Qazirgi ýaqytta Lý Ban sheberhanasynda 400-ge jýyq stýdent pen magıstrant «Kólik, kólik tehnıkasy jáne tehnologııalar», «Tasymaldaýdy, qozǵalysty uıymdastyrý jáne kólikti paıdalaný» baǵdarlamalary boıynsha bilim alyp jatyr. Sondaı-aq «Kóliktik mashına jasaýdaǵy smart tehnologııalar men jasandy ıntellekt» jańa ınnovasııalyq bilim berý baǵdarlamasymen «Aqparattyq tehnologııalar» mamandyǵy boıynsha oqý toby quryldy. Buǵan 24 stýdent qabyldandy.
Lý Ban sheberhanasy halyqaralyq joba aıasynda 2023 jáne 2024 jyldary 15 oqytýshy, magıstrant jáne ShQTÝ ınjenerleri Qytaıda Tıanszın kásibı ınstıtýtynda ıntellektýaldy jelilik avtokólikter, elektromobılder qyzmeti jáne avtokólikterdegi SMART tehnologııalardy zertteý boıynsha tájirıbeden ótip kelgen. Stýdentterge óndiris kásiporyndarynda zamanaýı jabdyqty paıdalana otyryp, oqytý múmkindigi berildi.
– Sheberhananyń ashylýy joǵary bilikti mamandardy kólik salasynda daıarlaýdy edáýir tolyqtyrady. Lý Ban sheberhanasynyń arqasynda bizdiń ýnıversıtetimizde kólik salasyndaǵy aldyńǵy qatarly smart-tehnologııalar men elektrlik jáne gıbrıdti kólikterdiń jańa konstrýksııalarymen tanysý múmkindigi paıda boldy. Mundaǵy bilim berý modeli «EPIP» standarttar júıesine negizdelgen, onyń prınsıpteri «CDIO» standarttar júıesimen úndesedi. Sondyqtan Lý Ban sheberhanasynyń bilim berý modeli Qazaqstandaǵy tehnıkalyq bilim berý salasyndaǵy jańa kezeń, – dedi D.Serikbaev atyndaǵy tehnıkalyq ýnıversıtettiń basqarma tóraǵasy, rektor Sáýle Jádigerqyzy.
Sheberhanada bilimderin shyńdaǵan stýdentter joǵary suranysqa ıe. Ásirese bıznes ókilderi qyzyǵýshylyq tanytqan. Máselen, oqýy oryn «Astana Motors», «Allur Auto» syndy kásiporyndarmen shart jasasyp, stýdentter dýaldy oqytýǵa kóshken. Sóıtip, olar tájirıbesin jetildire júrip, turaqty jumysqa ornalasady. Úzdikter qatarynan kóringen stýdentter ShQTÝ magıstratýrasy men doktorantýrasynda oqýyn jalǵastyrýǵa jáne ǵylymı zertteýler men tájirıbelik-konstrýktorlyq jumystar júrgizýge baǵyttalǵan.
Qazirgi ýaqytta Lý Ban sehynyń qurylysy ekinshi kezeńge ótkendigine qarasaq, damý ústinde. Baǵdarlamalaý, smart qurylǵylardy jobalaý, qozǵalys qaýipsizdigi smart-tehnologııalary jáne avtonomdy ushqyshsyz apparattar tehnologııalary sııaqty ózekti daǵdylarǵa baǵyttalǵan jańa kýrstar engizilipti. Stýdentter qyzyǵýshylyq tanytqandyqtan, olardyń qatary bolashaqta kóbeıe túseri anyq. Qazirgi ýaqytta Nıgerııa, Mońǵolııa, Reseı jáne Belorýssııa syndy memleketterden kelip, bilim alyp júrgender de bar.
Shetel demekshi, Lý Ban sheberhanasynyń jalǵasy retinde D.Serikbaev atyndaǵy Shyǵys Qazaqstan tehnıkalyq ýnıversıteti men Tıanszın kásibı ınstıtýty arasynda jasalǵan kelisim negizinde «SMART Driving Technology» avtomobıldik ıntellektýaldy tehnologııalaryn qoldaný jáne jetildirý jónindegi Qazaqstandyq ınjenerlik ortalyq qurylyp jatyr. «SMART Driving Technology» nysanyn salý boıynsha jumys qolǵa alynǵan. Al Qytaıdyń seriktesteri 6 elektromobıl beredi. Sóıtip, sheberhana az ýaqyt ishinde joǵary bilikti mamandardyń damýyna yqpal etetin tájirıbe men bilim almasýdyń kópirine aınalady.
Qosymsha aıta keterligi, Lý Ban sheberhanasy Qazaqstanda «EPIP» (Engineering Practice Innovation Project) standarttaryna sáıkes ınjenerlerdi daıarlaıtyn sertıfıkattalǵan ortalyq. Bul stýdentterge tek tehnıkalyq salalarda jańa bilim alý ǵana emes, sonymen qatar mashına jasaý, aqparattyq tehnologııalar, elektrotehnıka jáne basqa da salalarda ozyq jumys ádisterin meńgerýge múmkindik beredi.
Joǵaryda atalǵan birlesken baǵdarlamalar elimizdegi oqý standarttaryn jaqsartýǵa, Qytaıda qoldanylyp júrgen jańa ádistemeler men tehnologııalardy engizýge yqpal etýi múmkin. Oqý-oryn basshylyǵynyń aıtýynsha, Lý Ban sheberhanasy tek bilim salasynda ǵana emes, dıplomatııalyq deńgeıde de áleýetke ıe. Qazaqstan men Qytaı arasyndaǵy dostyq qarym-qatynastardy nyǵaıtýda mańyzdy ról atqarady.
О́skemen
