Nurálıdiń aıtýynsha, oıynnyń basty maqsaty – jasóspirimderge jemqorlyqtyń zııanyn túsindirý ári oǵan qarsy turý mádenıetin qalyptastyrý. Ol osy arqyly mektep oqýshylaryn adaldyq pen ádildikke baýlýdy kózdeıdi.
Oıyn sıýjeti tanymal epostyq keıipker Alpamys batyrdyń beınesine negizdelgen. Alpamys túrli synaqtan ótip, ádildik pen parasattylyqty saqtap, jemqorlyqqa qarsy turady. Árbir deńgeıde oıynshy óziniń adal áreketteri arqyly ǵana jeńiske jete alady. Oıyn kvest formatynda jasalǵan. Oıynshy ózine jasyryn agent nemese jýrnalıst rólin tańdaı alady. Sondaı-aq tergeýdi sot, prokýror, memlekettik qyzmetshilerdiń qaısysyna qatysty júrgizetinin de ózi sheshedi. Eń basty maqsat – jemqorlyqty áshkereleý.
Oqýshynyń bul jobasy muǵalimder men synyptastary arasynda qyzyǵýshylyq týdyryp, úlken qoldaýǵa ıe boldy. Jezkent mektep-lıseıiniń ákimshiligi de Nurálıdiń bastamasyn joǵary baǵalap, onyń jobasyn ári qaraı jetildirýine jaǵdaı jasaýdy josparlap otyr. Qazirgi ýaqytta oıyn mektepte quqyq negizderi sabaǵynda tájirıbe jumysy retinde engizilgen. Muǵalimder mundaı ádisti oqýshylardyń quqyqtyq bilimin arttyrý, jemqorlyqqa qarsy mádenıetin qalyptastyrý turǵysynan tıimdi dep baǵalap otyr.
Nuralıdiń aıtýynsha, oıynnyń rýhanı mazmunyna erekshe nazar aýdarylǵan. Joba avtory aldaǵy ýaqytta ár deńgeıge Abaıdyń qarasózderin engizip, tárbıelik mańyzyn arttyrýdy da kózdep otyr. Sonymen qatar ol oıynnyń mobıldi nusqasyn qazaq, orys, aǵylshyn tilderinde usynýdy josparlap otyrǵanyn aıtty.
«Oıyn elimizdegi naqty oqıǵalarǵa negizdelgen kórkem roman formatynda jasalǵan. Ár epızodta Qylmystyq kodekske túsindirme berilip, oqýshylardyń quqyqtyq saýaty arttyrylady. Al oıyn sońynda kóp upaı jınaǵan oıynshy jeńimpaz atanady», deıdi Nurálı.
Aıta keteıik, jas ónertapqysh jobany damytýǵa byltyr I respýblıkalyq sybaılas jemqorlyqqa qarsy jobalar baıqaýynda jeńip alǵan 1 000 000 teńge syıaqysyn jumsaǵan. Sol arqyly oıynnyń tehnıkalyq múmkindigin jaqsartyp, onyń kópke qoljetimdi bolýyna múmkindik jasaǵan.
Qoǵamdaǵy jemqorlyqqa qary kúres máselesi – kún tártibinen túspeıtin ózekti taqyryp. Nurálıdiń oıyny osy baǵytta jasalǵan ıgi qadamdardyń biri deýge bolady. Bolashaǵynan úlken úmit kúttiretin oqýshy jobasy tanymal bolyp, qoǵamdy ózgertýge úles qossa eken deıdi.
