- Polshanyń Tomashýv-Mazovesk qalasynda konkıden jasóspirimder arasyndaǵy Álem kýboginiń kezeńdik saıysy aıaqtaldy. Bul jarysta 500 metrlik qashyqtyqty 41.30 sekýndta júgirip ótken Arına Ilıashenko kúmis medaldi ıelendi. Jerlesimiz tek ıtalııalyq Djordjııa Aıelodan (40.16) qalyp qoıdy. Qola medaldi germanııalyq Marlın Ehselýns (41.37) enshiledi.
- Fýtzaldan ÝEFA Chempıondar lıgasynyń «Tórttik fınalynda» óner kórsetetin komandalar tolyqtaı anyqtaldy. Dúbirli dop dodasynda Almatynyń «Qaıratynan» bólek, Ispanııanyń «Palma» men «Kartahena», Portýgalııanyń «Sportıng» klýbtary kúsh synasady.
- Bıbisara Asaýbaeva FIDE-niń úsh birdeı álemdik reıtınginde jeke-dara kósh bastady. Daryndy qyz 20 jasqa deıingi oıynshylar arasynda klassıkalyq shahmattan, rapıd, blısten birinshi orynda tur. Al áıelder arasynda ol 13-satyǵa jaıǵasty. Sondaı-aq Bıbisara eresekterdiń rapıdi (9-oryn) men blısinde (7-oryn) TOP-10 shahmatshynyń sanatyna erkin enip otyr.
- 12-15 jeltoqsan aralyǵynda Slovakııada shaıbaly hokkeıden 2026 jyly alaýy tutanatyn qysqy Olımpııa oıyndarynyń irikteý týrnıri ótedi. Sol jarysta elimizde áıelder quramasy baq synaıdy. Negizgi irikteý synyna joldama alý jolynda jerlesterimiz Slovakııa, Islandııa, Slovenııamen saıysqa túsedi.
- Jeńil salmaqta kúsh synasyp júrgen 33 jastaǵy qazaqtyń kásipqoı boksshysy Abylaıhan Qusaıynov 28 jeltoqsanda Qytaıdyń Haıkoý qalasynda jergilikti bylǵary qolǵap sheberi Ionkıang Iаngpen judyryqtasady. Qos sańlaq WBO Inter-Continental nusqasy boıynsha altyn belbeýge talasady.
- Frıstaıl-akrobatıkadan elimizdiń quramasy jańa maýsymǵa daıyndyqty Shymbulaqta bastady. 5 jeltoqsanda olar Fınlıandııada ótetin Eýropa kýbogine qatysady. Jastar kelesi jyldyń qańtar aıynda Almatyda jalaýy jelbireıtin álem birinshiliginde baq synaıdy. Atalǵan básekelerde Sherzod Hashırbaev, Roman Ivanov, Dinmuhammed Raıymqulov, Ulanbákir О́mirzaqov, Asylaqyn Asan, Ardana Mahanova, Aıana Joldasqa aıryqsha senim artylyp otyr.
- Fýtboldan 2025 jyly ótetin klýbtyq álem chempıonatyna qatysatyn barlyq 32 komanda anyqtaldy. Olar – «Chelsı», «Real», «Manchester Sıtı», «Bavarııa», «PSJ», «Inter», «Borýssııa», «Portý», «Atletıko», «Benfıka», «Iýventýs» «Red Býll Zalsbýrg», «Palmeıras», «Flamengo», «Flýmınense», «Botafogo», «Rıver Pleıt», «Boka Hýnıors», «Monterreı», «Sıetl», «Leon», «Pachýka», «Inter Maıamı», «Al-Hılıal», «Ýrava Red», «Al-Aın», «Ýlsan», «Ál Ahlı», «Vıdad», «Sandaýnz», «Týnıs», «Oklend Sıtı» klýbtary. Atalǵan dop dodasynyń jerebesi 5 jeltoqsanda tartylady.
- Semserlesýden elimizdiń jastar quramasy Gongkongta jalaýy jelbirgen Álem kýboginiń komandalyq saıysyn kúmis medalmen qorytyndylady. Quramynda Bogdan Lýkın, Kırıll Prohodov, Georgıı Tınnıkov, Nurjan Ábjanov syndy saıypqyrandary bar jerlesterimiz BAÁ, Ońtústik Koreıa, Gongkongty utyp, fınalda Qytaıǵa bir ǵana upaı aıyrmashylyǵymen ese jiberdi.
- Fýtzaldan elimiz kýboginiń jerebesi tartyldy. 21-24 jeltoqsan aralyǵynda Aqtaýda jalaýy jelbireıtin jarysta myna klýbtar ózara sheberlik baıqasady: A toby – «Semeı», «Tulpar», TChE-14, «Báıterek». B toby – «Jetisý», «Ordabasy», «Bıosfera», «Aıat». C toby – «Kaspıı», «Alataý», BS, «Aqtóbe». D toby – «Qaırat», «Atyraý», «Omega», «Astana».
