Ýnıversıtet delegasııasy, basqarma tóraǵasy – rektor Sáýle Rahmetýllına, ǵylym jáne ınnovasııalar jónindegi prorektor Jadyra Qońyrbaeva, akademııalyq máseleler jónindegi prorektor Ásııa Mashekenova Qytaıdyń Tıanszın qalasynda ótken «World TVET League»-diń alǵashqy Bas assambleıasy men Dúnıejúzilik tehnıkalyq jáne kásiptik bilimniń damýy jónindegi konferensııaǵa qatysty. Aýqymdy is-shara kásibı bilimdegi ınnovasııalyq tásilder men úzdik tájirıbelerdi talqylaýǵa arnalǵan halyqaralyq alań usyndy. ShQTÝ ókilderi konferensııada joǵary tehnıkalyq jáne kásiptik bilimdi damytýdaǵy ýnıversıtettiń jetistikterin tanystyryp, saladaǵy jahandyq seriktestikke úles qosty. Bul qadam ShQTÝ-dyń bilim sapasyn jańa deńgeıge kóterip, álemdik deńgeıdegi seriktestikterdi nyǵaıtýǵa baǵyttalǵan strategııalyq josparlarynyń mańyzdy bóligi bolyp otyr.
«Biz úshin elimizdi álemdik bilim platformasynda usyný – úlken qurmet. «World TVET League»-ke qatysý ýnıversıtetimizdiń bilim úderisine eń úzdik halyqaralyq tájirıbelerdi engizýge, sondaı-aq osy tájirıbelerdi negizge ala otyryp, joǵary bilim sapasyn jaqsartýǵa kómektesedi», dep atap ótti ShQTÝ rektory Sáýle Rahmetýllına.
Shyǵys Qazaqstan tehnıkalyq ýnıversıteti «World TVET League»-ke qatysý arqyly halyqaralyq yntymaqtastyqtyń jańa kezeńine qadam basty. Eńbek naryǵyndaǵy jahandyq ózgerister bilim júıesin jańasha beıimdeýdi talap etedi. Al lıga aıasyndaǵy seriktestik ýnıversıtetke bul mindetti tıimdi oryndaýǵa múmkindik beredi. ShQTÝ osy yntymaqtastyq arqyly jańa bilim tehnologııalaryn engizýdi jáne halyqaralyq baılanystardy nyǵaıtýdy kózdeıdi. Bul – ShQTÝ úshin ǵana emes, elimizdiń bilim júıesi úshin de mańyzdy jetistik. «World TVET League»-men seriktestik ornatý elimizdiń eńbek naryǵyndaǵy jahandyq suranystarǵa beıimdelý qabiletin arttyrady degen senim mol.
