Májilistiń qaraýyna birinshi oqylymda depýtattar bastamashy bolǵan «Poshta týraly» zańǵa ózgerister men tolyqtyrýlar engizý usynyldy. Bul ózgerister poshta baılanysy naryǵyn damytýǵa, poshta jóneltilimderin jetkizý mehanızmderin jeńildetýge jáne jetildirýge, poshtomattardy ornalastyrý tártibin naqtylaý men poshta salasyndaǵy ýákiletti organnyń qyzmetin jetildirýge baǵyttalǵan.
Sonymen qatar Májiliske depýtattar ázirlegen «Mádenıet týraly» zańǵa ózgerister engizý jónindegi taǵy bir zań jobasyn talqylaý usynylady. Qujatta qazaq tilin mádenı qundylyq retinde saqtaý jáne qorǵaý boıynsha birqatar zańnamalyq sharany qabyldaý kózdelgen. Sondaı-aq jastardyń ǵylymı jáne bilim berý áleýetin yntalandyrýǵa baǵyttalǵan normalar, jetim balalar men ata-anasynyń qamqorlyǵynsyz qalǵan balalarǵa tálimgerlik ınstıtýtyn retteý máseleleri engizilgen.
Májilis kún tártibiniń jobasynda dıplomatııalyq qyzmet máseleleri jónindegi zań jobalary, sondaı-aq Eýrazııalyq ekonomıkalyq odaq pen oǵan múshe memleketter arasyndaǵy Iranmen jáne Sıngapýrmen erkin saýda týraly kelisimderdi ratıfıkasııalaý týraly zań jobalary bar. Ekinshi oqylymda Ákimshilik quqyq buzýshylyq týraly kodekske ózgerister men tolyqtyrýlardy, sondaı-aq olardy Konstıtýsııa normalaryna sáıkestendirý máseleleri boıynsha túzetýlerdi talqylaý usynylady.
