Jeńimpazdarǵa – jeńildikter

Qazaq gýmanıtarlyq zań ýnıversıtetinde Qazaqstan halqy Assambleıasynyń qamqor­lyǵymen elimizdiń ár aımaǵynan myńnan astam mektep túlegi qatysqan «Bir el – bir taǵdyr» atty respýblıkalyq ıntellektýaldy shyǵarmalar baıqaýy ótti. Bul baıqaý QHA-nyń 20 jyldyǵyna oraılas­tyryldy. Baıqaý úsh kezeńnen turdy. Alǵashqy kezeńde mektep oqýshysy «Bir el – bir taǵdyr» taqyrybynda ózi qalaǵan orys nemese qazaq tilinde esse jazyp jiberýi tıis edi. Bul rette, atalǵan taqyryp Qazaqstan halqy Assambleıasy tarapynan usynylǵanyn aıta ketý kerek. Jalpy, baıqaýǵa usynylatyn taqyryptar memleket jáne ony basqaryp otyrǵan Elbasy  tarapynan júrgizilip kele jatqan saıasatpen tyǵyz baılanysty.  Qazaq gýmanıtarlyq zań ýnıversıtetiniń prezıdenti Maqsut Nárikbaev jyl saıyn ótkizilip turatyn sharaǵa byltyr 600-den astam mektep túlegi  qatyssa, bıyl olardyń sany myńnan asqanyn jetkizdi. Sonyń ishinen 250 jumys tańdap alynyp, kelesi kezeńderge jiberilgen. Assambleıa usynǵan taqyrypta esse jazýdan jeńimpaz atanǵan Mahabbat esimdi qyz balamen sóıleskenimizde ol bylaı dedi: «Meniń oıymsha, bul el jasóspirimderiniń óz darynyn kórsetýine jáne úzdik oqý ornyna túsýine úlken múmkindik». Al ózin Valerııa dep tanystyrǵan qaraǵandylyq stýdent  byltyr jeńimpaz atanyp, grantqa ıe bolǵanyn alǵa tartty. Birinshi synaqtan súrinbeı ótkender «QazGZÝ» AQ korpýsynda Qazaqstan tarıhy páninen kompıýterlik testileý nysanynda emtıhan tapsyrdy. Úshinshi sheshýshi kezeńde mektep túlekteri komıssııa múshelerimen suhbattasty. Komıssııa músheleri quramynda Qazaqstan halqy Assambleıasynyń ókilderi  – Parlament Májilisiniń depýtaty Zýhra Saıapova, «Qoǵamdyq kelisim» MM qyzmetiniń basshysy Nurbek Shaıahmetov, L.N.Gýmılev atyndaǵy Eýrazııa ulttyq ýnıversıtetiniń ókilderi Jandarbek Málibekov, Zııabek Qabyldınov jáne de Qazaq gýmanıtarlyq zań ýnıversıtetiniń Qazaqstan tarıhy jáne jalpy bilim berý kafedrasynyń professorlary Jánııa Qusaıynova men Lepýda Muqataeva boldy. M.Nárikbaev sóz reti kelgende komıssııa músheleriniń, balalar eńbegin baǵalaýda ashyqtyq pen ádildikke júginetinine senim bildirdi. Jyl saıyn mundaı sharalardy ótkizýdegi basty maqsat aýyldaǵy talantty balalardy iriktep,  tegin bilim berýge tartý ekenin de atap kórsetti. Biraq balalar da sol tegin bilimdi ózderiniń kórsetkishterimen aqtaýy tıis, eger olaı bolmaǵan jaǵdaıda, olardyń ornyn basqalary basatyn bolady, dedi rektor. Bul rette, ýnıversıtet 100 mıllıon teńge kóleminde granttar men jeńildikter túrinde stýdentterge qarjylyq kómek kórsetip kele jatqandyǵyn aıta ketý kerek. Sonymen, belgilengen úsh kezeńnen súrinbeı ótken ıntellektýaldy baıqaýdyń 10 jeńimpazyna saltanatty túrde Qazaq gýmanıtarlyq zań ýnıversıtetinde tegin bilim alý granty tapsyryldy. Budan basqa, baıqaýdyń erejesi boıynsha barlyq qatysýshyǵa 10 paıyzdyq jáne ekinshi kezeńge ótkenderge 20 paıyzdyq jeńildikter beriletin boldy. Asqar TURAPBAIULY, «Egemen Qazaqstan».