Keshe Astanada Qazaqstan, Kýba, Reseı qurama boksshylary bas qosqan oqý-jıyndary aıaqtaldy. BAQ ókilderin arnaıy shaqyrǵan is-sharada úsh eldiń boksshylary sparrıng ótkizdi. Quramanyń bas bapkeri Qaırat Sátjanov boksshylardyń daıyndyǵyna kóńili tolatynyn aıtty.
– Qurama jigitteri jaqsy daıyndaldy. Kýba, Reseı boksshylarymen birlesken oqý-jattyǵý ótkizýdegi áý bastaǵy josparymyz boksshylarymyzdyń Azııa chempıonatyna tolyqtaı daıyn bolyp barýy edi. Jospar oryndaldy. Endi tek nátıje kórsetýimiz kerek, – dedi ol.
Taı elinde Sanjar Táshkenbaı (48 kg), Sáken Bıbosynov (51 kg), Mahmýd Sabyrhan (54 kg), Orazbek Asylqulov (57 kg), Beıbarys Jeksen (60 kg), Muhamedsabyr Bazarbaıuly (63,5 kg), Dýlat Bekbaýov (67 kg), Abylaıhan Júsipov (71 kg), Dıas Moljigitov (75 kg), Erasyl Jaqpekov (80 kg), Bekzat Nurdáýletov (86 kg), Saǵyndyq Toǵambaı (92 kg), Aıbek Oralbaı (+92 kg) syndy sańlaqtar kúsh synasady. Aralarynda osaly joq, «kileń yǵaı men syǵaılar». Aldy Olımpııa oıyndary men álem chempıonattarynda atoı salsa, basqalary talaı dúbirli dodalarda ysylǵandar. Bul joly, tipten, kásipqoı boksshylar da qatarǵa qosylǵan eken. Al osyndaı komandamen Azııanyń aldy bolmaı kór.
Sary qurlyq chempıonatynda 92 kg salmaqta el namysyn qorǵaıtyn Saǵyndyq Toǵambaıdyń aıtýynsha, kil myqtylar bas qosqan oqý-jıynynda biraz jumys atqaryldy.
– Qazaq boksy buryn da, qazir de myqty. Ár salmaqta básekelestik joǵary. Sondyqtan 13 salmaqta el namysyn qorǵaıtyn jigitter baryn salatyny anyq. Kýba men Reseı boksshylarymen ótkizgen oqý-jattyǵý jıynynda ózimizdiń kem-ketikterimizben jumys istedik. Mundaı sparrıngter bizdiń shyńdalýymyzǵa kerek, – dedi S.Toǵambaı.
Byltyr Ammanda ótken Azııa chempıonatyn elimizdiń quramasy 3 altyn, 6 kúmis, 3 qolamen qorytyndylady. Jigitterdiń arasynan Sanjar Táshkenbaı (48 kg), Aslanbek Shymbergenov (71 kg), Aıbek Oralbaı (92 kg) bas júldeni oljalady. Bul kórsetkish jalpy komandalyq esepte kósh bastaýǵa jetkiliksiz boldy. Sebebi О́zbekstan áldeqaıda jaqsy nátıje kórsetti. Olar 5 altyn, 2 kúmis, 3 qolany qorjynǵa saldy. Kórshiles eldiń ókilderi arasynan Hasanboı Dýsmatov (52 kg), Abdýmálik Halokov (57 kg), Rýslan Abdýllaev (63,5 kg), Saıdjamshıd Djafarov (75 kg), Lazızbek Mýllajonovtyń (+92 kg) mereıi ústem boldy. Taıland pen Iordanııaǵa eki, Fılıppınge bir-bir altynnan buıyrdy.
Ol az deseńizder, sońǵy álem chempıonaty men Olımpııa oıyndarynda da ózbekterden oısyraı utyldyq. Bálkim osy joly Qaırat Sátjanov bastaǵan komanda sátsizdiktiń seńin buzyp, syralǵy qarsylastaryn qapy qaldyrar. Jankúıerlerdiń armany osy.
