Foto: Aqorda
Ortalyq dırektorynyń aıtýynsha, biregeı keshende sportshylardy daıarlaýǵa qajetti barlyq jaǵdaı jasalǵan. Eresekter men balalar uzyndyǵy ártúrli bes basseınde jattyǵa alady. Onyń biri 50 metrlik bolsa, ekeýi 25 metrlik jáne ekeýi 10 metrlik júzý jolaqtary bar basseınder. Toptyq jattyǵýlar 25 baǵyt boıynsha júrgiziledi. Sonymen qatar munda kásibı jattyǵý zaly da bar.
Akademııany joǵary tehnologııalyq úlgide jabdyqtaýǵa basa nazar aýdarylǵan. Basseınderge sýdyń quramy men reagentterdiń mólsherine avtomatty túrde taldaý júrgizetin ári tıimdi zalalsyzdandyrý men qaýipsizdiktiń joǵary deńgeıin qamtamasyz etetin ıspandyq qondyrǵy qoıylǵan.
Budan bólek, nysan júzýge qajetti mashyqtardy shyńdap, bulshyq etterdi shıratatyn arnaýly jattyǵý quraldarymen jabdyqtalǵan.
Prezıdent jas sportshylarmen áńgimelesip, memleket sport ınfraqurylymdaryn damytýǵa erekshe mán beretinin aıtty.
«Keleshekte tabysty bolýlaryńyzǵa jáne olımpıada chempıony atanýlaryńyzǵa tilektespin. Sporttyń densaýlyqty jaqsartýda, sondaı-aq halyqaralyq jarystarda elimizdiń dańqyn shyǵarýda mańyzy óte zor. Sizderdiń jeńimpaz sportshy ári elimizdiń laıyqty azamaty bolatyndaryńyzǵa senemin», dedi Qasym-Jomart Toqaev.
