Qazaq kúresinen álemdik saıys ótkizýdegi maqsat – qazaq kúresin halyqaralyq deńgeıde nasıhattaý, álem elderiniń arasynda sporttyq baılanysty nyǵaıtý, túrki áleminiń mádenı murasyn tanytý. Saltanatty ashylý rásiminde sóz alǵan Túrkistan oblysy ákiminiń orynbasary Ertaı Altaev Memleket basshysy Joldaýynda buqaralyq sportty damytý men halyqtyń densaýlyǵyn jaqsartý máselesine erekshe kóńil bólgenin aıtyp, keıingi ýaqytta óńirde sport salasy qarqyn alyp kele jatqanyn atap ótti.
«Túrki áleminiń rýhanı astanasy, qasıetti Túrkistan tórinde qazaq dalasynyń batyry, kúsh atasy Qajymuqan Muńaıtpasuly atyndaǵy qazaq kúresinen eresekter arasyndaǵy álem kýboginiń ótýi zańdylyq. Qajymuqan men qazaq kúresi – egiz uǵym. Qazir álemniń 40-tan astam memleketinde ulttyq kúresimizden federasııalar qurylyp, jumys júıeli júrgizilip keledi. Búginge deıin 10 ret álem chempıonaty, 12 márte Azııa chempıonaty, 6 ret álem kýbogi, 6 márte Eýropa chempıonaty ótkizilip, tól kúresimiz damýdyń jańa deńgeıine kóterildi. Bul is-sharalardyń barlyǵy buqara halyq arasynda salamatty ómir saltyn, ulttyq sportymyzdy nasıhattaýǵa serpin beredi», dedi E.Altaev.
Qajymuqan Muńaıtpasulynyń júldesine arnalǵan dodanyń baǵdarlamasyna sáıkes, balýandar 55, 60, 66, 74, 82, 90, 100, +100 kg salmaq dárejesinde beldesti. Elimizdiń sańlaqtary 7 altyn, 5 kúmis, 10 qola medal enshilep, jalpy esepte kósh bastasa, Grýzııa sportshylary 1 altyn, 1 kúmis, 1 qola medalmen 2-satyǵa jaıǵasty, úshtikti 1 kúmis, 2 qola medal buıyrǵan Mońǵolııa balýandary túıindedi. Álem kýboginde chempıon atanǵan balýandar 500 myń, kúmis júldegerler 300 myń, qola medal buıyrǵan sańlaqtar 200 myń teńge qarjylaı syıaqy aldy. Týrnırdiń úzdik balýany atanǵan Ákejan Bilálovke (66 kg) erekshe qurmet kórsetilip, avtokólik syıǵa tartyldy.
