ATYRAÝ. 1 mamyr. Atyraýlyqtar Qazaqstan halqynyń birligi kúni merekesin oblys ortalyǵyndaǵy Isataı men Mahambet batyrlar eskertkishi boı kótergen alańda atap ótti. Bul týraly egemen.kz tilshisi habarlady.
Jurtshylyq ertesimen atalǵan alańǵa qaraı top-tobymen aǵyldy. Ulttyq kıimderin kıip, bir-birimen qol alysyp, tós qaǵystyrǵan túrli etnos ókilderi barsha halyqty aıtýly merekemen quttyqtap jatty. Aıtqandaı, óńirde 17 etnomádenı birlestik ókilderi tatýlyq pen turaqtylyqty, dostyq pen birlikti nyǵaıtýǵa laıyqty úlesin qosyp keledi.
Alańǵa jınalǵan jurtshylyqty oblys ákimi Baqtyqoja Izmuhambetov quttyqtap, el birliginiń mańyzyna keńinen toqtaldy. О́ńirdiń bir top soǵys jáne eńbek ardagerine memlekettik marapattar tapsyrdy. Sonymen birge, el birligin nyǵaıtý, beıbitshilik pen kelisimdi saqtaý jáne rýhanı mádenıetti damytýǵa qosqan úlesi úshin «Birlik» altyn medaline «Tatýlyk» tatar-bashqurt etnomádenı birlestiginiń jetekshisi Gúlsına Baıkenova men «Alııa» evreı etnomádenı birlestiginiń jetekshisi Pavel Tkach ıe boldy.
«Bizdiń elimiz táýelsizdigin alǵaly beri kóptegen jetistikke qol jetkizdi. Qazirgi tańda áleýmettik-ekonomıkalyq jaǵdaıymyz jaqsara tústi. Elimizdegi barlyq etnos ókilderi bir-birimen tatý, óz tilin, mádenıetin damytýǵa múmkindik aldy. Sondaı-aq, bári de memlekettik tildi qurmetteıdi. Eldegi tatýlyqtyń nyǵaıǵany bıylǵy Prezıdent saılaýynda jáne bir ret dáleldendi», – deıdi «Tatýlyk» tatar-bashqurt etnomádenı birlestiginiń jetekshisi Gúlsına Baıkenova (sýrette).
Bul kúni etnomádenı birlestikterdiń músheleri áýelete án saldy, myń burala bı bıledi. Olar tek óz tilderinde ǵana emes, qazaq ánderin de shyrqady.
Joldasbek Shópeǵul.
Derek:egemen.kz.
Sýret: Rahym Qoılybaev.
