Foto: Vedomstvo, ınstagram.
Ǵylym jáne joǵary bilim mınıstrliginiń baspasóz qyzmetiniń málimetinshe 167 myńǵa jýyq adamnyń 76,7%-y qazaq tilinde, 23,2%-y orys tilinde, 142 adam aǵylshyn tilinde testileýden ótýge ótinish bildirgen.
Qańtar UBT-syn ótkizýdiń birinshi kúni sala mınıstri Saıasat Nurbek Astana qalasyndaǵy testileý ortalyqtarynyń birinde bolyp, UBT-nyń ótý barysymen tanysyp, bolashaq stýdentterge sáttilik tiledi.
«Talapkerler ótinish berý barysynda testileý kúnin, ýaqytyn jáne pýnktin ózderi tańdady. Birinshi kúni 2277 adam, onyń ishinde elordada 155 talapker UBT tapsyrady. Eń kóp tańdalatyn beıindik pánder kombınasııasy birneshe jyl qatarynan ózgerissiz qalyp otyr. Talapkerlerdiń 17,5%-y «Matematıka-Fızıka» kombınasııasyn tańdaǵan. Iаǵnı, bul bolashaq ınjenerler, mehanıkter, muǵalimder, tehnıkter, tehnologtar, energetıkter, qurylysshylar. Al 17,3%-y «Bıologııa-Hımııa», 10,3%-y «Matematıka-Informatıka» pánderin tańdady, sáıkesinshe bolashaq medısına qyzmetkerleri men IT mamandary», dedi mınıstr.
UBT-daǵy pánderdiń sany ózgerissiz qalady, ıaǵnı úsheýi mindetti jáne ekeýi tańdaý boıynsha pánder. UBT tapsyrmalar sany – 120. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrmadan. Joǵary ball – 140.
Testileý ýaqyty – 4 saǵat (240 mınýt). Aıta ketsek, erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalady.
Esterińizge salaıyq, qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti ball jınamaǵandar, shyǵarmashylyq UBT-dan basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.
