Sýretti túsirgen – Erlan OMAR, «EQ»
Basqosý barysynda eki eldiń baılanysyn arttyrýdyń bir joly BAQ salasyndaǵy yntymaqtastyqty nyǵaıtý ekeni aıtyldy. Jaber Abdýlla Qazaqstan men Irak tarıhy tamyrlas, senimi men rýhanı qundylyqtary ortaq elder ekenin tilge tıek etti.
«Qazaqstan úshin de, Irak halqy úshin de mártebesi men mereıi ústem ǵulamalarymyz az emes. Máselen, Baǵdad qalasynda ál-Farabı atyndaǵy ýnıversıtet kolledji bar. Bul kisiniń túrki halqynan shyqqan, sonyń ishinde qazaq jerinde ómirge kelgen álemdik deńgeıdegi uly ǵulama ekenin bilemiz. Ony arab halqy da maqtan tutady. Osy sekildi máshhúr ǵulamalarymyz ben ortaq qundylyqtarymyz bizdiń elderimizdiń arasyndaǵy altyn kópir ispettes», dedi ol.
Sondaı-aq dıplomattyń aıtýynsha, bıyl Baǵdad qalasy Arab mádenıetiniń astanasy bolyp jarııalanypty.
«Qazaq gazetteri» seriktestiginiń bas dırektory Dıhan Qamzabekuly elimizdiń bas gazetine arnaıy kelip, óz memleketi jaıynda mańyzdy aqparattarmen bólisip jatqan ıraktyq resmı meımanǵa alǵysyn bildirip, qazaq halqynyń tarıhı, mádenı, dinı ómirinde Irak, Baǵdad ólkeleriniń tereń izi qalǵanyn tilge tıek etti.
Áńgime sońynda Iraktyń ýaqytsha senimdi ókili qazaq pen arab halyqtaryn tek tarıhı, mádenı baılanystar ǵana emes, dinı ustanymy da tutastyratynyn jetkizdi. Máselen, ol Ortalyq Azııadan shyqqan hadısshi ımam ál-Buharıdi búkil arab dúnıesi qurmet tutatynyn, Hanafı mázhabynyń negizin qalaǵan ımam Ábý Hanıfa Irakta jerlengenin aıtty.
«Jaqynda men Túrkistan qalasyndaǵy Qoja Ahmet Iаsaýı mazaryna zııarat ettim. Biz halyqtar arasyn jalǵastyratyn osyndaı ortaq babalarymyzdy qurmet tutyp, urpaqqa qaldyrǵan eńbegin umytpaýymyz kerek», dedi ál-Támımı.
Kezdesý sońynda taraptar aldaǵy ýaqytta Irak elshiligi men «Egemen Qazaqstan» gazeti arasynda aqparattyq-mádenı baılanysty arttyrýǵa ýaǵdalasty.
