Bul medal – Álisherdiń jazda jasaǵan batyl áreketiniń baǵasy. 9 maýsym kúni saǵat túngi on birler shamasynda qaladaǵy jaǵajaıda serýendep júrgen efreıtor sýǵa batyp bara jatqan áıeldi baıqap qalady. Oılanbastan, dereý kómekke júgiredi. Oqıǵa kýágerleri jedel járdem shaqyryp jatqanda áskerı qyzmetshi sýǵa kúmp berip, áıel batyp bara jatqan jerge jyldam júzip jetedi. Áıeldi birden jaǵaǵa shyǵaryp, tynys alýyn jeńildetetin, ómirin saqtap qalýǵa kómektesetin alǵashqy reanımasııalyq is-sharalardy da jasap úlgeredi. Essiz jatqan áıeldiń kishkentaı uly da sol jerde edi. Ol anasynyń aýyr halde jatqanyn kórip, óz-ózine kele almaı jylaı bastaıdy. Anasyna alǵashqy kómek kórsetkenine kóz jetkizgen Álisher balasyn da polısııa men jedel járdem kelgenge deıin tynyshtandyrǵan.
– Búgin biz efreıtor Álisher Asylbekovke qurmet kórsetip jatyrmyz. Ol naǵyz batyldyq pen janqııarlyq tanytyp, qyzmetten tys ýaqytta jazataıym oqıǵanyń aldyn aldy. Onyń áreketi barshamyz úshin úlgi jáne IIM Ulttyq ulany áskerı qyzmetshileriniń kez kelgen jaǵdaıda adamdardy qorǵaýǵa daıyn ekenin kórsetedi, – dedi 5514 áskerı bóliminiń komandıri Á.Mansurov.
Efreıtor Ulttyq ulan qatarynda 2022 jyldyń mamyr aıynan bastap qyzmet etip keledi. Osy ýaqyt ishinde ózin jaýapty ári adal jaýynger retinde kórsetken ol oqys oqıǵadaǵy óziniń rólin batyrlyq emes, negizgi mindeti dep sanaıtynyn aıtady.
– Meniń ornymda kim bolsa da dál osylaı isteıtin edi dep oılaımyn. Kórip turyp áreket etpeý – múmkin emes. Túngi ýaqyt, jaryqtyń álsizdigi men aǵystyń qattylyǵy jaǵdaıdy biraz qıyndatty, biraq ony der kezinde jaǵaǵa shyǵaryp úlgerdim. Sý adamnyń kúshin tez alady, sondyqtan tez áreket etý kerek bolatynyn jaqsy túsindim. Qaýipsiz jerge shyqqasyn da oǵan alǵashqy medısınalyq kómek kórsete aldym. Sol sáttegi bar oıym, áıeldi tek aman alyp qalý ǵana edi, – deıdi ol.
Ulttyq ulan qyzmetiniń ajyramas bóligine aınalǵan adaldyq pen qaısarlyqty kórsetken sertine berik sarbazǵa seriktesteri de dán rıza. Sebebi Álisherdiń áreketi – áskerdegi áriptesterine ǵana emes, ózgelerge de úlgi-ónege.
