Ol QazMÝ-diń sońǵy kýrsynda «Sosıalıstik Qazaqstan» (qazirgi «Egemen Qazaqstan») gazetine kishi ádebı qyzmetker bolyp ornalasty. Sodan basylymda 36 jyl eńbek etip, zeınetkerlikke shyqty. Bólim meńgerýshisi, redaksııa alqasynyń múshesi boldy. Sonymen birge qazaq rýhanııatyna «Aq kúmbez», «Júrek jylýy», «Tergeý əli bitken joq», «Kókjıek», «Qara shańyraq, «Sheraǵamnyń sherýi» atty kitaptarymen olja saldy. Aqıqatty tý etken qalamgerdiń ónegeli ómiri keıingi jas urpaqqa zor taǵylym.
Erdiń soıy – Eraǵań
Bas basylymdy Arqa tósine bastap kelgen Erjuman Smaıyl «Egemen Qazaqstanǵa» 25 jyl boıy mańdaı teri sińgen kórnekti jýrnalıst. Ol – Buqaralyq aqparat quraldary salasyndaǵy Prezıdent syılyǵynyń tuńǵysh laýreaty, Qazaqstannyń eńbek sińirgen qaıratkeri.
Aıtýly qalamgerdiń maqalalary qoǵamdaǵy qordaly máselelerdi der kezinde sheship, el táýelsizdigin nyǵaıtýǵa zor úles qosty. Jaqsylar men jaısańdardyń jalǵasy bolǵan ol sońynan ergen jas tolqynǵa qamqorlyq kórsetip, qanattandyrdy. Sondyqtan shákirtteriniń bári ony «Erdiń soıy – Eraǵań» dep qurmetpen eske alady.
Qoǵamshyl qalamger
«Egemende» eldik máselelerdi qozǵaǵan maqalalarymen oqyrmannyń yqylasyna bólenip, qoǵamdyq pikirdiń ornyǵýyna yqpal etken qalamy júırik jýrnalıstiń biri Jylqybaı Jaǵyparuly edi.
Jylqybaı Jaǵyparulynyń baıyrǵy Selınograd oblysynda qazaq mektepterin ashý isi men Aqmolada nemis avtonomııasyn qurý máselesi týyndaǵanda, almas qylyshtaı jarqyldap alǵa shyqqany Arqa qazaǵyna jaqsy tanys. О́ńirde respýblıkalyq «Til jáne mádenıet» qoǵamynyń qurylýyna muryndyq bolyp, uıymdastyrý komıtetiniń tóraǵasy boldy. Ol – «Zar-nala», «Kek», «Qalam kıesi», «Úmit tolqyny», «Ult uıasyndaǵy ulaǵat» kitaptarynyń avtory. Eshkimdi jatyrqamaı, jatsynbaı, ár qazaqty baýyryndaı súıgen Jylqybaı aǵanyń arly amanaty – barshamyzǵa ortaq paryz.
