Jataqhana «Qarjy ortalyǵy» AQ jáne Ǵylym jáne joǵary bilim mınıstrliginiń qoldaýymen júzege asyp jatqan «Bes áleýmettik bastama» memlekettik baǵdarlamasy negizinde qolǵa alynyp otyr. Jobany «Forum Invest» jáne «EPC Stroy Group» qurylys kompanııasy qarjylandyrady.
Q.Sátbaev ýnıversıteti qurylys departamentiniń dırektory Rıshat Tynybekovtiń aıtýynsha, 9 qabatty jataqhana 955 orynǵa arnalǵan. Zamanaýı ǵımaratta jastar úshin jaǵdaıdyń barlyǵy qarastyrylady.
«EPC Stroy Group» kompanııasynyń basshysy Erlan Qojyqov kompanııanyń Q.Sátbaev ýnıversıtetimen áriptestigin quptaı otyryp, «Elimizdegi jastardyń sapaly bilim alýyna qolaıly jaǵdaı jasaý úshin ınvestısııa salýǵa daıynbyz. Qurylys barysynda ekologııalyq taza jáne energııany únemdeıtin materıaldar qoldanylatyn bolady. Seısmıkalyq normalardy saqtaı otyryp, jańa ǵımaratty 2026 jyldyń aqpan aıynda paıdalanýǵa berýdi josparlap otyrmyz», dedi ol.
Is-sharaǵa ýnıversıtet qamqorshylyq keńesiniń tóraǵasy, professor Ulyqpan Sydyqov, oqý ornyndaǵy aqsaqaldar keńesi men rektorlar keńesinen professor Ábdiǵappar Áshimov, Almaty qalasy ákimdiginiń Jastar saıasaty bóliminiń meńgerýshisi Azız Qajdenbek, «Qarjy ortalyǵy» AQ Almaty qalasyndaǵy ókildiginiń dırektory Ulan О́tebaev, «EPC Stroy Group» kompanııasynan Dınara Baıymbetova, oqytýshylar men stýdentter qatysty.
Innovasııalyq jáne tehnıkalyq bilim berýdegi jetekshi oqý orny retinde damyp kele jatqan Q.Sátbaev atyndaǵy QazUTZÝ stýdentterge jaıly jataqhanamen qatar zamanaýı zerthanalardy jabdyqtaý isinde de ilkimdi jobalardy júzege asyryp jatyr.
ALMATY
