tur. Onyń syrtynda kýrorttyq aımaqtyń ınfraqurylymyn jetildirý jobalary da iske asady», dedi óńir basshysy Marat Ahmetjanov.
«Býrabaı damý» JShS baspasóz qyzmeti jeltoqsannyń alǵashqy onkúndiginde Býrabaı kýrortynda qysqy maýsymnyń saltanatty jaǵdaıda ashylatynyn málim etti.
«Bıyl kýrorttyq aımaqtaǵy «Qazaqstan Laplandııasy» jańartylyp, esigin aıqara ashyp, qonaqtaryn kezekti márte qarsy alýǵa daıyndyq jumystaryn júrgizip jatyr. Qys mezgilinde Býrabaı jurtshylyqty saf taza aýasymen, konkı, shańǵy tebý, ormanda serýendeý, muzdy oıyp balyq aýlaý syndy maýsymdyq qyzyqtarymen baýraıdy. Býrabaıdyń qys mezgilindegi sulýlyǵy týraly aıtýdyń ózi artyq, ol kez kelgen fototoptamaǵa laıyq», deıdi kýrort qyzmetkerleri.
Kórikti aımaqtyń týrızm áleýetin damytýmen «Býrabaı damý» JShS aınalysady. Prezıdent Is basqarmasyna qarasty kompanııa toǵyz jyldan beri Shýchınsk-Býrabaı kýrorttyq aımaǵyndaǵy týrızmdi damytý qyzmetin kórsetip keledi. Abylaı han alańy saıabaǵyndaǵy mýltımedııalyq ınteraktıvti keshen, vızıt-ortalyq, «Burabay Land» oıyn-saýyq saıabaǵy, haıýanattar baǵy, maral fermasy syndy nysandardyń jumysyn osy kásiporyn baqylaıdy eken.
Byltyr qysqy týrızmge qamdanys barysynda «Býrabaı» ulttyq parkinde 470 tonna shóp, 135 myń býma japyraq daıyndalǵan. Bıylǵy daıyndyq budan da joǵary, qysqy týrızmge tas-túıin ázir ekenin aıtady park qyzmetkerleri.
