Foto: Týrızm jáne sport mınıstrligi
Qazaqstan fýtbol federasııasynyń prezıdenttigine kandıdattar retinde «Almaty oblysynyń fýtbol qaýymdastyǵy» ZTB atynan Altaı Daýmov, «Aqmola oblystyq fýtbol qaýymdastyǵy» ZTB atynan Erbol Qaıyrov jáne «Astana qalasy fýtbol federasııasy qaýymdastyǵy» ZTB atynan Marat Omarov úmitker atandy.
QFF Bas hatshysy Saıan Hamıtjanov jıyndy ashyp, kún tártibindegi máselelerdi atap ótti. Odan keıin prezıdenttikke úmitkerlerge sóz berildi. Otyrystyń resmı bóligi aıaqtalǵan soń oblystyq fýtbol qaýymdastyǵy zańdy tulǵalar birlestiginiń, fýtbol uıymdarynyń jáne fýtbol mektepteriniń ókilderi jańa prezıdentti saılaý úshin daýys berdi. Nátıjesinde qatysýshylar M.Omarovtyń kandıdatýrasyn qoldady.
Mınıstr Erbol Myrzabosynov Marat Omarovty quttyqtap, aldaǵy jumysyna sáttilik tiledi.
«Qazaqstan fýtbol federasııasynyń jumysynda úlken ózgerister bolyp jatyr. Búgin qurylymnyń jańa prezıdenti taǵaıyndaldy. Basshylyqqa Marat Omarov kelip otyr. Fýtbol - álemdegi eń qyzyqty ári tanymal sport túri. Qazaqstan úshin de dál solaı. Jańa prezıdenttiń basshylyǵymen ulttyq qurama jaqsy nátıje kórsetedi dep senemin. Marat Talǵatuly salaǵa jańasha serpin ákelip, osy ýaqytqa deıin jınaǵan tájirıbesin otandyq fýtboldyń damýyna jumsaıdy degen oıdamyn. El azamattary fýtbolǵa erekshe qyzyǵýshylyqpen qaraıdy. Sondyqtan fýtboldy jańasha damytýymyz kerek. Ásirese, halyqaralyq deńgeıdegi yntymaqtastyqty arttyrý qajet. Fýtbolshylardyń, álemdik deńgeıdegi bapkerler men tóreshilerdiń daıyndyǵyna, rezervti daıarlaýǵa erekshe kóńil bólý mańyzdy», dedi Erbol Myrzabosynov.
Aıta keteıik, búgingi tańda bul sport túrimen 1 mıllıonnan astam adam turaqty túrde shuǵyldanady. Onyń ishinde aýyldyq jerlerde 537 myń adam fýtbol oınaıdy.
