Alqaly jıynda Prezıdent janyndaǵy Ulttyq ǵylym akademııasynyń prezıdenti, akademık Aqylbek Kúrishbaev aýqymdy baıandama jasap, otandyq ǵylymnyń damýy men ǵylymı yqpaldastyq, jas ǵalymdardy úılestirý salasyndaǵy mańyzdy isterge toqtaldy.
«Qazir Memleket basshysynyń tapsyrmasyna sáıkes, álemdegi 20 jetekshi akademııa tájirıbesin taldaı otyryp, aldaǵy 10 jyldyq damý strategııasyn ındıkatorlarmen aıqyndaǵan naqty úlgi jasadyq. Oǵan bar resýrstardy paıdalanyp, qandaı nátıjelerge qol jetkizýge bolatynyn zerttedik. Buǵan deıin ǵylym salasyndaǵy oryn alǵan olqylyqty anyqtap, basymdyqtar aıqyndaldy», dedi A.Kúrishbaev.
Baıandama barysynda UǴA basshysy alǵash ret ǵylymdy damytýǵa negizdelgen forsaıt-zertteýler, otandyq ǵylymnyń naqty jaı-kúıin baǵalaıtyn taldaý ortalyǵynyń jumys nátıjesi týraly aıtty. 2025–2027 jyldarǵa arnalǵan ǵylymı-tehnıkalyq tapsyrys barysyna saraptama jasaldy. Mınıstrlikterge salalyq ǵylymdy damytýda naqty keńester berilip, túıtkildi máseleleri boıynsha akademııa prezıdıýmy kóshpeli otyrys ótkizdi. Mundaǵy maqsat – aımaqtardaǵy jergilikti bılik tarapynan da ǵylymdy qoldaýǵa jarqyn bastamalardyń bolǵany mańyzdy. Osy jumystardyń nátıjesinde analıtıkalyq jazbalar, jol kartasy daıyndaldy. Bıyl alǵash ret akademııa janynan «Jas ǵalymdar» keńesi quryldy. Onyń quramyna 20-dan astam jetekshi jas ǵalym engen. Keńes quramyndaǵy ombýdsmen jas ǵalymdardyń máselelerine usynys berip otyratyn bolady.
Sondaı-aq elimizge belgili ǵalymdar Serikbek Dáýkeev, Ábdirasyl Jarmenov, Kárimbek Qurmanálıev, Asqarbek Qusaıynov, Baqytjan Jumaǵulov, Rahman Alshanov, Vıacheslav Lokshın, Nurlan Ryspanov jáne taǵy da basqa ǵalymdar akademııa prezıdentiniń baıandamasyna qatysty oılaryn ortaǵa salyp, maqsat-mindetine baılanysty usynys aıtty. Ásirese jas ǵalymdardy qoldaý, olarǵa áleýmettik jaǵdaı jasaý, zerthanalardy zamanaýı jabdyqtaý, orta bilimniń sapasyn arttyrý sııaqty bir-birinen bóle jaryp qaraýǵa bolmaıtyn keleli máselelerdi aǵa ǵalymdar naqty dáleldermen jetkizdi. Osy baǵytta halyqaralyq birlesken jobalardyń mańyzyna ıek artqan abzal.
Búginde Prezıdent janyndaǵy Ulttyq ǵylym akademııasy men Qytaı, Amerıka, Túrkııa, Reseı, TMD elderiniń jetekshi ǵylym akademııalary arasynda yntymaqtastyq týraly kelisimge qol qoıylǵan. Sonymen birge Germanııa, Ońtústik Koreıa jáne Qytaımen birlesken 3 halyqaralyq ortalyq quryldy. Jetekshi 8 akademııanyń tájirıbesi negizinde ǵylymı etıka kodeksi – ǵylymı zertteýlerdi júrgizý standarty daıyndaldy. Falsıfıkasııany, plagıaty, múddeler qaqtyǵysyn jáne jalǵan birlesken avtorlyqty anyqtaýdyń qaǵıdattary bekitildi.
Aldaǵy ýaqytta Ulttyq ǵylym akademııasy men ǵylymı birlestiktikter birlesip jumys isteýge daıar. Ásirese jas ǵalymdarǵa kóp qoldaý kórsetiledi. Sonymen qatar ǵalymdar ǵylymı tehnologııalyq damý maqsatynda qol qoıylǵan memorandýmdarǵa sáıkes jol kartasy aıasyndaǵy jumystaryn jalǵastyra beredi.
ALMATY
