Oqıǵa ornyna aldymen jetken «MREK» kesheniniń qyzmetkerleri men kýá bolǵan jergilikti turǵyndar tiri qalǵan jolaýshylardy ushaq qırandysynan shyǵarý jumysyn dereý bastap ketti. Olar arnaıy organ qyzmetkerleri kelgenshe, 15 adamdy ushaqtan shyǵaryp úlgerdi. Artynsha jetken Tótenshe jaǵdaı, jedel járdem qyzmetkerleri shuǵyl iske kiristi.
О́ńir basshysy Nurdáýlet Qılybaı oqıǵa ornyna baryp, oblys ákiminiń tóraǵalyǵymen jedel shtab quryldy. Apat ornynda TJD, IID, jergilikti ákimdik qutqarý jumysyna qajetti jaǵdaıdyń barlyǵyn jasaýǵa jumyldyryldy. TJM-nyń 52 qyzmetkeri men 11 tehnıkasy áýe kemesinen shyqqan órtti sóndirdi.
Mańǵystaý oblystyq densaýlyq saqtaý basqarmasynyń basshysy Bekbolat Izbasarovtyń aıtýynsha, jedel járdemge 1-dárejeli shaqyrtý túsken soń oqıǵa ornyna jedel járdemniń 22 brıgadasy, medısınalyq apat ortalyǵy mekemesinen 6 brıgada, 4-dárejedegi 2 jedel brıgada birden jetti. Mańǵystaý oblystyq ortalyq aýrýhanasy hırýrgııalyq, travmotologııalyq baǵytta 30 oryn, reanımasııalyq baǵytta 10 oryn daıyndap úlgerdi. Oblystyq balalar aýrýhanasy qosymsha 20 oryn, jansaqtaý bóliminen 20 oryn daıyndasa, «Neıron», «Sofımed», «Iаsın-Atameken» jekemenshik klınıkalary barlyǵy 60 oryn, jansaqtaý bóliminen 26 oryn usyndy. Astana qalasynan kómek kelip jetkenshe, Mańǵystaý oblystyq onkologııalyq dıspanserdiń reanımatolog dárigeri men 2 medbıkesi de oqıǵa ornynda jaralylarǵa shuǵyl kómek kórsetti. Oqıǵa ornynda barlyq tótenshe jaǵdaılar qyzmetteri, krımınalıst-sarapshylar, prokýratýra organdary tótenshe jaǵdaı rejiminde jumys istedi. Jalpy, operasııaǵa azamattyq qorǵaý qyzmetiniń jeke quramynan 701 adam, 82 birlik tehnıka jumyldy.
– Barlyq zardap shegýshilerdiń sany – 29. Olardyń 27-i oblystyq aýrýhanaǵa jetkizilgen bolsa, qazirgi tańda 11 jolaýshy aýyr jaǵdaıda jansaqtaý bóliminde jatyr, – dedi B.Izbasarov.
Sońǵy derekter boıynsha, apattan 32 adam aman qalyp, qalǵandary qaza tapqan. Aman qalǵandar arasynda eki ekıpaj múshesi, eki stıýardessa bar.
Ushaq apatyna baılanysty Mańǵystaý oblysyna Premer-mınıstrdiń orynbasary Qanat Bozymbaev bastaǵan úkimettik komıssııa men Bakýden Ázerbaıjannyń Tótenshe jaǵdaılar mınıstri bastaǵan arnaıy qurylǵan komıssııa músheleri, sondaı-aq sanıtarlyq avıasııa jelisi boıynsha Astana qalasynan Ulttyq shuǵyl medısına úılestirý ortalyǵynyń, jetekshi respýblıkalyq ortalyqtardyń joǵary bilikti mamandary, Ázerbaıjan Respýblıkasynyń Densaýlyq saqtaý mınıstrligi men TJM arnaıy keńesi, sanavıasııa brıgadasy keldi. Komıssııa músheleri shtab otyrysyn ótkizdi, aýrýhanaǵa jetkizilgen zardap shekkenderge baryp shyqty.
Tergeý organdary 2 pasıenttiń jeke basyn anyqtaýǵa qatysty jumys júrgizdi. Olardyń bireýi Ázerbaıjan azamaty ekeni anyqtaldy. Barlyq zardap shekkendermen, olardyń týystarymen psıhologter toby jumys istep jatyr. 26 jeltoqsan kúni Reseı Federasııasynyń TJM ortalyq apparatynyń sanıtarlyq avıasııa bortynda Reseıdiń 9 azamaty evakýasııalandy.
Aqtaý aýrýhanalaryndaǵy 20 naýqastyń jaǵdaıy qatań baqylaýda, 5 adam Mańǵystaý oblystyq aýrýhanada, 1 adam Mańǵystaý oblystyq balalar aýrýhanasynyń jansaqtaý bóliminde jatyr. Mańǵystaý oblystyq aýrýhanasynan 2 pasıent travmatologııa bólimshesine aýystyryldy.
Oblys ákimi N.Qılybaı bastaǵan jergilikti bılik, mańǵystaýlyq turǵyndar ushaq apatynan zardap shekkenderge jumyla kómek kórsetti. Jergilikti halyq Ázerbaıjan elshiligi aldyna gúl shoqtaryn qoıyp, qan ortalyǵynda qan tapsyrýǵa kezekke turdy.
Qazirgi tańda oblysta Premer-mınıstriniń orynbasary Qanat Bozymbaev bastaǵan úkimettik komıssııa jumys istep jatyr. Ushaq apatynyń sebebin aldaǵy ýaqytta arnaıy oryndar anyqtaıdy.
Mańǵystaý oblysy
