Foto: Midjourney
Jańa bilim obektileriniń ashylýy
Ár óńirde, sonyń ishinde elordamyz Astanada, sondaı-aq Túrkistan, Qostanaı, Qyzylorda, Aqtóbe, Pavlodar, Batys Qazaqstan oblystarynda jańa balabaqshalar, mektepter men shyǵarmashylyq ortalyqtar boı kóterdi.
Atap aıtsaq, Táýelsizdik kúni qarsańynda Túrkistan oblysyndaǵy Saýran aýdanynyń Eńbekshi Dıhan aýylynda bir aýysymda 600 oqýshyǵa shaqtalǵan jańa jaıly mektep ashyldy. Nysan Memleket basshysy Qasym-Jomart Toqaevtyń tapsyrmasymen júzege asyrylyp jatqan «Jaıly mektep» ulttyq jobasy aıasynda boı kóterdi. Bul aýyl turǵyndary úshin kópten kútken oqıǵa boldy. Jańa mektep zamanaýı qaýipsizdik talaptaryna sáıkes keletin barlyq qajetti qural-jabdyqtarmen qamtylǵan.
Al elordada eki aýysymda 4 myń oqýshyǵa arnalǵan 11-shi «Jaıly mektep» ashyldy. Bul mektep Úrker turǵyn alabynda ornalasqan, ol oryn tapshylyǵy máselesin sheshýge septigin tıgizdi.
Bilim salasyndaǵy taǵy bir mańyzdy oqıǵalardyń biri - Batys Qazaqstan oblysynyń Oral qalasynda 400 oqýshyǵa arnalǵan jańa mekteptiń paıdalanýǵa berilýi. Mektepte balalar shyǵarmashylyǵyn damytý men demalýǵa arnalǵan keńistikter, sondaı-aq jeke shkaftar qarastyrylǵan. Sonymen qatar sport jáne akt zaldary, kitaphana, ashana, sheberhana jáne 36 pándik kabınet bar.
Sondaı-aq Qostanaı oblysynyń Qostanaı jáne Arqalyq qalalarynda eki jańa memlekettik balabaqsha ashyldy. Bul mektepke deıingi uıymdar barlyq zamanaýı standarttarǵa saı. Olar jatyn bólmelerimen, oıyn bólmelerimen, horeografııalyq, gımnastıkalyq, mýzykalyq jáne sport zaldarymen, pedagog-psıholog, logoped, medısınalyq, qosymsha bilim berý kabınetterimen qamtylǵan.
Aıta keteıik, osy jyldyń basynan beri elimizde 560-tan astam mektepke deıingi uıym ashylǵan.
Elimizdiń tórt óńirinde qosymsha bilim berý nysandary paıdalanýǵa berilgen. Mysaly, Aqtóbe oblysy Qarǵaly aýdanynyń Badamsha aýylynda óner mektebi ashyldy. Onda 550-ge jýyq bala bilim alyp jatyr.
Qyzylorda oblysynyń Jańaqorǵan aýdanynda eki qosymsha bilim berý uıymy – oqýshylar saraıy men óner mektebi ashyldy. Bul mekemelerde 19 qosymsha bilim berý baǵyty boıynsha 250-den astam bala bilim alady.
Sondaı-aq Pavlodar oblysynyń Ekibastuz qalasynda Memleket basshysynyń tapsyrmasymen salynǵan «Samǵaý» balalardyń zamanýı shyǵarmashylyq úıi ashyldy. Ol «Balalarǵa qosymsha bilim berý júıesiniń jańa úlgisi» ǵylymı-tehnıkalyq baǵdarlamalary aıasynda 12 baǵyt boıynsha balalardy oqytýǵa arnalǵan joǵary tehnologııalarmen jabdyqtalǵan. Ortalyq kúnine 3000-ǵa deıin balany qabyldaıdy. Onyń ishinde erekshe bilim berýdi qajet etetin oqýshylar da bar.
2024-2025 oqý jylynyń basynan beri elimizde barlyǵy 500-den astam jańa bilim berý uıymy ashylǵan.
Jańa nysandardyń aımaqtyq damýǵa áseri
Bilimge qoljetimdilikti teńestirý. Jańa oqý oryndarynyń ashylýy qala men aýyldyq aımaqtar arasyndaǵy bilim berýdegi dısproporsııany azaıtýǵa úlken kómegin tıgizedi. Bul shalǵaı eldi mekenderdiń balalaryna úlken qalalarǵa barmaı-aq sapaly bilim alyp, talanttaryn damytýǵa múmkindik bere alady.
Sonymen qatar jańa oqý oryndarynyń ashylýy muǵalimderge, ákimshilik qyzmetkerlerge jáne mamandarǵa qosymsha jumys oryndaryn ashady. Bul óńirlerdiń ekonomıkalyq jaǵdaıyn jaqsartýǵa yqpal etedi.
Oqytýdyń zamanaýı ádisterin qoldaný arqyly oqýǵa jáne sabaqtan tys jumystardy ótkizýge qolaıly jaǵdaı týǵyzady. Mektepterde ınteraktıvti taqtalar, kompıýterlik zerthanalar ornatylyp, al shyǵarmashylyq ortalyqtarda óner, mýzyka jáne bı sabaqtaryna arnalǵan stýdııalar bolýy aımaqtyń damýyna edáýir áser etpek.
Bul bastamalar elimizdegi bilim berýdi jańǵyrtý jáne ınfraqurylymdy damytý jónindegi memlekettik baǵdarlamanyń bir bóligi. Olar bilim sapasyn arttyrýǵa jáne turǵylyqty jerine qaramastan barlyq azamattarǵa teń múmkindikterdi qamtamasyz etýge baǵyttalǵan strategııalyq maqsattarǵa sáıkes keledi. Osylaısha, jańa oqý oryndarynyń ashylýy Qazaqstannyń bilim berý salasyn damytýdaǵy, halyqtyń barlyq toby úshin bilim berý qyzmetiniń qoljetimdiligi men sapasyn arttyrýdaǵy mańyzdy qadam boldy.
