Sýretti túsirgen – Iýrıı BEKKER
Aıryqsha maqsattaǵy kúshter qolbasshysynyń orynbasary polkovnık Baýyrjan Tańatarov ásker qataryna qosylyp jatqan jas sarbazdardy Otanǵa qaltqysyz qyzmet etýge shaqyryp, árdaıym qyraǵy kúzette bolýǵa úndedi.
Qurmetti jaýyngerler, qasterli Otanymyzǵa qaltqysyz qyzmet etý men qorǵaý – árbir azamattyń qasıetti boryshy. Babalarymyzdyń dańqty jolymen Otanǵa qyzmet etý dástúrin jalǵastyra otyryp, ásker kúzetinde qyzmet ete júrip, elimizdegi árbir otbasynyń tynyshtyǵyn qamtamasyz etesizder. Otandastarymyz el kúzetinde, qyraǵy shekara shebinde áskerı daıyndyǵy joǵary, kúshi myǵym sarbazdardyń turǵanyna senim artady. Aldaǵy bir jyl áskerı qyzmette namys týyn bıikte jelbiretesizder dep senemin. Áskerı jol árbir jaýyngerdiń boıynda myqty erik-jigerdi shyńdaıdy, tózimdilikke tárbıeleıdi. Osy bir jylda dene tárbıesimen qatar kıeli áskerı qyzmettiń qyr-syryna qanyǵyp, mol bilim jınap, kásibı áskerı maman dárejesine jetesizder. Osy kezeńde otbasylaryńyzǵa sabyr men shydamdylyq tileımin», dedi B.Tańatarov.
III dárejeli «Aıbyn» ordeniniń ıegeri, áskerı bólimniń ardageri Qaırat Baqaev jas sarbazdardy Áskerı ant qabyldaý rásimimen quttyqtaýǵa keldi.
«Áskerı daıyndyq pen tártip ár sarbaz úshin úlken erik-jigerdi talap etedi. Otan aldyndaǵy boryshyn óteý, qashanda el qorǵany bolý sezimin arqalap júrý – zor jaýapkershilik. El qorǵany jolynda jas sarbazdarǵa tózimdilik serik bolsyn. Osy abyroıly mindetti adal da asqan jaýapkershilikpen óteı otyryp, Otanǵa, el men jerge degen patrıottyq sezimdi, súıispenshiliktiń jarqyn kórinisin kórsetý jas sarbazdardyń kúshine kúsh, rýhyna rýh qosady dep senemin», dedi ol.
Memlekettik kúzet qyzmet aıryqsha maqsattaǵy kúshteriniń «Batyr» prezıdenttik polki 0111 áskerı bólimi 3-basqarma bastyǵynyń orynbasary maıor Merǵalı Sarymsaqovtyń aıtýynsha, elimizdiń barlyq óńirinen irikteýden ótip kelgen, deneshynyqtyrý daıyndyǵy óte joǵary sarbazdar tańdalǵan. Aldaǵy jyl ishinde 89 sarbaz kásibı daıarlyqtan ótip, ózderin el kúzetiniń alǵy shebindegi myqty jaýynger ekenin kórsetedi. Sarbazdar jedel áskerı qyzmeti barysynda áskerı tájirıbege beıimdelip, áskerı mamandyqtardy meńgeredi.
Ant qabyldaǵannan keıin memlekettik kúzet qyzmetiniń aıryqsha maqsattaǵy kúshteriniń jeke quramy óz mindetterin oryndaýǵa kirisedi. Atap aıtqanda, Memlekettik Tý men Eltańba etalondaryn qorǵap, el Prezıdentiniń qatysýymen ótetin hattamalyq is-sharalardy súıemeldep, aıryqsha kúzetti talap etetin tulǵalar men nysandardyń qaýipsizdigin qamtamasyz etedi. Bul erekshe quramǵa boıynyń uzyndyǵy 180–195 sm, bilimi ortashadan tómen emes, dene bitimi myǵym, 18–27 jasqa deıingi el azamattary irikteledi. Joǵary bilimdi, sporttyq jetistikteri men razrıadtary bar áskerge shaqyrylýshylarǵa basymdyq beriledi.
Áskerı ant qabyldaý barysynda Túrkistan oblysynan kelgen qatardaǵy jaýynger Almat Aqjigit, Almaty oblysy Raıymbek aýdanynan kelgen Jánibek Jambyl «Batyr» polki qatarynda áskerı boryshyn óteýdi mektepte júrgende maqsat etkenin aıtty. Osy sebepti de polk quramyna kirý úshin arnaıy daıyndyq jasap, salada úzdik bolýdy maqsat etip kelgen. Erekshe daıarlyqtan ótken tájirıbeli sarbazdardy aldaǵy ýaqytta kásibı áskerı qyzmet kútip tur. Memlekettik qyzmet kúzetiniń aıryqsha bólimi qatarynda áskerı qyzmetin óteý – batyldyqtyń mektebinen ótýge, er-azamattyń ómirlik jolynda baǵa jetpes jetistik sanalady. Jas sarbazdar áskerı qyzmettiń qyr-syryn, daǵdylaryn ıgerip, áleýmettik, mansaptyq kezeńniń satysynan ótýge múmkindik alady. Áskerı tájirıbeniń osy kezeńinen ótken sarbazdar el qorǵany ǵana emes, qyraǵy kúzette kásipqoı áskerı maman retinde bolashaq mamandardy daıarlaýǵa yqpal etedi. Olar jańa tehnologııalarǵa negizdelgen áskerı tehnıka, sıfrlyq júıemen basqarylatyn qarýly kúsh qurylymdary júıesindegi sheshimderdi úırenip, bolashaqtyń myqty áskerıleri sapynda turady.
Áskerı ant qabyldaý barysynda ofıserlik quram ata-analardy áskerı rejim talaptarymen tanystyryp, jas sarbazdardyń qaýipsizdigin saqtaý, otbasymen kezdesý tártibimen tanystyrdy. Áskerı ant qabyldaǵan sarbazdar bir táýlikke demalysqa ketti.
ALMATY
