Túrkistannyń 1 500 jyldyǵynda gazet tilshisi Súleımen Mámettiń «Túrkistan shaharyna – arnaıy mártebe» degen shaǵyn maqalasy jarııalanǵan. «Túrkistan – topyraǵy kıeli. Ekinshi Mekke dep tegin atalmasa kerek. Sony ata-babalarymyz ótken ǵasyrlarda-aq kóregendikpen tanyp-bilgen. Ultyna qorǵan bolǵan arýaqtylaryn sonda aparyp Jer-ananyń qushaǵyna tapsyryp otyrǵan. Bir ǵana Túrkistan shahary ǵana emes, onyń aınalasynda jurt minájat etetin toqsannan asa kıeli oryndar bar» degen oımaqtaı ǵana oıyn aıtady. Osylaı deı kele, jýrnalıst bul barymyzdy baǵalaýǵa, joǵymyzdy túgendeýge jol ashyp, kıeli qaladaǵy búgingi ıgilikti is jalǵasyn taýyp jasaryp, jańaryp, qala kilemdeı túrlene beretinin tilge tıek etken. Sondaı-aq shahar mártebesiniń otandyq dárejege kóterilýi ult rýhyn asqaqtatyp, mereıin ústem etetini týraly maqala zııaly qaýymnyń da qoldaýyna ıe bolady.
«Gazet tilshisi retinde Túrkistannyń mereıtoıynda birneshe áriptespen birge men de kúndelikti sol jaqtan maqala jazyp turdyq. Bir kúni qasymyzdaǵy Qazaq-túrik ýnıversıtetinde jumys isteıtin túrikter «Biz Túrkistandy ekinshi Mekke dep esepteımiz» dedi. Sóıtip 2000 jyly gazet betine kıeli ólkege mártebe berip, abyroıyn asqaqtatý qajet ekenin aıtyp maqala jazdym. Osy biraýyz sózim qoǵamda rezonans týdyrǵan soń akademıkter Rahmanqul Berdibaev, Murat Jurynov, Halyq ártisi Raıymbek Seıtmetovten pikir alyp ekinshi ret «Túrkistanǵa erekshe mártebe berý kerek» dep qaıtadan maqala daıyndadym», deıdi Súleımen Mámet. Alaıda bul bastamanyń qazirgi elordamyzǵa astana mártebesi berilip, dúrkirep turǵan kezeńinde kóterilgenin bılik birden qup kórmepti. Tipti gazet tilshisiniń kótergen eldik máselesi maıshammen qaralyp, jumystan shyǵarý týraly tapsyrma berilgen.
«Maqalam jaryqqa shyqqannan keıin redaksııa basshylyǵy shuǵyl túrde jumysqa shaqyrtyp aldy. «Túrkistandy Astanamen salystyrǵanyń ne?» dep suraqtyń astyna aldy. Túrkistan men Astana qalasynyń arasyndaǵy aıyrmashylyqty túsindirip, aıtqym kelgen oıymdy sońyna deıin túsindirip baqtym. Bir kúni basshylyq qaıtadan redaksııaǵa tez jetýimdi buıyrdy. Jumysqa kelsem, meniń máselem qaıta qaralyp, joǵary jaqta shý bolyp jatyr eken. Uzyn sózdiń qysqasy, joǵarydaǵylar meni jumystan shyǵarý týraly tapsyrma bergen. Sodan ne kerek, akademıkter men ártistiń aıtqan dıktafondaǵy sózimen, meniń túsiniktememmen sol kezdegi Aqparat mınıstri Altynbek Sársenbaev tanysyp shyqqan. Mınıstr týra adam edi. «Tilshiniń pikiri oryndy. Bul sózdi ol oıdan shyǵaryp otyrǵan joq. Zııaly qaýymnyń da pikiri keltirilgen. Osymen bul daýdy doǵaryńdar. Prezıdent ákimshiligine jaǵdaıdy ózim túsindiremin» dep toq eterin aıtty. Sonyń arqasynda jumysta qaldym», deıdi esteligimen bólisken Súleımen Mámet.
Jalpy, bul ǵana emes, «Egemen Qazaqstan» gazeti eldiń turmys-tirshiliginen bastap ulttyq máselege deıin joǵaryǵa jetkizip, halyqtyń kózi, qulaǵy hám tili retinde óz mindetin atqaryp júr. Máselen, gazet ardageri Súleımen Mámet kezinde Astanaǵa alǵash kelgende qalada jalǵyz qazaq mektebi bolǵan. Sol kezeńde gazet betinde kóterilgen bas qaladaǵy ana tiliniń jaǵdaıy, qazaq mektebin kóbeıtý týraly kókeıkesti másele de qoldaý tapqany ras.
