Infografıkany jasaǵan – Amangeldi Qııas, «EQ»
Al irgesin keńge salǵany deıtinimiz, bizdiń ómirimizge engen jańashyldyqtyń, jańalyqtyń qaı-qaısyn da bul gazet jatyrqaǵan joq. Múmkindiginshe óziniń sıpatyna, kelbetine saı qabyldap, taǵy da sol oqyrmanynyń nazaryna usynady.
HHI ǵasyr esik qaqqaly eńsemizdi de tiktegenimiz esimizde. Sol tustardan soń jahanda qaryshtap ilgerilegen jańa tehnologııanyń kóshine elimiz de at izin sala tústi. Sońǵy úlgidegi teledıdar, smartfon, kompıýter degenderdiń ıgiligin buqaranyń sezine bastaǵany sol jyldar edi. Internet BAQ-ta el ómirine enteleı enip, ekpindete aqparat taratty.
«Egemen» ınternet basylymdardy básekeles sanaǵan joq. О́ıtkeni óziniń dańǵyl joly qalyptasqan, dara shabysyna túsken. Qaıta jumys aýqymyn keńeıtip, qazir tirshiligi qyz-qyz qaınap jatqan ınternet-redaksııasynyń irgetasyn qalaýǵa kirisip ketti. 2005 jyly-aq sol kezdegi Aqparat jáne kommýnıkasııa mınıstrliginiń kýáligin alyp úlgerdi.
Al qazirgi «egemen.kz» ınternet-portalynda gazet betinde 2010 jyldan beri jaryq kórgen materıaldar, maqalalar, suhbattar, saraptamalar, jańalyqtar saqtalǵan. Olardy kez kelgen ýaqytta oqyrman ashyp jiberip, oqı alady.
Jyl ótken saıyn álgi ınternet BAQ mazmunyn jańartyp, formasyn ózgertip, kókjıegin keńeıtip, kópshiliktiń suranysyna saı san túrli sharýany atqardy. Osynaý ıgi úderisten «Egemenniń» saıty da kenje qalmady. Zaman talap etken platformaǵa aýysyp, aǵylshyn, orys tilderinde de aqparat tarata bastady.
Al bizdiń shettegi qandastarymyzdyń deni – irgedegi Qytaı men Mońǵolııadaǵy qazaqtar bizdiń kırıl qaripterin tanı qoımaıdy. Olar negizin Baıtursynuly qalaǵan tóte jazýdy biledi. Olar atajurtynyń bas basylymyn, basqa jańalyǵyn oqýǵa tıis. Osyny eskergen «Egemen» saıty jańalyqtaryn tóte jazýmen de taratýdy qolǵa aldy.
Osyndaı sharýalardyń eshqaısysy nátıjesiz qalǵan emes. Búginde «egemen.kz» portalynyń oqyrmandary álemniń túkpir-túkpirinde bar. Eń qyzyǵy, bizdiń saıtty oqıtyndardyń deni túý Amerıkada eken. Bıyldyqqa saıtymyz muhıttyń arǵy betinen 223 myń márte kórilgen. Bul kórsetkish byltyr 135 myńǵa jetip jyǵylypty.
Sodan keıingi orynda Reseı, Mońǵolııa, Sıngapýr tur. Bestikti О́zbekstan túıindeıdi. «Egemenniń» ınternettegi oqyrmandary Qytaı, Norvegııa, Shvesııa, Túrkııa, Irlandııa, Germanııa, Bolgarııada da bar eken. Az deýge kelmeıdi, myńdap sanalady.
Jalpy, bizdiń saıtty ótken jyly 3 mıllıon 800 myń adam 11 mıllıon 367 myń márte ashyp, keregin tapsa, osy jyldyń basynan beri oqyrmandarymyz 8 mıllıon márte portalymyzǵa enip, jańalyqtarymyzdy sholypty.
Qazirgi tańda ınternet-saıttarmen birge, áleýmettik jeliler de qoǵamymyzdyń ajyramas bóligine aınalyp úlgerdi. Oqyrman qolyndaǵy smartfon arqyly jelige enip, ózin qyzyqtyrǵan saıttardyń jańalyǵymen áp-sátte tanysyp jatady. «Egemenniń» ınternet-redaksııasynyń ujymy bul úrdisti de qolǵa alyp, Instagram, Facebook, Telegram, X, YouTube jelilerinen paraqshalaryn ashty. Búginde bulardyń árqaısynda 4 myńnan 31 myńǵa deıin oqyrmanymyz bar. Olar ár kún saıyn, saǵat saıyn el ómiriniń sońǵy habarlarymen der kezinde tanysyp otyrady.
Biz áli de ınternettegi oqyrmandarymyzdyń qatary qalyńdaı beretinine senimdimiz.
