Skrınıngtik tekserýlerden ótý, profılaktıkalyq ekpeler alý, taǵy basqa da sebeptermen emhanaǵa kelýi qajet azamattardyń aty-jóni, baılanys nómirleri robotqa engiziledi. Jasandy ıntellekt ár pasıentke habarlasyp, aıqyndaýysh suraqtar qoıý arqyly tekserýlerge shaqyrady. Bul jaǵdaı operatorlarmen baqylaýda bolyp, kúndelikti ózektendirilip otyrady. Qabyldaýǵa kelgender tizimnen óshirilip, ekpin basqa azamattarǵa beriledi.
«Memleket basshysy Qasym-Jomart Toqaev Qazaqstan halqyna arnaǵan Joldaýynda ult saýlyǵyn nyǵaıtý úshin keshendi jumystardy júzege asyrý, densaýlyq saqtaý salasyndaǵy dárigerlik kómektiń qoljetimdiligi men sapasyn jaqsartý, damytý qajettigin atap ótti. Sondaı-aq Prezıdent sıfrlandyrý salasynda qol jetkizgen jetistikterdi eseleı túsý, elimiz jasandy ıntellektini keńinen qoldanatyn, sıfrlyq tehnologııalardy damytyp jatqan elge aınalýy qajettigin aıtty. Bul baǵytta qalalyq emhanada júzege asyrylyp jatqan ınnovasııalyq jumystar az emes. Aldaǵy ýaqytta jasandy ıntellektini aqparattyq júıemen baılanystyrý josparlanǵan. Ol júzege asqan jaǵdaıda, tikeleı pasıentpen sóılesý arqyly oǵan yńǵaıly ýaqytqa – kúnin, saǵat, mınýtyna deıin kórsetip jazýǵa múmkindik týady. Eger pasıent qabyldaýǵa kele almaı qalǵan bolsa, jasandy ıntellekt avtomatty túrde qaıta baılanysqa shyǵady. «Nege kele almadyńyz?», «Sizdi qaıta qaı kúnge, qaı ýaqytqa jazaıyq?» dep surap, dáriger qabyldaýyna qaıta jazady. Bul endi aldaǵy ýaqyttyń enshisindegi jumystar. Qazir biz birinshi kezeńge qatysty jumys júrgizip jatyrmyz», deıdi Túrkistan qalalyq emhanasynyń basshysy Raıymbek Tasyrbaev.
Emhanadaǵy jasandy ıntellektiniń mınýtyna 5 myń, al kúnine 100 myń azamatqa habarlasýǵa qýaty jetedi eken. Búginge deıin 3 aı kóleminde 27 769 azamatqa qońyraý shalǵan. Onyń ishinde 7500 azamat kelisim berip, tekserýden ótken. Al 2929-y qabyldaýǵa kelýden bas tartqan. Azamattarmen habarlasýdyń ortasha uzaqtyǵy bir mınýt kóleminde. Sondaı-aq emhana basshysy medısına salasyndaǵy aqparattyq júıelerdi ǵana emes, keń taraǵan «Google» platformasyndaǵy Excel kestesi tetikterin paıdalanyp jatqanyn aıtady.
«Deni saý ana – deni saý urpaq!» ustanymyn eskeretin bolsaq, eń aldymen ananyń júktilikke deıingi hal-jaǵdaıy óte mańyzdy bolyp keledi. Osy turǵyda áıelderdiń aqparattary konfıdensıaldy túrde júrgizilip, medısına salasyndaǵy aqparattyq júıelerdi ózara ushtastyrdyq. «Google Docs» baǵdarlamasy arqyly onlaın rejimde áıelderdiń, onyń ishinde týý jasyndaǵy áıelder men júkti áıelderdiń densaýlyqtaryn baqylaý múmkinshiligimiz bar. Iаǵnı barlyq áıeldiń derekterin sol «Google Docs» baǵdarlamasyna engizgenbiz. Zerthanalyq, aspaptyq tekserýler, beıindi mamandardyń konsýltasııalary, áıelderdiń derbes erekshelikteri týraly da aqparat engiziledi. Ár dáriger, ár meıirger qaraýyndaǵy áıeldiń málimetin bazaǵa engize alady. Málimettiń tolyqqandylyǵy, dáıektiligi birinshi orynda bolady. Biz ony kórip otyramyz. Búginge deıin qaı áıel qaraldy, qaısysy qaralmady degen suraqtarǵa tez ári ońaı jaýap ala alamyz. Sol onlaın rejimdegi keste arqyly baqylaý júrgizemiz. Bul óz kezeginde monıtorıng jasaýǵa, synı jaǵdaıdaǵy áıelderdiń, aýyr jaǵdaıda aýrýhanaǵa jetkiziletin júkti áıelderdiń sanyn azaıtýǵa kómektesedi. Ana men bala óliminiń aldyn alýǵa múmkindik beredi. Osylaısha, júkti áıelderdiń jaǵdaıyn baqylaý eń birinshi orynǵa qoıylǵan», deıdi emhana basshysy.
Sıfrlandyrýdaǵy mundaı jumys ázirge qalalyq emhanadan basqa eshbir medısınalyq mekemede joq eken. Bul jańashyldyq áıelderdiń aýyr jaǵdaıda perınataldyq ortalyqtarǵa túsýi, erte bosanýdyń azaıýyna alyp kelip otyr.
Qalalyq emhanaǵa kelýshi azamattarǵa medısınalyq qyzmetti paıdalaný yńǵaıly ári sapaly bolýy úshin pasıent marshrýty barynsha jeńildetilgen. Oǵan qosa koll-ortalyǵy jumys isteıdi. Nátıjesinde, emhanada kelýshiler dáriger qabyldaýyn kútip, uzyn-sonar kezekte otyrmaıdy. Sondaı-aq aımaqtyq dárigerdiń júktemesin azaıtý maqsatynda keńeıtilgen praktıkadaǵy meıirgerler jumysy iske qosylǵan. Nátıjesinde, azamattar barlyq qaǵazbasty jumystaryn meıirger kómegimen tyndyrady. Oǵan qosa zerthanalyq, aspaptyq tekserýlerge joldama syndy qyzmetter de aımaqtyq meıirger kómegimen oryndalady, dárigerdiń júktemesi azaıady. Osylaısha, aımaqtyq dárigerdiń qabyldaýyn qajet etetinder, ıaǵnı aýyryp kelgender, sozylmaly aýrýdyń órshý satysynda emine korreksııa talap etetin azamattar kedergisiz kómek ala alady.
«Emhanada engizilgen jańashyldyqtardyń, júıeli jumystardyń qanshalyqty nátıjeli bolǵandyǵyn ótken jyldyń jáne bıylǵy jyldyń 9 aıyndaǵy jalpy tájirıbelik dárigerler men meıirbıkelerdiń qabyldaý sanyn salystyryp qaraǵanda ańǵarý qıyn emes. О́tken jyldyń 9 aıynda aımaqtyq dárigerler – 155647, meıirgerler 5647 qyzmet kórsetken. Bul jalpy qyzmettiń 3 paıyzyn quraıdy. Bıyl 9 aıdyń qorytyndysynda aımaqtyq dárigerlerdiń enshisinde 159557 qyzmet bolsa, meıirgerler tarapynan kórsetilgen qyzmet sany 32271-ge jetti, bul jalpy qyzmettiń 20 paıyzyn quraıdy. Keıingi úsh jyldyń 9 aılyq kórsetkishterin salystyra otyryp, jyldan-jylǵa aýrý kórsetkishteriniń tómendegenin anyqtaı alamyz. Mysaly, birinshi ınsýlt jaǵdaılary 2022 jyly – 85, 2023 jyly – 73, 2024 jyly – 70. Al qaıtalama ınsýlt alýshylar 2022 jyly – 51, 2023 jyly – 40, 2024 jyly 38 jaǵdaıǵa deıin azaıǵan. Mıokard ınfarktisi 2022 jyly – 40, 2023 jyly – 38, 2024 jyly – 39 jaǵdaı. Al qaıtalama mıokard ınfarktisi 2022 jyly – 8, 2023 jyly – 6, 2024 jyly 5 jaǵdaıǵa deıin tómendegen», deıdi R.Tasyrbaev.
Emhanada azamattarmen keri baılanystyń qoljetimdiligi úshin telegram-bot (@turkistanpoliklinicabot) engizilgen. Onda emhana týraly barlyq aqparatty alýǵa bolady. Halyq arasynda jıi qoıylatyn suraqtardyń jaýabyn alý ońaılatylǵan. Botqa ońaı qosylý úshin QR-kodtar qalalyq emhananyń barlyq bólimshelerinde qoljetimdi jerlerge ilingen. Iаǵnı keri baılanys jyldam júrgiziledi. Osy arqyly bıyl 51 ótinim kelipti. Onyń basym kópshiligi aqparattyq suraqtar. Jalpy, ótken jyly 9 aıda – 2, bıyl 9 aıda 2 aryz-shaǵym túsken. Emhana basshysynyń málimdeýinshe, zerdeleýdiń qorytyndysynda bıylǵy aryzdyń ekeýi de negizsiz dep tanylǵan.
TÚRKISTAN
