foto: flyqazaq.com
Qazaq Air 2024 jyldyń 28 jeltoqsany men 2025 jyldyń 27 qańtary aralyǵynda Astana-Ekaterınbýrg baǵyty boıynsha reısterdi ýaqytsha toqtatatynyn habarlady.
«Reısterdi ýaqytsha toqtatý Reseıge ushý táýekelderin únemi baǵalaý nátıjeleri boıynsha jolaýshylar men ekıpaj músheleriniń qaýipsizdigin qamtamasyz etý úshin júzege asyryldy. Avıakompanııa qazirgi ýaqytta Qazaq AIR táýekelderin baǵalaý krıterıılerine sáıkes keletin Omby men Novosibirge reısterdi oryndaýdy jalǵastyrady. Ekaterınbýrgke áýe reısterin qalpyna keltirý táýekelderdi qaıta baǵalaý qorytyndylary boıynsha júzege asyrylatyn bolady», dedi kompanııa ókilderi.
Toqtatylǵan reısterdiń jolaýshylaryna áýe bıletteriniń tolyq quny qaıtarylatyny jáne tasymaldaýshynyń balamaly reısterine tegin qaıta brondaý usynylatyny túsindirildi.
Aıta keteıik, buǵan deıin otandyq «Air Astana» áýe kompanııasy Reseıge reısterin toqtatqan edi.
