Foto: ashyq derekkóz
«Qazaqstan Túrki memleketteri uıymynyń bastaýynda boldy. Osy uıymǵa múshe elder – bizdiń kórshilerimiz ári mańyzdy geosaıası seriktesterimiz.
Biz tóraǵalyq etken kezde saıası jáne saýda-ekonomıkalyq, kólik-logıstıkalyq, mádenı-gýmanıtarlyq salalardaǵy yntymaqtastyqty keńeıtýge basa mán berdik. Birqatar aýqymdy jobany júzege asyrdyq, 80-nen astam is-shara uıymdastyryp, naqty nátıjege qol jetkizdik. Astanada V Dúnıejúzilik kóshpeliler oıyndary ótti. Oqý oryndary men akademııalyq qurylymdardyń, shyǵarmashylyq zııaly qaýym ókilderiniń arasynda tyǵyz baılanys ornady. 2021 jyly túrki áleminiń rýhanı astanasy bolyp jarııalanǵan kóne Túrkistan qalasy halyqtarymyzdyń dostyǵyn nyǵaıtý isinde aıryqsha ról atqarady», dedi Qasym-Jomart Toqaev.
Sonymen qatar Memleket basshysy sońǵy 10 jyldaǵy Túrki memleketteri uıymyna múshe elderdiń arasyndaǵy alys-beris aıtarlyqtaı artqanyn baıandady.
«2024 jyly ózara saýda-sattyq kólemi 45 mıllıard dollardan asty. Elderimiz Transkaspıı halyqaralyq kólik dálizinde mańyzdy ról atqarady. Biz energetıka, ónerkásip, aýyl sharýashylyǵy, sıfrlandyrý salalaryndaǵy yqpaldastyqty kúsheıtýdi kózdep otyrmyz», dedi ol.
Buǵan qosa Qasym-Jomart Toqaev Túrki memleketteri uıymyna usynǵan «TURKTIME!» urany týraly aıtyp, onyń mán-mańyzyna toqtaldy. Aıta keteıik, bul abbrevıatýra ózara qarym-qatynastyń dástúr (Traditions), ýnıfıkasııa (Unification), reformalar (Reforms), bilim (Knowledge), senim (Trust), ınvestısııa (Investments), medıasııa (Mediation) jáne energııa (Energy) sııaqty segiz basymdyǵyn bildiretin sózderden quralǵan.
«Osy basymdyqtardy Túrki memleketteri uıymy ǵana emes, búkil túrki álemi qyzyǵýshylyqpen qabyl aldy. Qazaqstan túrki dúnıesin biriktirýdi kózdeıtin barlyq jasampaz bastamany qoldaıdy, Reseıdiń «Altaı – túrkilerdiń altyn besigi» atty tujyrymdamasyna da jaqsy qaraıdy. Elimiz túrki halyqtary arasyndaǵy baılanysty nyǵaıtý, sondaı-aq ortaq tarıhı-mádenı baı muramyzdy nasıhattaý isine aldaǵy ýaqytta da atsalysa beredi», dedi Memleket basshysy.
