Foto: Mádenıet jáne aqparat mınıstrligi
Ashylý saltanatynda sóz sóılegen mınıstr Aıda Balaeva Euronews keńsesiniń ashylýy Qazaqstannyń aqparat salasy úshin mańyzdy oqıǵa ekenin atap ótti. Mınıstr bul tek geografııalyq aýqymdy keńeıtý emes, sondaı-aq Qazaqstannyń baı mádenı murasyn, zamanaýı jetistikterin álemge kórsetýge berilgen jańa múmkindik ekenin aıtty.
«Memleket basshysy qazaqstandyq mádenıetti, týrıstik jáne ınvestısııalyq áleýetti halyqaralyq deńgeıde tanystyrýdy tapsyrǵan bolatyn. Meniń oıymsha, bul keńseniń ashylýy osy jumystarǵa jańa serpin beretini sózsiz. Bul keńse mádenıetter arasyndaǵy dıalog alańyna aınalyp, jańa ıdeıalar men kreatıvti sheshimderdi ilgeriletýge úles qosady. Bul bastama arqyly tek ózara túsinistikti arttyratyn ǵana emes, jahandyq medıa keńistikti baıytatyn jobalar dúnıege keletinine senimdimin», dedi Aıda Balaeva.
Aıta keteıik, birlesken yntymaqtastyq aıasynda Euronews 39 mıllıonnan astam kórermendi qamtyǵan Kóshpeliler oıyndarynyń materıaldaryn translıasııalaǵan.
Sondaı-aq qazaq halqynyń mádenı murasy men ınvestısııalyq jobalary týraly 10 baǵdarlama, habarlar men suhbattar jarııalanǵan.
«Qazaqtar – Uly Dala órkenıetiniń muragerleri, Ortalyq Eýrazııadaǵy kókparshy kóshpendi halyqtardyń memlekettilik dástúriniń izbasarlary. Qazaq handyǵy 1465 jyly Altyn Orda kúıregennen keıin qurylyp, keıinnen táýelsiz memleket retinde qazirgi Qazaqstan Respýblıkasynyń qalyptasýyna ákeldi. Kelesi jyly Qazaqstan óz táýelsizdiginiń 35 jyldyǵyn atap ótedi. Qazirgi tańda Qazaqstan 20 mıllıon halqy bar álemdegi eń iri 40 ekonomıka qatarynan oryn alyp, kóptegen ekonomıkalyq jáne saıası reformalarmen úlgi bolarlyq joldy kórsetip otyr. Prezıdent Qasym-Jomart Toqaevtyń jetekshiligimen birneshe saıası reformalar tabysty júzege asyryldy. Osy ózgeristerdiń arqasynda búgin tarıhı sát – Astanadaǵy Euronews keńsesiniń ashylý saltanatyna jınalyp otyrmyz. Biz Qazaqstannyń ekonomıkasy, mádenıeti jáne murasy týraly halyqaralyq aýdıtorııany aqparattandyrýǵa baǵyttalǵan jumystardy jalǵastyramyz. Qazaqstan kásipkerlerimen, sýretshilerimen jáne talanttarymen jumys istep, Qazaqstannyń jańa shyndyǵyn jáne jarqyn bolashaǵyn kórsetetin úsh túpnusqalyq teleshoý ázirleımiz», dedi óz kezeginde «Euronews» Dırektorlar keńesiniń tóraǵasy Pedro Vargas.
Yntymaqtastyqtyń mańyzdy bóligi – Euronews academy jobasyn júzege asyrý. Onyń aıasynda otandyq jýrnalısterge sheteldik spıkerlerdiń qatysýymen oflaın trenıngter men master-klasstar uıymdastyrylady. Bul otandyq BAQ ókilderiniń kásibı daǵdylaryna oń áserin tıgizedi.
Qazirgi ýaqytta 20 jobany iske asyrý boıynsha jumys júrgizilip jatyr. Olardyń qatarynda mádenıet, óner jáne ómir salty týraly «Modern Nomads» shoýy, bıznes pen ekonomıkaǵa arnalǵan óńirlik shoý – «East-West Connect», sondaı-aq óńirlik tulǵalarmen suhbattar – «Voices from Central Asia» jobalary bar.
