Saltanatty shara barysynda ýnıversıtetiniń basqarma tóraǵasy-rektor, Prezıdent janyndaǵy Ulttyq ǵylym akademııasynyń prezıdenti, akademık Aqylbek Kúrishbaev: «Memleket basshysy Qasym-Jomart Toqaev «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda elimizdegi ózekti máseleniń biri – sý sharýashylyǵy salasyna qajetti gıdrotehnıkter, gıdrotehnıkalyq ınjener-qurylysshylar, gıdrogeologtar, glıasıologtar sııaqty bilikti kadrlar daıarlaý mindetin alǵa qoıǵan bolatyn. Osyǵan oraı, Qazaq ulttyq agrarlyq zertteý ýnıversıtetinde 2024-2025 oqý jylynda naryqta suranysqa ıe mamandar daıarlaý maqsatynda «Sý resýrstary jáne IT tehnologııasy» fakýlteti quryldy. Fakýltet sý resýrstarynyń ozyq tehnologııalaryn paıdalana otyryp, sý resýrstaryn tıimdi basqarýdy, sandyq tehnologııalardy ıgergen álemdik deńgeıdegi bilikti mamandardy daıarlaýǵa keńinen jol ashady. QazUAZÝ elimizdegi agroónerkásiptik sektordy damytý jáne bilikti mamandar daıarlaý jumystaryn sátti jalǵastyra otyryp, Qytaı agrarlyq ýnıversıtetimen jáne EAVISION kompanııasymen birlesip, biregeı joba – «Qazaqstan-Qytaı Aýylsharýashylyǵy drondaryn zertteý jáne oqytý ortalyǵyn» ashyp otyr. Bul ortalyqtyń basty maqsaty – zamanaýı dron modelderimen jáne trenajerlarmen jabdyqtalǵan ushqyshsyz ushatyn apparattardy basqara alatyn, olardy aýyl sharýashylyǵynyń túrli salalaryn damytýǵa tıimdi qoldana otyryp, praktıkalyq máselelerdi sheshýde, monıtorıng, karta jasaý, qorshaǵan ortany zertteý jáne aýyl sharýashylyǵyna qatysty basqa da tapsyrmalardy júzege asyra alatyn bilikti mamandar daıyndaý» dep atap ótti.
Qazaq ulttyq agrarlyq zertteý ýnıversıteti Qytaıdyń 40-tan astam ýnıversıtetterimen, ǵylymı zertteý uıymdarymen jáne kompanııalarymen belsendi yntymaqtasa otyryp, sý sharýashylyǵy, orman sharýashylyǵy agronomııa, veterınarııa, zooınjenerler, azyq-túlik qaýipsizdiginiń tehnologtary, jer kadastry mamandaryn daıyndaıtyn túrli halyqaralyq ortalyqtar men zerthanalar ashyldy.
Bıyl tamyz aıynda ýnıversıtette «Tashkent ırrıgasııa jáne aýylsharýashylyǵyn mehanıkalandyrý ınjenerleri ınstıtýty» ulttyq zertteý ýnıversıtetiniń fılıaly ashylyp, 31 stýdent oqýdy bastap ketken bolatyn. Munymen qosa AQSh-tyń jetekshi oqý orny Nebraska Lınkoln Ýnıversıtetimen birlesip, ózara tıimdi áriptestikti damytý aıasynda «Extension services Ortalyǵy» qurylyp, elimiz fermerleri arasynda jańa tehnologııalar men ǵylymı ázirlemelerdi usyný jáne taratý jónindegi yntymaqtastyq jobalary qolǵa alynǵan edi. Sondaı aq «Dayu Irrigation Group» kompanııasymen birlesip, sý resýrstaryn aqyldy basqarý úshin «Qazaqstan-Qytaı sý únemdeýdi sıfrly basqarý» zerthanasy quryldy. «DAYU irrigation Group» kompanııasy, sýdy ólsheıtin quraldar men zerthanalyq jabdyqtardy jetkizýge 1 mıllıon dollardan astam ınvestısııa saldy. Nátıjesinde Almaty oblysyndaǵy Shelek ózeninde sýdy sandyq esepteý tehnologııalary engizilip, sýarýdyń túrli tehnologııalary qoldanysta. Al Lanchjoý ýnıversıtetimen birlesip ashylǵan «Qazaqstan-Qytaı Aqyldy aýyl sharýashylyǵy» ortalyǵynda 3 ǵylymı zerthana jáne 3 platforma qurylyp jatyr.
Ortalyqtyń ashylýy barysynda EAVISION kompanııasynyń dırektory Szaı Hoı ýnıversıtet ujymyna mıkroavtobýstyń kiltin tabys etti.
ALMATY
